Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Mosa makompol sakabbinna bangsa Isra’il, laju adhabu, "Tan-taretan mara edhingngagi kom-hokom se bi’ sengko’ ekabala’a ka ba’na sateya reya. Ba’na kodu ajar kom-hokom jareya, pas estowagi pagu-onggu.
2 E Gunong Sinay GUSTE Allah Pangeranna ba’na, abadhi parjanjiyan,
3 banne pera’ ban bangatowana ba’na, tape ban sengko’ ban ba’na kabbi se padha badha e dhinna’ sateya reya.
4 Dhari apoy e attas gunong jarowa PANGERAN adhabu dhep-adhebban ban ba’na.
5 Tape sarrena ba’na tako’ ka apoy ban ta’ endha’ ongga ka gunong jareya, daddi sengko’ e bakto jareya manjeng e antarana ba’na ban PANGERAN, manapa’a ka ba’na apa se edhabuwagi PANGERAN. PANGERAN adhabu,
6 ‘Sengko’ reya GUSTE Allahna ba’na, se ngeba ba’na kalowar dhari Messer, kennengnganna ba’na odhi’ ekadunor oreng.
7 Ja’ nyemba ka la’-alla’an laen. Nyemba ka Sengko’ malolo.
8 Ja’ agabay arca kaangguy ba’na dibi’, arca se padha ban apa’a bai se badha e langnge’, e bume otabana e dhalem aeng e babana bume.
9 Ja’ nyemba ka arca se kantha jareya sabab Sengko’ reya PANGERAN, Allahna ba’na ban Sengko’ ta’ endha’ epapadha ban apa’a bai. Reng-oreng se baji’ ka Sengko’ bi’ Sengko’ eokoma sampe’ ka toronanna se kapeng tello’ ban se kapeng empa’.
10 Tape Sengko’ noduwagi Tang kataresna’an ka abun-ebun toronanna reng-oreng se taresna ka Sengko’ sarta ngestowagi Tang parenta.
11 Ja’ ban-saromban nyebbut Tang nyama, sabab Sengko’, GUSTE Allahna ba’na, ngokom sapa’a bai se aguna’agi Tang nyama ta’ sabendherra.
12 Raya’agi are Sabat ban hormadi menangka are se socce, sabab Sengko’ GUSTE Allahna ba’na se marenta’agi jareya ka ba’na.
13 Bi’ Sengko’ ba’na eberri’i nem are se ekenneng angguy alako,
14 tape are se kapeng petto’ reya are kaangguy istirahat malolo, kaangguy amolja’agi Sengko’, GUSTE Allahna ba’na. E are jareya sapa’a bai ta’ olle alalakon, maske ba’na, na’-ana’na ba’na, nor-dunorra, ebinna, otabana oreng manca se badha neng e nagarana ba’na. Nor-dunorra ba’na kodu aistirahat akantha ba’na dibi’.
15 Kaenga’e ja’ lamba’ ba’na ekadunor oreng e Messer, pas epabebas bi’ GUSTE Allahna kalaban kakowadan se raja. Daddi ba’na bi’ Sengko’ eparenta’agi kaangguy araya’agi are Sabat.
16 Hormadi ban peyara rama ebuna; jareya Tang parenta, dhari GUSTE Allahna ba’na, sopaja ba’na taremtemma odhi’na ban lanjanga omor e nagara se bi’ Sengko’ ebagiya ka ba’na rowa.
17 Ja’ mate’e oreng.
18 Ja’ azina.
19 Ja’ co’-ngeco’an.
20 Ja’ aberri’ kasakseyan se lecek parkara oreng laen.
21 Ja’ terro ka dhi’-andhi’na oreng laen: bengkona, tanana, binena, nor-dunorra, ebinna, hemarra otaba apa’a bai andhi’na oreng laen jareya.’
22 Jareya papakon dhari PANGERAN ka ba’na e bakto ba’na akompol e gunong. E bakto Salerana abu-dhabu, sowarana se agarudhu’, dhari dhalem apoy ban ondhem, PANGERAN jareya apareng papakon se buru jareya, banne laenna. Papakon jareya bi’ Salerana laju eserrat e papan bato sarta laju eparengngagi ka ba’na."
23 "E bakto gunong jareya rabbang kabbi ban ba’na ngedhing sowara dhari papetteng, la-kapala sukuna ba’na ban pin-pamimpinna padha entar ka sengko’ kabbi.
24 Ca’na reng-oreng jareya, ‘GUSTE Allah ampon noduwagi kaagunganna sareng kamolja’anna e bakto abdina sadaja mereng Salerana abu-dhabu dhari apoy ka’dhissa’. Are mangken abdina sadaja padha nyaksene ja’ manossa gi’ bisa odhi’ terros sanare Allah ampon abu-dhabu ka aba’na.
25 Namong aponapa abdina sadaja me’ gi’ kodu abandha’a nyaba pole? Dhaggi’ tanto padha mate ekello’ apoy se raja nako’e ka’issa’. Abdina yakin tanto mate manabi mereng Allah abu-dhabu pole.
26 E ka’dhimma badha manossa se gi’ paggun odhi’ saamponna mereng Allah se odhi’ abu-dhabu dhari apoy?
27 Daddi panjennengngan saos meyos ka ka’issa’, peyarsa’agi ponapa se edhabuwagi GUSTE Allah, pas panapa’ ka abdina sadaja pa-ponapa se edhabuwagi GUSTE Allah ka panjennengngan. Abdina sadaja merengngagiya sareng ngestowagiya sadajana.’
28 E bakto meyarsa jareya, PANGERAN adhabu ka sengko’, ‘Sengko’ la ngedhing apa se ekoca’agi bangsa jareya, ban oca’na jareya pajat bendher.
29 Ja’ sakenga reng-oreng jareya ros-terrosan apangrasa kantha jareya! Ja’ sakenga reng-oreng jareya ros-terrosan ngargai Sengko’ ban ngestowagi sakabbinna Tang parenta, sampe’ reng-oreng jareya kabbi sana’potona odhi’ nyaman salanjangnga.
30 Kassa’ reng-oreng jareya soro abali ka kemahna bang-sebang.
31 Tape ba’na Mosa, abali dha’ enna’, neng ban Sengko’, Sengko’ magiya sakabbinna Tang hokom ban Tang parenta. Ajarragi ka bangsana ba’na, sopaja eestowagi e nagara se bi’ Sengko’ ebagiya ka reng-oreng jareya.’
32 Tan-taretan, estowagi sabarang se la edhabuwagi GUSTE Allah ka ba’na jareya. Ja’ sampe’ badha papakon jareya se bi’ ba’na ta’ etoro’.
33 Jalannagi sabarang se epakonnagi GUSTE Allah ka ba’na me’ olle ba’na nyaman odhi’na ban ngenneng neptep e nagara se bakal ekennengngana ba’na rowa."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA