Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Adi nggo ikuasaindu negeri si ibereken TUHAN Dibatandu man bandu janah nggo kam ringan i je,
2 tep-tep iperanindu jumandu, bagin si pemena si iperanindu arus itamakendu ku bas sumpit, jenari arus ibabandu ku ingan ersembah si sada e.
3 Dahilah imam si sanga erdahin i bas paksa si e, janah kataken man bana, 'Ngaku aku man TUHAN Dibatangku maka nggo aku bengket ku negeri si IpadankenNa man nini-nini kami maka IberekenNa man kami.'
4 Ialoken imam sumpit si babandu e, iamparkenna i lebe-lebe batar-batar persembahen TUHAN Dibatandu.
5 Kenca bage arus ibelaskenndu kata-kata enda i lebe-lebe TUHAN, 'Nini-niningku eme bangsa Aram, kalak perlajang, kalak si la lit tetap inganna tading, si mbaba keluargana ku Mesir. Sanga e sitik ngenca beliganna, tapi dungna ia jadi bangsa si mbelin ras megegeh.
6 Kejam kal perbahanen bangsa Mesir man kami, ipaksana kami erdahin jadi budak.
7 Dungna serko kami mindo penampat man TUHAN, Dibata nu nini-nini kami. Ibegi TUHAN perserko kami, IdahNa kiniseran, kelatihen, ras kesuhsahen kami.
8 Alu GegehNa si mbelin IpulahiNa kami i Mesir nari. IlakokenNa tanda kuasa, IbanNa kejadin-kejadin si mejin.
9 IbabaNa kami i jah nari ku jenda, IberekenNa man kami negeri si mehuli ras mehumur enda.
10 Emaka genduari kubaba man TUHAN, bagin si pemena i bas ulih juma si nggo IberekenNa man bangku.' Kenca bage amparken sumpit e i adep-adepen TUHAN janah ersembahlah kam i je.
11 Ermengkahlah atendu kerna kerina si mehulina si ibereken TUHAN Dibatandu man bandu ras man keluargandu. Bere maka kalak Lewi ras kalak pertandang pe ikut ras kami i bas pesta si meriah e.
12 Tiap tahun peteluken bereken persembahen persepuluhenndu, eme sepersepuluh i bas ulih jumandu, man kalak Lewi, kalak pertandang, anak-anak melumang, ras man diberu balu-balu, maka i bas tep-tep perpulungen bias nakan si iperlukenna. Kenca nggo ibandu bage,
13 kataken lah man TUHAN, 'Lanai lit tading persembahen persepuluhen e i bas rumahku erkiteken nggo kubereken e man kalak Lewi, kalak pertandang, anak-anak melumang, ras man diberu balu-balu rikutken si IperentahkenNdu maka kulakoken e. La kusimbak, ras la aku lupa sada pe perentah-PerentahNdu kerna persembahen persepuluhen e.
14 Sanga aku erceda ate pe labo e kupan. Sanga aku la bersih rikutken peraturen agama pe labo sitik pe kubaba persembahen persepuluhen e ndarat i bas rumahku nari. La kubereken sitik pe man persembahen kalak mate. Nggo kuikutken kam o, TUHAN. Nggo kulakoken kerina PerentahNdu kerna persembahen persepuluhen e.
15 Nehenlah ku teruh i bas inganndu si badia nari i Surga janah pasu-pasulah bangsandu Israel. Bereken pe pasu-PasuNdu man negeri si dem kebayaken ras mehumur enda sue ras si IpadankenNdu man nini-nini kami.'"
16 "I bas wari enda TUHAN Dibatandu merentahken kam ngikutken kerina undang-UndangNa; emaka ikutkenlah alu tutus ras alu bulat ukurndu.
17 I bas wari enda nggo iakuindu TUHAN jadi Dibatandu. Nggo kam erpadan ngikutken Ia, make kerina undang-UndangNa, ras ngikutken kerina perentah-PerentahNa.
18 I bas wari enda nggo ialoken TUHAN kam jadi BangsaNa, sue ras si IpadankenNa man bandu, janah IperentahkenNa kam ngikutken kerina undang-UndangNa.
19 IjadikenNa kam jadi sada bangsa si belinen asang kerina bangsa-bangsa si deban si nggo IjadikenNa, janah arah kam GelarNa terpuji dingen ermulia. Kam jadi BangsaNa sue ras si IpadankenNa."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA