Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tapi on do tonah, aturan pakon uhum, na tinonahkon ni Jahowa, Naibata nasiam in bangku, sipodahkononku bani nasiam, ase horjahonon nasiam in, i tanoh sisolukon nasiam ai, dob mandipar nasiam hujai,
2 ase marhabiaran ham bani Jahowa, Naibatamu, anjaha iramotkon ham ganup aturan-Ni pakon tonah-Ni, sagala na dob hutonahkon bamu, ham pakon anakmu age pahompumu, sadokah ham manggoluh ase lambin ganjang umurmu.
3 Antong tangihon ma alo Israel anjaha haporluhon ma mangkorjahon in, ase marhasonangan ham, anjaha ase lambin buei tumang nasiam, songon na dob pinarbagah ni Jahowa Naibata ni ompungmu bamu, i tanoh habaoran ni dadih pakon manisan ni huramah.
4 Tangihon ma alo Israel, anggo Jahowa Naibatanta in, sadasi do Jahowa,
5 Anjaha maningon haholonganmu do Jahowa Naibatamu humbani sagala uhurmu pakon humbani sagala tonduymu pakon humbani sagala gogohmu.
6 Maningon parimbagaskonon nasiam do ganup hata on, sagala na hutonahkon bamu sadari on,
7 anjaha maningon gogohanmu do mangajarhon in hubani anakmu, anjaha sahapkononmu do in, sanggah hundul-hundul ham ibagas rumahmu, barang sanggah i pardalanan ham, barang sanggah laho modom ham, barang dob puho ham.
8 Anjaha maningon sangkutkononmu do in bahen partinandaan i atas tanganmu, anjaha bahen pardingatan i holangkolang ni matamu.
9 Anjaha maningon suratkononmu do in bani tohang ni rumahmu pakon bani horbanganmu.
10 Anjaha anggo domma das nasiam iboan Jahowa, Naibatamu, hu tanoh na binulawankon-Ni hubani ompungmu, bani si Abraham, si Isak pakon si Jakob, laho mamberehon hu bamu huta na bolon pakon na dear, sagala na so pinungkahmu,
11 pakon rumah na gok marisi sagala ugas-ugas na dear, na so niisimu, pakon parigi na hinurak, na so hinurakmu, sonai pakon anggur pakon hayu jetun, na so sinuanmu, anjaha anggo domma ipangan ham ai anjaha bosur ham,
12 jadi jaga ham ma dirimu, ase ulang lupa ham bani Jahowa, na dob mangarahkon ham luar hun tanoh Masir, hun rumah parjabolonanmu.
13 Maningon habiaranmu do Jahowa, Naibatamu; maningon balosanmu do Ia, anjaha marbulawan ham marhitei goran-Ni.
14 Seng bulih irikkonon nasiam naibata na legan, humbani naibata ni bangsa na inggot bani nasiam,
15 ai Naibata parsimburu do Jahowa Naibata nasiam i tongah-tongah nasiam, ase ulang gajag ringis ni Jahowa, Naibatamu, mangidah ham, gabe isiapkon ham hun sisik ni tanoh on.
16 Seng bulih lajouon nasiam Jahowa Naibata nasiam, songon na dob nilajou nasiam Ia i Massa.
17 Maningon bujur nasiam manramotkon tonah ni Jahowa, Naibata nasiam in, pakon hasaksian-Ni pakon aturan-Ni, sagala na dob tinonahkon-Ni in.
18 Anjaha maningon horjahononmu do na pintor, na madear i lobei ni Jahowa, ase marhasonangan ham, anjaha masuk ham manean tanoh na dear in, na dob binulawankon ni Jahowa hubani ompungmu.
19 Ia do mardakdak ganup munsuhmu hun lobeimu, songon na dob pinarbagah ni Jahowa hinan.
20 Anggo isungkun anakmu ham bani panorang na sihol roh, “Aha do arti ni hasaksian, aturan pakon uhum, na tinonahkon ni Jahowa, Naibatanta in bani nasiam?”
21 Jadi hatahononmu ma hubani anakmu, “Jabolon ni Parao do hanami na ijia i Masir, gabe iarahkon Jahowa hanami luar hun Masir marhitei tangan na gogoh,
22 anjaha ibahen Jahowa do tanda halongangan na bolon pakon na majangin i Masir hubani Parao pakon hubani ganup pangisi ni rumahni i lobeinami.
23 Tapi anggo hanami iarahkon do luar hunjai, laho pamasukkon hanami anjaha mamberehon bennami, na dob binagahkon-Ni hubani ompungnami.
24 Anjaha iparentahkon Jahowa do hanami mangkorjahon ganup uhum on, marhabiaran hubani Jahowa, Naibatanami in, ase marhasonangan hanami tongtong, anjaha ipagoluh hanami songon sadari on.
25 Anjaha gabe hapintoron do on bennami, anggo ihaporluhon hanami, mangkorjahon ganup uhum on i lobei ni Jahowa, Naibatanta in, songon na dob pinarentahkon-Ni ai bennami.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA