Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Napasse’rei Musa sikontu bansa Israel, nampa nakana mae ri ke’nanga, "Sikamma sari’battangku ngaseng, pilangngerimi anne hukkung-hukkung kupassareanga mae ri kau ngaseng anne alloa. Pilajari baji’-baji’ anjo hukkung-hukkunga, siagang tuli majarrekko anturuki.
2 Ri Moncong Sinai appareki Karaeng Allata’alata se’re parjanjiang,
3 teai ri boe-boeta bawang, mingka siagang ikatte ngaseng anrinni.
4 Battu lalang ri pepeka irate ri anjo monconga ero’ Batara a’bicara KalenNa siagang ikau ngaseng.
5 Mingka lanri mallakko ri pepeka siagang tena nubarani angngambi’ ri monconga, jari anjo wattua ammentenga’ ri alla’nu siagang Batara untu’ ampabattui kananNa Batara mae ri kau ngaseng.
6 Napappiassengangi Batara angkana, ‘INakke Karaeng Allata’alanu le’baka angngerangko assulu’ battu ri butta Mesir, tampa’nu nipare’ ata.
7 Teako anynyombai rewata-rewata maraeng. INakke bawang nusomba.
8 Teako appareki patung sangkammaya apa-apa ri langika, ri buttaya yareka lalang ri je’neka irawanganna buttaya.
9 Teako anynyombai patung kammaya anjo, lanri iNakke Karaeng Allata’alanu siagang taeroKa’ nipasangkamma manna apa-apa mamo maraenganga. Inai-nai angkabirisiA’ laKuhukkungi sa’genna mae ri jari-jarina lapisi’ matallua siagang makaappaka.
10 Mingka Kupappicinikangi pangngamaseangKu mae ri assa’bu-sa’bua jari-jari ri tau mangngamaseanga ri Nakke siagang mannurukia ri parentaKu.
11 Teako sambarang nupau arengKu, nasaba’ iNakke, Karaeng Allata’alanu, anghukkungi manna pole inai punna napake sala arengKu.
12 Pakalompoi Allo Pammari-mariang siagang pakala’biriki salaku allo matangkasa’, nasaba’ iNakkemi Karaeng Allata’alanu amparentakangi mae ri kau.
13 Kusareko wattu annang allo untu’ anjama,
14 mingka allo makatujua iamintu allo pammari-mariang nisa’laka untu’ iNakke, Karaeng Allata’alanu. Anjo alloa tena manna sitau akkulle anjama, baji’ naikau, ana’-ana’nu, ata-atannu, olo’-olo’nu yareka bansa maraeng niaka ammantang ri pa’rasangannu. Sikamma atannu musti ammari-mari tongi sangkamma ikau kalennu.
15 U’rangi angkana ikau riolo nipare’ atako ri Mesir, nampa nilappassangko ri Karaeng Allata’alanu lalang kakoasang malompoNa. Lanri kammana minjo naKuparentakangko untu’ ampakalompoi Allo Pammari-marianga.
16 Pakalompoi siagang parakai anrong manggenu; iaminjo parentaKu, Karaeng Allata’alanu, sollannu salewangang siagang la’bu umuru’nu ri pa’rasangang Kupassareanga mae ri kau.
17 Teako ammunoi.
18 Teako a’gau’ salimaraki.
19 Teako a’lukkaki.
20 Teako assarei kasa’biang balle-balle ri passala’na parannu tau.
21 Teako kacinnai barang-baranna parannu tau: kammaya balla’na, buttana, bainenna, ata-atanna, olo’-olo’na, keledaina yareka manna apa-apa mamo napatanga parannu tau.’
22 Iaminjo parenta-parenta Napassareanga Batara mae ri kau ngaseng ri wattunnu asse’re ri monconga. Ri wattunna a’bicara kamma sa’ra gamarrung battu lalang ri pepeka siagang rammang kapalaka, Napassareangi anjo parenta-parentaNa. Tena maraeng Napassareang. Nampa Natulisi’ lalang ri rua batu na Napassareang mae ri nakke."
23 "Ri wattunna a’rinra kabusu’ monconga na nia’ sa’ra nulangngere’ battu lalang ri sassanga, battu ngasengi sikontu pamimping sukunu siagang tau toa-toanu mae ri nakke.
24 Nakana ke’nanga, ‘Napappicinikammi kalompoanNa siagang kala’biranNa Karaeng Allata’alata ri wattunna nilangngere’ a’bicara battu lalang ri pepeka. Anne alloa nacini’mi ikambe angkanaya nia’ memang todong olona rupataua untu’ tuli attallasa’, manna pole nale’ba’mo a’bicara Allata’ala mae ri ia.
25 Mingka angngapa namusti nasaung ija nyawana ikambe? Anjo pepe’ sannaka heba’na lanaancuruki ikambe! Tappaki ikambe angkanaya tena tamatena ikambe punna nalangngereki ikambe a’bicara pole Karaeng Allata’ala.
26 Niakka rupatau akkulle tuli attallasa’ le’ba’namo nalangngere’ Allata’ala mattallasaka a’bicara battu lalang ri pepeka?
27 Lanri kammana anjo, a’lampa mako Musa, pilangngeri sikontu apa Napaua Karaeng Allata’alata, nampa pabattui sallang mae ri kambe anjo apa Napaua mae ri kau. Lanapilangngeri ikambe siagang mannuruki ikambe.’
28 Nalangngere’na anjo, Nakanamo Batara mae ri nakke, ‘Kulangngereki anjo apa napaua anjo bansaya, siagang kontutojengi anjo kananna ke’nanga.
29 Ka’de’ natuli kammana anjo pa’mai’na ke’nanga! Ka’de’ natuli napakalompoA’ siagang naturuki sikontu parentaKu, sa’genna salewangang ke’nanga siagang jari-jarina sa’genna satunggu-tungguna!
30 A’lampa mako kamma-kamma anne siagang suromi anjo bansaya massing ammotere’ mange ri kemana.
31 Mingka ikau Musa, ammoterekko siagang ammantangko anrinni siagang iNakke; laKupassareangi mae ri kau sikontu hukkungKu siagang parentaKu. Pangngajarrangi mae ri ke’nanga, sollanna naturuki ke’nanga ri pa’rasangang Kupassareanga mae ri ke’nanga.’
32 Sikamma sari’battangku, turuki siagang pa’mai’ tamamminra sikontu apa Naparentakanga Karaeng Allata’alanu mae ri kau ngaseng. Teako dakkai manna se’re sikamma anjo parentaya.
33 Gaukangi sikontu Napassuroanga Karaeng Allata’alanu mae ri kau, sollannu salewangang siagang akkulle ammantang tuli ri pa’rasangang lanupammantangia."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA