Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Begiken, o bangsa Israel! Sendah ikeparindu me Lau Jordan, janah iinganindu me taneh bangsa-bangsa si belinen ras gegehen asang kam. Kota-kotandu mbelin, erbentengken tembok si meganjang seh ku langit.
2 Rayatna nggedang mbelin bali ras raksasa. Nggo ibegikenndu maka ise pe la ngasup nalukenca.
3 Tapi genduari iidahndu jine uga TUHAN Dibatandu erdalan arah lebendu bali ras api si merawa. ItalukenNa bangsa-bangsa e adi iperangindu, gelah banci ia minter ipelawes ras ikernepkenndu sue ras si nggo ipadanken TUHAN.
4 Kenca nggo ipelawes TUHAN Dibatandu bangsa-bangsa e, ula nindu i bas ukurndu, maka ibereken TUHAN man bandu negeri enda eme perbahan kam metunggung.
5 Labo erkiteken ulindu ras perbahanenndu benar maka ipelepas TUHAN kam muat taneh bangsa-bangsa e, tapi erkiteken bangsa-bangsa e jahat, janah ate TUHAN nehken si nggo IpadankenNa man nini-ninindu si Abraham, Isak ras Jakup.
6 Tek lah maka labo perbahan kam metunggung maka ibere TUHAN man bandu taneh si mehumur e. Lang! Sabap kam bangsa si mekeng kap.
7 Ula ndigan pe ilupakenndu uga TUHAN Dibatandu nembeh i gurun pasir erkiteken perbahanenndu. Mulai kin kam nadingken Mesir seh ngayak warina kam seh i jenda, kam nggo ngelawan TUHAN.
8 Sedangken i Deleng Sinai pe, seh kal rawana TUHAN erdandanken kam. Erkiteken nembehna AteNa menam pe IkernepkenNa kam.
9 Lawes aku nangkih Deleng Sinai, guna ngaloken papan batu si dua, i ja isuratken perpadanen si ibahan TUHAN ras kam. Empat puluh wari empat puluh berngi aku tading i das la man ras la minem.
10 Kenca bage ibereken TUHAN man bangku papan batu si dua e, i ja nggo IsuratkenNa alu TanNa jine kai si nggo IkatakenNa man bandu i bas api e nari, sanga kam pulung i deleng e.
11 Bage me, kenca nggo lepas si empat puluh wari empat puluh berngi e, ibereken TUHAN man bangku papan batu si dua i ja nggo IsuratiNa perpadanen e.
12 Kenca bage ngerana TUHAN man bangku, 'Pedasken susuri deleng enda, sabap nggo ceda ras jahat bangsa si nggo ibabandu ndarat i Mesir nari e.' Nggo nimpang ia i bas perentah-perentahKu jenari ibahanna gana-gana man sembahenna.
13 Tole nina TUHAN man bangku, 'Kueteh maka tuhu mekeng kal bangsa enda.
14 Ula iolang-olangindu Aku. Kukernepken ateKu kalak enda, gelah masap gelarna i doni nari. Jenari maka Kujadiken kam bapa sada bangsa si belinen ras gegehen asang ia.'
15 Kenca bage maka nusur aku i das deleng e nari, maba dua papan batu i ja perpadanen e isuratken.
16 Kuidah maka nggo ilanggarndu perentah si nggo ibereken TUHAN Dibatandu man bandu. Nggo erdosa kam man BaNa, erkiteken ibahanndu gana-gana i bas bentuk anak lembu i bas logam nari man sembah-sembahenndu.
17 Emaka i lebe-lebendu perper kudampesken batu si dua lambar ndai.
18 Emaka erjimpuh aku ngadap ku lebe-lebe TUHAN sekali nari, empat puluh wari empat puluh berngi dekahna la aku man la aku minem. Kulakoken e, erkiteken nggo kam erdosa man TUHAN erbanca ia merawa.
19 Mbiar aku gara pernembeh TUHAN, sabap erkiteken nembeh AteNa menam kam IkernepkenNa; tapi IbegikenNa ka aku sekali nari.
20 Man Harun pe merawa kal ate TUHAN. Menam pe ia ibunuhna. Emaka kerna ia pe ertoto ka aku.
21 Kubuat barang si kemali si ibahanndu e, eme kap anak lembu emas e, emaka kuambekken ku api. Kenca bage kuperperken, kugiling jadi abu, jenari kuambekken abu e ku lau si maler i das deleng nari.
22 Tole pe ibahanndu ka maka nembeh TUHAN Dibatandu sanga i Tabera, sanga i Massa, ras sanga i Kiberot Taawa.
23 Janah isuruh TUHAN kam i Kades Barnea nari i ja IperentahkenNa kam berkat ras nciati taneh si AteNa IberekenNa man bandu, mberontak kang kam man BaNa. La kam tek, dingen la kam patuh man BaNa.
24 Kidekah kam kutandai, berontak nge kam lalap man TUHAN.
25 Eme sabapna, maka erjimpuh aku ngadap i adep-adepen TUHAN i bas si empat puluh wari empat puluh berngi e, sabap kueteh maka ugapa pe IkernepkenNa AteNa kam.
26 Emaka ertoto aku ningku, 'O, TUHAN si Mada Kuasa ula kal IkernepkenNdu BangsaNdu si IpulahiNdu i taneh Mesir nari alu gegeh dingen KuasaNdu si mbelin.
27 Ula min taktaki uga kengna kalak enda, ula min taktaki kejahaten ras dosa kalak enda, tapi ingetlah suruh-suruhenndu Abraham, Isak ras Jakup.
28 Adi la bage, tentu nina kalak Mesir, maka la kap TertaruhkenNdu BangsaNdu enda ku negeri si nggo IpadankenNdu man bana. Ikataken bangsa Mesir me maka IbabaNdu BangsaNdu ku gurun pasir guna munuh ia, erkiteken nembeh AteNdu man bana.
29 Bangsa enda kap bangsa si nggo IpilihNdu jadi SikerajangenNdu si nggo IbabaNdu ndarat i Mesir nari alu kuasa ras GegehNdu si mbelin.'"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA