Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nopaḷut makow kon tua aku'oi inogoian ing kayu topongkoí naonda bo tungkud pogogukur, takin koyow, "Bayakdon ukur im Baḷoi Tuhan bo meja pogogukatan kon sosumbah, bo iapdon mosia inta no'ibadah kom bonunya.
2 Ta'e dona'aidon ukuron im palas kon dotaí in ḷuai Baḷoi i Allah tatua, sin tua inogoi bidon kon intau mita inta diaí nonota'au ko'i Tuhan. Mosia mamangoi morita-ritak makow kong kotaí mosuci tatua solama opat nopuḷuh bodoyowaí nobuḷan.
3 Aku'oi im mopotabaí in saksi-Ku doyowaí inta mogiḷambung in ḷambung intau kinopatoian, bo mosia mopo'umum in habar i Allah solama toribu bodoyowaí nogatut bo onom nopuḷuh nosinggai ko'onggotea."
4 Saksi doyowa tatua in zaitun doyowa nopangkoi bo si'oḷ im pototuduan kon togaí doyowa inta kon tayowonmai i Tuhan inta nomia kon dunia na'a.
5 Aka oyuíon intau monungkuḷ mogaid kon inta diaí mopia ko'i monia, daí ḷumuaidon in tuḷu nongkon bibig monia bo tua im momokak kon saturu mita tatua. Daí natua in daḷan kopopatoi in intau mita inta mogaid kon inta diaí mopia ko'i monia.
6 Oyuíon ing kawasa monia mogolingoi kon ḷangit simbaí diaípa monguyan solama im mosia mopota'au in Habar nongkon i Allah. Mosia inogoian doman ing kawasa monguasa kom bayongan bokakak simbaí mosia mota'au momaḷui kon tubig mobalií duguí; bo oyuíon doman ing kawasa monia mosambok kom butaí na'a takin mopoḷabuí im bayongan inta mokororiga, to'onukabií ing ko'ibog monia.
7 Naonda im mosia mopaḷutdon mopota'au in habar monia, daí mahaḷuk inta iḷumuai nongkon irang im popatoi moḷawang ko'i monia, poḷat monaḷow bodongka molimod ko'i monia.
8 Bo mayat monia mo'itongkob makow kon daḷan moḷoben kong kotaí moḷoben, kong kotaí inta pinopopakuían ko'i Tuhan monia. Tangoi ing kotaí tatua aka secara rohani yo Sodom andeka Mesir.
9 Intau mita nongkon bayongan negara, suku, bahasa bo bangusa moko'ontong kom mayat monia solama toḷu nosinggai kapin, bo diaíbií ogoi in intau mita tatua ḷobongon im mayat monia tua.
10 Moḷungangabií totok gina im bayongan intau kon dunia na'a moko'ontong kom mayat in saksi doyowa tatua. Porameanbií monia ing kinopatoian nayadua tua. Bo mosia mosi'ogoianbií in hadiah, lantaran nabi doyowa tatua ain nopoaíngoi in roriga moaíntoí kom bayongan intau kon dunia na'a.
11 Naonda in toḷudon nosinggai kapin, no'iangoidon bui in tompot kobiagan nongkon i Allah bo sinumu'ot bui kon nabi doyowa tatua. Daí mosia nobangon bo sinimindog, sahingga bayongan intau inta noko'ontong ko'i monia inagiíandon totok in ondok.
12 Onda intua nabi doyowa tatua nokodongogdon kon singog moropot inta nogoinií nongkon soroga, "Koligai onikdon in na'a!" Bo ko'onto-ontongdon doman in saturu monia, mosia namonikdon in soroga ko'oli-oliung ing goḷom.
13 Daí dodai intua nobaliídon in linug inta totok moropot. Bo sepersepuluh nongkon kotaí tatua norimumud. Pitu noribu intau minatoi wakutu in linug tatua. Intau mita ibanea totokdon in no'ondok, daí nodayowdon mosia kong koḷoḷoben ing kawasa i Allah inta kon soroga.
14 Bodito induanya no'italibdon, ta'e indoiai! Bodito intoḷunya diaídon mo'onggot mo'idudui mangoi.
15 Bo malaekat impitunya nogirup kon terompetnya, daí kinodongogandon in singog mita inta mongoḷangon totok nongkon soroga noguman, "Kakuasa'an momarentah kon dunia na'a, masai na'a kinadaiandon i Tuhan naton, bo i Raja mopoposaḷamat inta pinodandi-Nya. Sia bidon im momarentah solamanya!"
16 Daí itoi inta doyowa nopuḷuh bo opat inta ilimituí kon tampat pomomarenta'an monia kon tayowon i Allah, sinumungkudon mita bo nosumbah ko'i Allah.
17 Mosia noguman, "Ki Tuhan, Allah Inta Totok Mokawasa, inta oyuíon, bo koyongandon oyuíon! Kami mopoyaput in sukur moaíntoí ko'i Tuhan sing ki Tuhan ain nopomakeí ing kawasa i Tuhan inta moḷoben, bo nomangkoidon nomarentah!
18 Intau mita inta diaí nonota'au ko'i Tuhan, sinumoruídon sin aindon wakutunya Ikow mopoḷuai in toruí-Mu, bo aindon doman wakutunya Ikow monantuí kon intau mita minatoi. Na'adon doman i wakutunya mobogoi kom boli im pinogaidan in intau mita inta nogaid kon oaíidan i Allah, bo in nabi mita, bo kom bayongan umat, tuata im mosia inta no'ibadah ko'i-Nimu, adií ande itoi. Na'adon i wakutunya morimumud kon intau mita inta nomoguya'at kon dunia na'a!"
19 Daí nobukatdon im Baḷoi Allah kon soroga, bo kino'ontongandon im Poti Dodandian kom bonunya. Bo nongilatdon moyo-moyodudui bo gonugur ing gotup inta modowawak makow, takin doman linug bo uyan eis inta totok morogot.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA