Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 "Tep-tep ujung tahun pepituken, sasapken lah utang kalak si rutang man bandu.
2 Bagenda perbahanenndu: Ise si minjamken duit man temanna kalak Israel, arus nasapken utang e. Arus maka la icubakenna pe mindosa sabap TUHAN jine nggo ngataken utang e isasapken.
3 Banci ipindondu utang kalak pertandang, tapi la banci ipindondu utang kalak si sada bangsa ras kam.
4 TUHAN si masu-masu kam i negeri si IberekenNa man bandu, emaka sada pe la lit kam kalak musil,
5 adi iikutkenndu Ia dingen alu tutus ngelakoken kasa kai si kuperentahken wari enda.
6 TUHAN si masu-masu kam rikutken si IpadankenNa. Ipinjamkenndu pe duitndu man melala bangsa-bangsa si deban, tapi la kam perlu minjam i bas bangsa si apai nari pe. Kam erkuasa nandangi melala bangsa-bangsa, tapi la lit sada bangsa pe si ngkuasai kam.
7 I bas kota-kota si ibereken TUHAN Dibatandu man bandu, adi lit i je sapih-sapih kam kalak Israel si kekurangen, ula kam nggeluh erbana-bana, tapi sampatilah ia.
8 Tapi melumbar lah, dingen berelah ia minjam asa si iperlukenna.
9 Ula tulak adi atena minjam man bandu, aminna pe tahun nasapken utang nggo ndeher. Ula kal pelepas perukuren si jahat e turah i bas ukurndu. Adi la kam nggit mereken pinjamen man bana, erlebuh ia ku TUHAN ngelawan kam emaka ipersalahken TUHAN kam.
10 Bereken man bana alu melumbar ras dem keriahen ukur, gelah ipasu-pasu TUHAN kam i bas kerina si idahikenndu.
11 Lit nge rusur kalak Israel si musil dingen si kekurangen, emaka kuperentahken man bandu maka melumbar kam man bana."
12 "Adi sekalak temanndu bangsa Israel, dilaki tah diberu, ndayaken bana man bandu jadi budak, arus ibebaskenndu ia kenca ia erdahin ras kam enem tahun. Kenca seh tahun si pepituken arus maka ibebaskenndu ia.
13 Sanga ia ibebaskenndu ula pelawesndu ia ngambe-ngambe.
14 Bereken lah man bana alu melumbar kai si nggo idatndu arah pemasu-masun TUHAN: biri-biri, gandum, anggur.
15 Inget lah maka kam pe nai budak nge i Mesir, tapi ibebasken TUHAN Dibatandu kam. Eme sabapna maka kubereken man bandu genduari perentah enda.
16 Tapi banci jadi budakndu e la nggit lawes. Banci jadi keleng atena nandangi kam ras keluargandu, puas akapna tading ras kam.
17 Adi bage babalah ia ku pintun rumahndu, tupuklah cupingna i je, alu bage ia nggo jadi budakndu kidekah geluhna. Bage ka lah perbahanenndu man budakndu si diberu pe.
18 Ula kam jungut-jungut adi ibebaskenndu budakndu, sabap nggo kap ia erdahin ras kam enem tahun dekahna dua kali lipat pendahinna asang kalak ngemo. Lakokenlah enda, maka ipasu-pasu TUHAN Dibatandu kam i bas kerina si idahikenndu."
19 "Serapkenlah man TUHAN Dibatandu asa kai jenggi lembu dingen bajar biri-biri si pemenana tubuh. Ula sada pe lembu enda ipakendu erdahin, ula sada pe biri-biri e iguntingndu mbuluna.
20 Tiap tahun ipanndulah e, kam ras keluargandu, i bas ingan ersembah si sada e i adep-adepen TUHAN.
21 Tapi adi rubia-rubia si iserapken e lit cacatna, umpamana pengkar, ntah pentang, ntah cacat si deban si mekelek, la banci ipersembahkenndu e man TUHAN Dibatandu.
22 Rubia-rubia si bage banci i rumah ipanndu. Kerina kam subuk si bersih ras lang rikutken aturen agama, banci manca desken pemanndu daging belkih ntah balua.
23 Tapi darehna ula pan, arus maka iamburkenndu ku taneh desken lau."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA