Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Mosa pas meyos dhari tana Mo’ab ongga ka Gunong Nebo, ka konco’na Gunong Pisga e temorra Yerikho. E jadhiya bi’ PANGERAN salerana eduduwi sakabbinna nagara jareya, iya areya: baba kakobasa’anna Gileyad ka dhaja sampe’ gan kottha Dan;

² sakabbinna baba kakobasa’anna Naftali; baba kakobasa’anna Efraim ban Manasye, baba kakobasa’anna Yehuda ka bara’ sampe’ gan Tase’ Tengnga;

³ bagiyan lao’na Yehuda ban tana lapang se abates dhari Zowar sampe’ ka Yerikho, kottha se bannya’ bungkana kormana.

⁴ Dhabuna PANGERAN ka Mosa, "Areya’ nagara se bi’ Sengko’ ejanjiyagi ka Ibrahim, Ishak ban Yakub, se ebagiya ka na’ potona. Bi’ Sengko’ ba’na epanangaleyana, Mosa, tape ta’ ebagiya maso’ dha’ essa’."

⁵ Mosa, abdina PANGERAN jareya, pas seda e nagara Mo’ab, menorot se edhabuwagi PANGERAN.

⁶ Bi’ PANGERAN Mosa esareyagi e tana Lemba Mo’ab, se addhep ka kottha Bet-Peyor, tape sampe’ sateya tadha’ oreng se taowa e dhimma pasareyan jareya.

⁷ E bakto pasedana, Mosa yuswana saratos dhu polo taon; kakowadanna gi’ paggun ban socana gi’ terrang.

⁸ E tana lapang Mo’ab bangsa Isra’il nangese Mosa ban noduwagi kasossa’anna sampe’ tello polo are abidda.

⁹ PANGERAN apareng kabicaksana’an se talebat rajana ka Yusak pottrana Nun sabab bi’ Mosa la epele epadaddi gantena. Bangsa Isra’il ta’at ka Yusak ban ngestowagi kon-papakonna PANGERAN se eparengngagi ka bangsa Isra’il jareya kalaban parantara’anna Mosa.

¹⁰ E Isra’il tadha’ pole nabbi akantha Mosa se abu-dhabu dhep-adhebban bi’ PANGERAN.

¹¹ Tadha’ nabbi laenna se mabadha jat-mo’jijat ban kaajiban-kaajiban akantha se elampa’agi Mosa ka nagara Messer, ka ratona ban ka ja-pangrajana, menorot se edhabuwagi PANGERAN.

¹² Tadha’ nabbi laen se alampa’agi lalakon se hebat akantha se elampa’agi Mosa e adha’anna reng-oreng Isra’il.

Ulangan

Video Ulangan 34

Ikuti Kami:

KONTAK | PARTISIPASI | DONASI