Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ "Pettong taon sakaleyan, pateppa’ ka aher taon, ba’na kodu matadha’ otangnga reng-oreng se andhi’ otang ka ba’na.

² Carana kantha reya. Saneyap oreng Isra’il se maenjam pesse ka oreng sabangsana, kodu matadha’ otang jareya, sabab menorot potosanna PANGERAN dibi’ otang jareya kodu epatadha’, daddi ta’ olle etagi pole.

³ Ba’na olle nagi pesse se epaenjam ka oreng manca, tape ta’ olle nagi pole pesse se epaenjam ka oreng sabangsana dibi’.

⁴ Ba’na bakal eberkadana bi’ GUSTE Allahna e nagara se eparengngagi ka ba’na jarowa. Ta’ kera badha oreng sabangsana ba’na se mesken,

⁵ sokor ba’na ta’at ka GUSTE Allahna pagu-onggu ajalannagi sabarang se bi’ sengko’ eparenta’agi ka ba’na are teya reya.

⁶ Ba’na bakal eberkadana bi’ GUSTE Allahna menorot se la ejanjiyagi Salerana. Ba’na bakal maenjama pesse ka sa-bangsa se sabannya’na tape ba’na dibi’ ta’ kera ngenjam; bakal bannya’a sa-bangsa se ekobasa’ana ba’na tape ta’ kera badha bangsa laen se ngobasa’ana ba’na.

⁷ Mon ba’na la ngennengnge nagara se eparengngagi GUSTE Allahna rowa, pas badha oreng sabangsana ba’na se kakorangan e sala settonga kotthana ba’na, ba’na ja’ mekkere aba’na dibi’ malolo ban kodu endha’ aberri’ partolongan ka oreng jareya.

⁸ Sabaligga, ba’na kodu palamba’ atena, paenjame oreng jareya menorot bannya’na se ekaparlo.

⁹ Ja’ sampe’ ba’na ta’ endha’ aberri’ enjaman ka oreng jareya kalaban alasan ja’ taon palebbaranna otang la para’. Ja’ sampe’ ba’na andhi’ pekkeran se juba’ kantha jareya. Mon ba’na ta’ endha’ aberri’ enjaman, oreng jareya bakal aserrowa ka PANGERAN abadullagi ba’na, ban ba’na bakal enyata’agiya sala.

¹⁰ Berri’i oreng jareya bi’ ate se senneng tor ehlas, sopaja GUSTE Allah aberkadana sakabbinna usahana ba’na.

¹¹ E antarana oreng Isra’il masthe ros-terrosan badha oreng se mesken ban kakorangan, daddi sengko’ marenta’agi ka ba’na sopaja lamba’a atena ka reng-oreng jareya."

¹² "Mon badha oreng sabangsana ba’na, lalake’ otaba babine’, se ajuwal aba’na daddiya dunorra ba’na, oreng jareya kodu alako ka ba’na nem taon abidda. Mon la lebat se nem taon, oreng jareya kodu epabebas.

¹³ Dunor se epabebas jareya ta’ olle epaondur ta’ kalaban epagibai pa-apa.

¹⁴ Palamba’ atena ba’na, berri’i dunor jareya sabagiyan dhari sabarang se etarema ba’na dhari GUSTE Allahna, iya areya embi’ ban dumba, gandum ban aeng anggur.

¹⁵ Kaenga’e ja’ ba’na lamba’ daddi dunor e Messer, pas epabebas bi’ GUSTE Allahna; jareya sababba sengko’ aberri’ parenta reya ka ba’na.

¹⁶ Tape mon dunor jareya ta’ endha’ ondur polana taresna ka ba’na ban ana’ binena sarta senneng apolong ban ba’na,

¹⁷ giba dunor jareya ka labangnga bengkona ba’na, pas lobange kopengnga, oreng jareya pas daddi dunorra ba’na saomorra. Dunor bine’na ba’na kodu pakantha jareya keya.

¹⁸ Mon ba’na mabebas dunorra, ja’ andhi’ ate peggel, sabab la nem taon abidda oreng jareya alako ka ba’na kalaban opa saparona opana bareng. Lakone parenta reya, sopaja ba’na bi’ GUSTE Allahna eberkadi e dhalem sakabbinna usahana."

¹⁹ Budhu’na sape ban dumba lake’ se lahir dha’-adha’ kodu eatorragi ka GUSTE Allah. Sape jareya ta’ olle angguy ananggala, ban dumba jareya ta’ olle cokor.

²⁰ Sabban taon ba’na ban ana’ binena kodu ngakan dagingnga e ajunanna GUSTE Allah, e kennengngan se la epele PANGERAN.

²¹ Tape mon ebin jareya ena, ompamana dippang otaba buta otaba badha calena se raja laenna, jareya ta’ olle eatorragi ka GUSTE Allahna.

²² Saneyap oreng, se berse otaba se najjis, olle ngakan dagingnga keban jareya e bengkona, akantha se ngakan dagingnga manjangan otaba keddang.

²³ Dharana ta’ olle kakan, tape kodu etotta’ ka tana epakantha aeng.

Ulangan

Video Ulangan 15

Ikuti Kami:

KONTAK | PARTISIPASI | DONASI