Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Ebara’ angkana ri anjo pa’rasangang Napassareanga Karaeng Allata’alanu nia’ tau nigappa mate nibuno ri kokoa nampa taniassenga angkana inai ambunoi.
2 Musti a’lampai pamimpinnu siagang hakinnu mange angngukkuruki angkana siapa bellana anjo tampa’na nigappa mayaka mange ri kota-kota ambania.
3 Nampa sikamma tau-tau toana anjo kota kaminang a’reppeseka, musti ammilei sikayu sapi rungka ia tenayapa nale’ba’ nipake anjama.
4 Anjo sapia musti naerangi ke’nanga mange ri tampa’ ambania ri binangaya ia tenaya nale’ba’ kalotoro’ siagang tenayapa nale’ba’ nipa’jeko yareka nilamungi buttana. Anjoreng musti natepoki ke’nanga kallonna anjo sapia.
5 Sikamma imang tu Lewia musti a’lampa tongi mange anjoreng ri tampaka, lanri musti assarei ke’nanga kaputusang lalang sikamma parkara katerassanga. Nipilei ke’nanga ri Karaeng Allata’alanu untu’ ampare’ atai kalenna mae ri Batara, siagang ampabattui kana-kana barakkaka lalang arenNa Batara.
6 Nampa sikontu tau-tau toana anjo kota kaminang ambania, musti nabissai limanna irateanna anjo sapia
7 na nakana, ‘Teai ikambe ambunoi anjo taua, siagang tanaassengai ikambe angkana inai ambunoi.
8 O, Batara, Kipammopporangi Israel ummatTa Kilappassanga battu ri Mesir. Kipammopporangi ikambe, siagang teaKi’ naikambe Kibattalli ri passabakkang nibunona anne tau tenaya nasala.’
9 Jari, lanri nugaukanna apa Natuntuka Batara, teaimi ikau nibattalli ri passala’na anjo pammunoanga."
10 "Punna a’bundukko siagang Nasareko pammetang Karaeng Allata’alanu, nampa angngalleko tau nitahang,
11 nakulle kapang nia’ ri anjo ke’nanga baine ga’ga na nungai siagang erokko ambaineangi.
12 Erangi anjo bainea mae ri balla’nu. Anjoreng ri balla’nu musti nagoncingi uu’na siagang nato’baki kanukunna,
13 kammayatompa nasambei pakeanna. Musti ammantangi ri balla’nu siagang nakasusangi kamateanna tau toana lalang sibulang. Punna le’baki anjo akkulle mako a’bunting siagang ia.
14 Punna ri bokoang allo natenamo nuero’ ri ia, akkullei nusuro a’lampa siagang laluasa. Takkulleai nupare’ kamma ata yareka takkulleai nubalukang, lanri le’ba’mi nupassa angngagangko sikatinroang."
15 "Ebara’ angkana nia’ tau rua bainenna. Rua-ruai allassukang ana’ bura’ne, mingka ana’ lassu’ rioloa teai ana’ battu ri baine nakamaseanna anjo taua.
16 Punna ero’ anjo taua ampattantui antekamma batena lambagei pa’barang-barangnganna mae ri ana’-ana’na, takkulleai battala’ siali mae ri ana’ battua ri baine nakamaseanna nanasare anjo anaka bageang siratannaya musti nipassareangi mae ri ana’ toaya.
17 Musti nasarei bageang a’lappi rua battu ri pa’barang-barangnganna mae ri ana’ bura’ne toaya, manna pole naanjo anaka teai ana’ battu ri baine nikamaseanna. Ha’na ana’ toaya musti niakui ri manggena, siagang anjo ana’ toaya musti nisarei warisang a’jaria’ ha’na situru’ hukkunga."
18 "Ebara’ angkana nia’ ana’ bura’ne kapala batu, nangai angngewaya siagang taerokai mannuruki ri tau toana manna pole nale’ba’mo nihukkung ri tau toana.
19 Anjo tau toana musti naerangi anjo ana’ kammaya mae ri sikamma tau-tau toana anjo kota napammantangngia ke’nanga sollanna niadeli anjo anaka.
20 Musti nakana ke’nanga mae ri sikamma tau-tau toana anjo kotaya, ‘Anne ana’na ikambe kapala batui, nangai angngewaya siagang taerokai mannuruki ri kambe; nangai appa’labo-laboa doe’ siagang nangai angnginunga inungang terasa’ sa’genna nasa’ring.’
21 Nampa tu bura’ne niaka ri anjo kotaya musti nasambilai anjo anaka siagang batu sa’genna mate. Kammaminjo caranu ampaccappuki kaja’dallang kammaya anjo. Sikamma tu Israelka lanalangngereki kabara’na anjo kajarianga siagang a’jari malla’mi."
22 "Punna nia’ tau le’ba’ nihukkung mate lanri a’gau’ ja’dala’na, siagang nigentungi maya’na ri se’reang benteng,
23 anjo mayaka takkulleai niboli’ anjoreng sila’busu’ bangngi, mingka musti nitarawang memangi anjo wattua. Maya’ ammantanga ta’gentung ri bentenga appabattui pattunra battu ri Allata’ala mae ri anjo pa’rasanganga. Jari, tarawangi anjo mayaka sollanna tena nara’massi pa’rasangang Napassareanga Karaeng Allata’alanu mae ri kau.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA