Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Lalang tenanapa namate, Musa, tunisuroNa Allata’ala, nabarakkaki bansa Israel siagang kana-kana kamma anne:
2 "Niaki Batara battu ri Moncong Sinai; ammumba ri tompo’na Edom rapang allo. Battu ri Moncong Parangi ammumba untu’ ansingari bansaNa. Nirurungang ri sampulo sa’bu malaeka’; a’rinra pepeka ri sa’ri kananNa kamma kila’.
3 Nakarimangngi Batara bansaNa, Nala’langngi taunNa. Umba kisu’ju’ ri dallekang bangkenNa siagang mannuruki ri parenta-parentaNa.
4 Nituruki hukkung napassareanga Musa, barang kaminang tinggia anggaranna ri bansaya anne.
5 Ri wattu asse’rena Israel siagang pamimpinna, Batara a’jari Karaeng mae ri umma’Na."
6 Ri sesena suku Ruben, nakana Musa, "Dasi-dasi tenanniakka napanra’ suku Ruben, manna nasike’de’ja taunna."
7 Ri sesena suku Yehuda nakana: "O, Batara, Kipilangngeri ke’nanga punna makkio’, sollanna asse’re ke’nanga siagang suku maraenga. Kibantui ke’nanga barjuang angngewai musunna ri parang pa’bundukanga."
8 Ri sesena suku Lewi nakana: "Lanri Urim siagang Tumim na’nyata erotTa, tete ri tu Lewi, ata tamamminraTa. Kiso’ri ke’nanga ri Masa, a’gea’ siagang ke’nanga ri bungung Meriba.
9 Tamamminrayai ri Katte la’biangngang namaraengannaya, la’biangngang na tau toa siagang bija pammanakanna. Naturuki ke’nanga parenta-parentaTa, narupai ke’nanga parjanjianTa.
10 Naajaraki ummatTa anturuki hukkunTa, siagang assare koro’bang irate ri tampa’ pakkoro’bangnganTa.
11 O Batara, Kitulungi anne sukua sollanna kassa’, sollanTa sannang mae ri apa nagaukanga ke’nanga. Ancuruki sikontu musunna ke’nanga; panraki sa’genna satunggu-tungguna."
12 Ri sesena suku Benyamin nakana: "Iaminne suku Nakarimangngia Batara. Nala’langngi allo bangngi; ammantangi Batara ri tangnga-tangngana ke’nanga."
13 Ri sesena suku Yusuf nakana: "Dasi-dasi nanibarakkaki buttana ke’nanga ri Batara ri je’ne’ battu rawa ri butta siagang bosi.
14 Dasi-dasi nakala’biang ri rappo-rappoang punna narapi’ wattunna, rappo kaminang bajika, ti’noka ri poko’-poko’na.
15 Dasi-dasi naanjo bulu’-bulu’na battu ri jammang riolo rassi rappo-rappoang kaminang bajika.
16 Dasi-dasi na’bicara Batara battu ri rompo’ a’rinraya, Nabarakkaki buttana sa’genna kala’biang. Anne barakkaka untu’ Yusuf siagang jari-jarina, Yusuf ammimping ri sikamma sari’battanna.
17 Rapangi sapi romanga kassa’na Yusuf, assa’bu tu Manasye siagang Efraim a’jari tanru’na. Naulaki bansa-bansaya naondang ke’nanga sa’genna cappa’na linoa."
18 Ri sesena suku Zebulon siagang Isakhar nakana: "Dasi-dasi nakkalumanynyang Zebulon lanri a’danggang ri tamparang, nakatambang kalumanynyanna Isakhar ri bori’ paranglakkenna.
19 Nabirittai bansa maraenga nai’ ri monconna ke’nanga; koro’bang sitojennaya napassareang ke’nanga anjoreng. Battu ri tamparangi anggappa pa’barang-barangngang ke’nanga, battu ri tambunna kassika nagappa ke’nanga."
20 Ri sesena suku Gad nakana: "Nipujimi Allata’ala le’baka assarei Gad butta luaraka untu’ napammantangngi. Attayangi Gad rapang sikayu singa eroka angkakkaraki salanggaya siagang ulua.
21 Naallei butta kaminang bajika untu’ nakammai, bageanna pimpinanga nipassareang mae ri ke’nanga. Naturuki hukkunNa Batara, kammayatompa sikontu parentaNa, ri wattunna sirapakkang sikontu pamimpinna Israel."
22 Ri sesena suku Dan nakana: "Rapang sikayu singa rungka, iaminjo suku Dan. a’lumpa’ assulu’ battu ri Basan."
23 Ri sesena suku Naftali nakana: "Naftali nipilumpai barakka’ pangngamaseang ri Batara; daerana battu ri Tamparang Galilea sa’genna timboro’."
24 Ri sesena suku Asyer nakana: "Battu ri sikontu suku Israel suku Asyer kaminang nibarakkaki. Iami nisayang ri sikamma sari’battanna attimboi poko’ zaitunga ri buttana.
25 Nila’langngi pakke’bu’ lompo tambaga siagang bassi kota-kotana sollanna tuli salewangang tojeng-tojeng lalang tallasa’na."
26 "E, Israel, parallui nuasseng angkanaya, la’biangngangi Allata’ala kala sikontu rewataya. Nalaloi langika lalang kala’biranNa natarrusuki rammanga untu’ antulung ngasengko.
27 Allata’ala latuli angngalleiko; limanNa mannannunganga a’jari pattumpa’nu. Nabongkai musua battu ri dallekannu, Nasuroko angngancuruki sikontu balia.
28 Jari-jarina Yakub laamangi tallasa’na, salewangang ri pa’rasangang ga’gaya alla’bi gandunga siagang je’ne’ anggoroka allung battu ri langi’ ambasai buttaya.
29 E, Israel, tamaka lompona upa’nu, tena bansa maraeng nipasalama’ sangkamma ikau. Batara rapang sele’nu siagang pa’dannu, Naalleangangko siagang Nasareko pammetang. Labattui musunnu appala’ a’mase-mase, nalanuonjo’-onjokang ke’nanga."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA