Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 On ma pasu-pasu, na pinasu-pasuhon ni si Musa, halak ni Naibata, hubani halak Israel, i lobei ni parmateini.
2 Nini ma, “Roh do Jahowa hun Sinai, anjaha poltak hun Seir bani sidea, marsinalsal do Ia hun Dolog Paran, anjaha roh do Ia hun tongah-tongah ni halak na mapansing marribu-ribu, rap pakon apuy na gajak bani tangan-Ni siamun.
3 Tongon, holong do uhur-Ni mangidah sagala bangsa; sagala na mapansing-Ni ibagas tangan-Ni do, hundul do sidea i lambung ni nahei-Mu, anjaha jumpahan podah humbani hata-Mu.
4 Si Musa do manonahkon banta titah, gabe rupei ni kuria ni si Jakob.
5 Gabe raja do Ia i Jerusalem, sanggah martumpu pangintuai ni bangsa in, rap pakon sagala marga ni Israel.
6 Sai manggoluh ma si Ruben, ulang ma matei, tapi otik ma bilangan ni jolma bani.
7 Anjaha sonon do nini pasal si Juda, “Tangihon ma alo Jahowa sora ni si Juda, anjaha boan ma ia mulak hubani bangsani. Marhitei tangan-Mu itinggilhon Ham ma partinggilanni, anjaha hasomanan-Mu do sidea mangimbang munsuhni.”
8 Anjaha pasal si Levi, nini do, ʻTummim pakon Urim-Mu ma bani dalahi haudungan ni uhur-Mu, na dob nilajou-Mu i Massa, na dob pinartinggilhon-Mu bani Bah Meriba.ʼ
9 Na mangkatahon pasal bapani pakon inangni seng parduli ahu bani sidea. Seng ipatanda-tanda saninani anjaha seng ipabotoh-botoh anakni. Ai sidea do na mandalankon hata-Mu, anjaha na manramotkon padan-Mu.
10 Maningon sidea do mangajarhon uhum-Mu bani si Jakob, pakon titah-Mu bani Israel, sidea do na manutung dahupa sianggohon ni igung-Mu, anjaha mangampeihon galangan situtungon bani anjapanjap-Mu.
11 Pasu-pasu ma, ale Jahowa, gogohni, anjaha harosuhkon ma horja ni tanganni; ponggolhon ma binongei ni na mangimbangsi, age halak na mangkagigihonsi, ase ulang boi sidea jongjong.
12 Pasal si Benjamin, nini do, “Haudungon ni Jahowa, marianan do marsonang-sonang i lambung-Ni; sai lingodan-Ni do ia siap arian, anjaha marianan do ia i holangkolang ni raboyon-Ni.”
13 Anjaha pasal si Josep, nini do, ʻSai jumpahan pasu-pasu ma tanohni humbani Jahowa, binahen ni sulur ni sibere-bere na hun langit, binahen ni namur, pakon binahen ni bah, na marburak-burak i toruh;
14 pakon binahen ni surung ni sibere-bere na humbani mata ni ari, ampa buah na matoras, majenges humbani bulan;
15 humbani dolog-dolog na basaia na gijang, ampa humbani buntu-buntu sadokah ni dokahni;
16 binahen ni surung ni panumpak ni tanohni pakon hinagokni, pakon idop ni uhur ni na marianan ibagas naporon.” Sai sogop ma ai bani ulu ni si Josep, pakon bani ulu ni na tarpilih humbani saninani!
17 Marmulia do bunga tubuh ni lombuni anjaha tandukni songon tanduk ni horbou; duguonni ma marhitei ai buei bangsa, ganup sidea, das hu ujung ni tanoh on; in ma halak na marlaksa-laksa humbani Efraim, in ma halak na marribu-ribu humbani Manase.
18 Anjaha pasal Sebulon, nini do, “Marmalas ni uhur ma ham, ale Sebulon, bani parbingkatmu, pakon ham, ale Isasar ibagas lampolampomu.”
19 Diloon ni sidea do buei bangsa hu dolog ni sidea, galangkonon ni sidea do ijai galangan hapintoron, ai onsopan ni sidea do habayakon ni laut, pakon arta na ponop ibagas horsik.
20 Anjaha pasal si Gad, nini do, “Pinuji ma Ia, na pabolag ianan bani si Gad. Manggompang do si Gad songon singa boru-boru, iparsilbak do tangan pakon sarib-sarib ni ulu.”
21 Ipilih do sijengesan humbani tanoh ai bani, ai ijai do ponop bagian ni puanglima; dob ai roh ma ia hubani pambobai ni bangsa ai, anjaha idalankon ma hapintoron ni Jahowa pakon uhumni rap pakon Israel.
22 Anjaha pasal si Dan, nini do, “Singa na poso do si Dan, na roh luar hun Basan.”
23 Anjaha pasal si Naftali, nini do, ʻBosuran do si Naftali bani rosuh ni uhur, anjaha gok pasu-pasu ni Jahowa bani, tao pakon tanoh dangsina ia simadasi.”
24 Anjaha pasal si Asser, nini do, ʻPinasu-pasu do si Asser i tongah-tongah ni anak dalahi, sai harosuh ni saninani ma ia, anjaha sornopkononni ma naheini hubagas minak.
25 Bosi pakon tombaga ma ransang-ransangmu; anjaha songon ari-arimu, sonai ma hagogohonmu.”
26 Seng dong na songon Naibata, alo Jesurun, na margareta i langit laho mangurupi ham, anjaha ibagas habanggalonni i atas ni hombun na gijang.
27 Naibata sisadokah ni dokahni do haporusan bamu, anjaha i tongah-tongahmu do tangan-Ni na manongtong in. Ia do na mangusir munsuhmu hun lobeimu, anjaha nini do, “Siapkon!”
28 Jadi marsonang-sonang ma Israel marianan, anjaha parigi ni si Jakob seng hona parseda, bani tanoh na gok omei pakon anggur, anjaha langitni mambere namur.
29 Tuahmu in alo Israel! Ise ma na songon ham, sada bangsa na pinaluah ni Jahowa, gantar ni haluahonmu, pakon podang ni hatimbulonmu. Maningon mangunduk bamu munsuhmu, anjaha dogeihononmu naheimu bani ianan-Ni na gijang in.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA