Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Naupu haitu nidekei ka yaku sanggoto kayu nolenje mpo kayu poreke. Bo yaku niparenta nu Alatala ivei: "Koimo reke BanuaKu ri ngata Yerusalem bo Lanta Pesomba. Bo bila muni sakuya kadea ntona netupu riara BanuaKu haitu.

² Tapi nee mureke kaluona doyata ri savaliku BanuaKu, sabana doyata haitu nidekei ka tona ledo nomparasaya i Yesus. Talu-mpae santanga kasaena ira mombakuasai ngataKu Yerusalem.

³ Tempona haitu Kusuro randua tona mompasimbayu tesaKu. Ira mompake baju nipovia lako ri karu mpo tona nasusa rarana, bo ira mompasimbayu tesaKu talu-mpae santanga kasaena."

⁴ Randua suro haitu nirapaka ronggayu kayu zaitun bo roangu kada mpoindo anu neangga ri ngayo nu Alatala, Tupu nu njumangu dunia.

⁵ Ane maria tona madota mompakadaa ira, maria apu mesuvu lako ri ngangara bo mompakaropu bali-balira gahaitu. Ivesiamo isema-sema madota mompakadaa ira rapatesi ante apu haitu.

⁶ Ira randua haitu makuasa mantaamaka uda ala ledo mauda sakuya kasaena ira mompasimbayu tesa lako nte Alatala. Ira muni makuasa ri mata-mata nu uve ala mombabali uve-uve haitu majadi raa. Bo ira makuasa mompandasa manusia ri dunia ante mpengaya-ngaya pepandasa maipia rapodotara ala manusia majea lako ri dosara.

⁷ Ane maupumo ira randua mompasimbayu tesa nu Alatala, makavamo binata nadaa mangeva ira. Binata nadaa haitu anu mesuvu lako riara *lovu anu ledo rapakule mantuvu kandalana. Ia mombadagi randua tona pangane bo mompatesi ira.

⁸ Bo karobatara randua haitu matepalamba nggoo ri dala jama ri ngata mbaso, haitumo ri ngata anu nipompatesi i Yesus ri kayu salib. Ngata mbaso haitu nirapaka Sodom bo Mesir nggaulu sabana nadaa mpuu tupu ngata haitu.

⁹ Talu-mbongi santanga kasaena karobatara randua ledo radekei ratana ri dayo, aga rakita ntona lako ri njumangu dunia, lako ri pura-pura ngata, bo lako ri pura-pura basa ri dunia.

¹⁰ Manggita haitu, tona nadaa nonturo ri dunia madamba mpuu. Ira mosusa madamba-damba bo mosidekeika hadia, sabana namatemo tona randua haitu anu mpuu-mpuu nompandasa toponturo ri dunia.

¹¹ Tapi nikitaku naliu talu-mbongi santanga haitu, nakava mpanjili nosara lako nte Alatala. Natuvu mpanjilimo ira bo kaliu-liu neangga ri sia. Nanggita ira natuvu mpanjilimo, naviora puramo tona nadea gahaitu.

¹² Naupu haitu nariamo suara namangga lako ri suruga nanguli ka ira randua, "Kamaimo! Peore tumaimo!" Bo neore mpuumo ira hau ri suruga nibungu kulimu bo pura-pura balira nanggita peorera haitu.

¹³ Eva nisuka, ri tempo haitu muni najadimo lingu mbaso. Bo nageromo sabagia lako ri sapulu bagia ngata mbaso haitu, bo pitu-njobu tona namate sabana lingu mbaso haitu. Nanggita haitu naviora mpuumo rara ntona da natuvu hamai, bo niulira, "Nambaso mpuu kuasa nu Alatala anu naria ri suruga!"

¹⁴ Jadi naliumo pepandasa karanduana. Epemo! Domo masae pepandasa katataluna muni kana majadi.

¹⁵ Naupu haitu *malaeka kapapituna nompopomoni *tabuena. Bo kaliu-liu nariamo suara-suara ri suruga nongare ante namangga mpuu ivei: "Sii-sii pura-pura poparenta ri dunia hitu najadi poparenta nTuputa bo poparenta nu Magau Topepakasalama anu nijanji nu Alatala. Ia momparenta sampe ri kasae-saena!"

¹⁶ Bo ropulu bo ampa totua anu nonturo ri gaderara ri ngayo nu Alatala nantaputu sanggani sampe ri tana mombasomba Alatala.

¹⁷ Niulira, "O, Pue Alatala, neliu mpuu KakuasaMiu! Bo Komiu naria mamimo lako ri lamba pamulana bo bate-batena naria sii-sii! Kami notarima kasi nte Komiu apa nipopakitaMiumo kuasaMiu naoge. Nompamulamo Komiu nomparenta!

¹⁸ Tona ledo nosisani nte Komiu narau bo nangeva Komiu. Tapi nakavamo gantana Komiu mompopakita rau nu raraMiu ka ira. Nakavamo gantana Komiu mombatangara tona namate. Bo nakava munimo gantana Komiu mombadekei tambo ka batua-batuaMiu, haitumo, *nabi-nabi anu nompasimbayu tesaMiu, bo ka pura-pura todeaMiu, ira anu nombabila Komiu, nau tona biasa, nau tona naoge katuvuna. Nakavamo gantana Komiu mombahuku tona anu nompakaropu manusia ri dunia hitu."

¹⁹ Naupu haitu natebukamo vamba Banua nu Alatala ri suruga bo riara banua haitu nikitaku Peti Pojanji nu Alatala. Tempo haitu kila damo mparea bo guru kede damo mpapedi. Najadimo lingu mbaso ante uda esi naromba mpuu.

Wahyu

Video Wahyu 11

Ikuti Kami:

KONTAK | PARTISIPASI | DONASI