Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Mon e nagara se eparengngagiya ka ba’na bi’ GUSTE Allahna jareya badha oreng se etemmo mate epate’e oreng e teggal ban ta’ etemmo sapa se mate’e,
2 pamimpin ban hakimma ba’na kodu ngokor jauna dhari kennengnganna mayyit se etemmo jareya ka tha-kottha e ma’-semma’na.
3 Para pamimpinna kottha se paleng semma’ pas kodu mele sape settong se gi’ ngodha se gi’ ta’ tao eangguy alalakon.
4 Sape jareya kodu egiba ka settong kennengngan e seddi’na songay se ta’ tao kerreng ban se tanana ta’ tao esalaga otaba emen-tamenne. E jadhiya para pamimpinna kottha gella’ kodu mapotong le’erra sape jareya.
5 Para imam Lewi kodu ka jadhiya keya, sabab mam-imam jareya kodu motose saneyap parkara kakerrasan. Mam-imam jareya la epele GUSTE Allah epangabdi ka Salerana ban epangoca’a berkat kalaban asmana.
6 Para pamimpinna kottha se paleng semma’ kodu maccowe tanangnga e attasanna sape jareya
7 sambi ngoca’, ‘Banne abdidalem se mate’e oreng ka’dhissa’, ban abdidalem ta’ oneng pasera se mate’e.
8 GUSTE, kasokana Junandalem nyapora Isra’il, ommattepon Junandalem se sareng Junandalem ampon epabebas dhari Messer. Nyo’ona sapora abdidalem, GUSTE, sarengngan ja’ okommagi bangsa abdidalem lantaran eanggep se kodu nanggung okoman lantaran badha oreng mate’e oreng se ta’ gadhuwan sala ka’dhinto.’
9 Mon ba’na ngalakone se epakonnagi PANGERAN jareya, ba’na ta’ kera eanggep kodu nanggung okoman lantaran badha oreng se ta’ sala epate’e oreng jareya."
10 "Mon ba’na aperrang ban eparenge kamennangan bi’ GUSTE Allahna, ban ba’na pas ngeba tawanan perrang,
11 e antarana tawanan jareya olle daddi badha babine’na se raddin se ekaterrowe ba’na.
12 Giba babine’ jareya ka bengkona ba’na. E jadhiya gunteng obu’na, ban ketthok kokona,
13 sarta salene kalambina. Babine’ jareya kodu neng e bengkona ba’na, pas kodu noduwagi kasossa’anna sabulan abidda polana oreng towana se mate. Saellana jareya babine’ buru olle kabine ba’na.
14 Mon e budhi are ba’na la ta’ endha’ pole ka babine’ jareya, olle soro nyengga sakarebba. Babine’ jareya ta’ olle epakantha dunor otabana ejuwal, sabab la epaksa apolong tedhung ban ba’na."
15 "Saompamana badha oreng andhi’ bine kadhuwa, ban se kadhuwa jareya padha andhi’ ana’ lalake’, tape ana’ se lahir kaadha’ banne ana’na binena se ekaleburi.
16 Mon oreng jareya nantowagiya baramma se magiya dhi’-andhi’na ka na’-ana’na, oreng jareya ta’ olle pele kase ka ana’na binena se ekaleburi, iya areya magi ka kana’ jareya sabarang se daddi ha’na ana’ sareyangnga.
17 Ana’ lake’ sareyangnga kodu eberri’i bagiyanna dhi’-andhi’na se bannya’na dhu kalena, maskeya kana’ jareya banne ana’na binena se ekaleburi. Ha’na ana’ sareyang jareya kodu eakowe bi’ eppa’na, ban kana’ jareya kodu eberri’i sangkolan se daddi ha’na menorot hokom."
18 "Ompamana badha ana’ lalake’ se cengkalan, dujan alaban sarta ta’ endha’ atoro’ ka oreng towana maske bi’ oreng towana la eberri’ okoman.
19 Kana’ jareya bi’ oreng towana kodu egiba ka para pamimpinna kottha se ekennengnge, ban menta sopaja kana’ jareya eadili.
20 Oreng towana jareya kodu ngoca’ kantha reya ka para pamimpinna kottha jareya, ‘Ana’ kaula paneka cengkal, dujan alaban sareng ta’ poron toro’ oca’ ka kaula; dujan matadha’an pesse sareng dujan bu’-mabu’an.’
21 Saellana jareya lalake’an e kottha jareya kodu agarujuk kana’ jareya pasampe’ mate. Kalaban cara se kantha jareya ba’na matadha’ kajahadan se kantha jareya. Oreng Isra’il bakal padha’a ngedhing parkara kadaddiyan jareya ban pas daddi tako’."
22 "Mon oreng la eokom mate polana kajahadanna, ban mayyidda agantong e cangga,
23 mayyit jareya ta’ olle dina agantong e jadhiya samalem benteng, tape kodu ekobur e are jareya keya. Mayyit se egantong e cangga madhateng babaston dhari Allah ka nagara e jadhiya. Daddi koburragi mayyit jareya sopaja ba’na ta’ macemmer nagara se eparengngagi ka ba’na bi’ GUSTE Allahna.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA