Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "Tan-taretan ommat Isra’il, Mara edhingngagi! Are teya ba’na alengka’a Songay Yordan, ngobasa’ana nagarana sa-bangsa se araja’an ban akowadan dhari ba’na. Tha-kotthana ja-raja, ekalenglenge pagar geddhung se tenggina napa’ ka langnge’.

² Orengnga bangsana buta, badanna raja, tenggi ban kowat; ba’na la ngedhing kabar ja’ tadha’ oreng se kowat alaban ngadhebbi reng-oreng jareya.

³ Tape sateya ba’na bakal nangaleyana dibi’ GUSTE Allahna ba’na alomampa e adha’anna ba’na aropa apoy se rabak. Ba’na bakal nangaleyana dibi’ Salerana makala’a reng-oreng jareya, sampe’ ba’na bisa ceppet ngojuk ban matompes reng-oreng jareya akantha se ejanjiyagi PANGERAN.

⁴ Mon GUSTE Allahna ba’na la nolonge ba’na ngojuk sa-bangsa jareya, ba’na ja’ nyangka ja’ ba’na ebakta ka jadhiya epangobasa’ana tana jareya polana ba’na becce’ ban ngestowagi dhabuna GUSTE Allahna, daddi pantes narema papareng jareya. Enja’! PANGERAN ngojuk sa-bangsa jareya, nolonge ba’na, polana sa-bangsa jareya jahat. PANGERAN ngedine ba’na ngaandhi’ tanana sa-bangsa jareya polana PANGERAN neptebbana parjanjiyanna ka Ibrahim, Ishak ban Yakub.

⁵ (9:4)

⁶ Ba’na kodu yakin ja’ GUSTE Allahna ba’na marengngagi tana se landhu jareya ka ba’na banne polana ba’na pantes narema papareng jareya. Enja’! Ba’na reya bangsa se cengkal!

⁷ Kaenga’e baramma ba’na se mapeggel GUSTE Allahna e ra-ara rowa. Molae kalowar dhari Messer sampe’ napa’ dha’ enna’, ba’na ros-terrosan ta’ atoro’ ka PANGERAN.

⁸ La’-mala’ e Gunong Sinay ba’na mapeggel PANGERAN ce’ talebadda, sampe’ ba’na para’ epatompessa.

⁹ Sengko’ ongga ka gunong jareya narema’a papan bato parjanjiyan se ebadhi PANGERAN ban ba’na. Pa’ polo are pa’ polo malem abidda sengko’ neng e attas gunong jareya, ta’ ngakan ban ta’ ngenom pa-apa.

¹⁰ Saellana jareya PANGERAN marengngagi ka sengko’ papan bato se dhadhuwa’, se aesse tolesan se eserrat PANGERAN dibi’, aropa ca’-oca’ se edhabuwagi Salerana dhari dhalem apoy ka ba’na e bakto ba’na akompol e babana gunong rowa.

¹¹ Onggu, saellana lebat pa’ polo are pa’ polo malem, PANGERAN marengngagi papan bato parjanjiyan se dhadhuwa’ jareya ka sengko’.

¹² PANGERAN pas adhabu ka sengko’, ‘Kassa’ duli toron, sabab bangsa se epimpin ba’na kalowar dhari Messer rowa sateya alako daraka. Reng-oreng rowa nyempang dhari sabarang se eparenta’agi Sengko’, sarta agabay arca se pas esemba.’

¹³ Dhabuna PANGERAN ka sengko’, ‘Sengko’ tao bangsa jareya cengkal parana.

¹⁴ Ba’na ta’ osa ngoddi lang-ngalange Sengko’. Bi’ Sengko’ reng-oreng jareya epatompessa kabbi sopaja reng-oreng jareya ta’ ekaenga’ana oreng pole. Tape ba’na bi’ Sengko’ epadaddiya bangatowana settong bangsa se araja’an ban akowadan dhari sa-bangsa jareya.’

¹⁵ Daddi sengko’ laju toron dhari gunong se rabbang jareya sambi ngeba bato se dhadhuwa’ rowa.

¹⁶ Sengko’ nangale’e ja’ ba’na ta’ ngestowagi papakonna GUSTE Allahna. Ba’na daraka ka PANGERAN polana agabay arca pe-sapeyan logam se eangguya dibi’.

¹⁷ Daddi, e adha’na matana ba’na kabbi, papan bato parjanjiyan se dhadhuwa’ rowa bi’ sengko’ ebantengngagi sampe’ lejjar.

¹⁸ Saellana jareya sengko’ laju asojud pole e ajunanna PANGERAN e konco’na gunong gella’ pa’ polo are pa’ polo malem abidda, ta’ ngakan ban ta’ ngenom pa-apa. Sengko’ ngalakone kantha jareya polana ba’na la agabay dusa ka PANGERAN, ngalakone barang se bi’ PANGERAN eanggep daraka, sampe’ Salerana duka.

¹⁹ Sengko’ tako’ polana PANGERAN ce’ dukana, sampe’ ba’na epatompessa kabbi, tape e bakto jareya PANGERAN gi’ meyarsa’agi tang parnyo’onan.

²⁰ PANGERAN ce’ dukana keya ka Harun, sampe’ epateyana, daddi sengko’ nyo’onnagi Harun keya.

²¹ Arca pe-sapeyan logam gabayanna ba’na rowa bi’ sengko’ epelpallagi ka dhalem apoy. Saellana jareya bi’ sengko’ pas epalejjar, etoto sampe’ daddi abu, abuna bi’ sengko’ etabur ka songay se agili dhari gunong jareya.

²² Neng e Tabera, Masa, Kibrot-Ta’awa ba’na mapeggel PANGERAN keya.

²³ Saellana jareya e bakto PANGERAN makon ba’na mangkat dhari Kades-Barnea, epakon arebbu’ ban ngobasane tana se eparengngagi ka ba’na rowa, ba’na ta’ atoro’ ka dhabuna PANGERAN; ba’na ta’ endha’ parcaja ban ta’ endha’ atoro’ ka PANGERAN.

²⁴ Molae sengko’ kennal ka ba’na, ba’na ros-terrosan ta’ atoro’ ka PANGERAN.

²⁵ Daddi sengko’ terros asojud e ajunanna PANGERAN pa’ polo are pa’ polo malem abidda, sabab sengko’ tao Pangeran la nekat mateyana ba’na kabbi.

²⁶ Sengko’ nyo’on kantha reya: Adhu, Guste ALLAH Se Mahatenggi, ja’ pate’e ommattepon Junandalem ka’dhinto, bangsa se sareng Junandalem epabebas sareng ebakta kalowar dhari Messer kalaban kakowadanna sareng kakobasa’annepon Junandalem se raja.

²⁷ Kaemodi abdiepon Junandalem Ibrahim, Ishak sareng Yakub, ja’ kaemodi kacengkalanna, kajahadanna sareng dusana bangsa ka’dhinto.

²⁸ Manabi sareng Junandalem bangsa ka’dhinto epamosna, oreng Messer tanto ngoca’ ja’ Junandalem ta’ sanggup abakta ommadda ka nagara se ejanjiyagi Junandalem ka reng-oreng gapaneka. Oreng Messer tanto ngoca’ ja’ ommat Isra’il ebakta ka sagara beddhi sareng Junandalem badhi epateyana polana Junandalem baji’ ka bangsa ka’dhinto.

²⁹ Namong ngereng kaemodi, Guste, reng-oreng ka’dhinto bangsa peleyanna Junandalem se ebadhiya ommattepon Junandalem, se ebakta Junandalem dhari Messer kalaban kakobasa’an sareng kakowadannepon Junandalem se raja."

Ulangan

Video Ulangan 9

Ikuti Kami:

KONTAK | PARTISIPASI | DONASI