Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Semeton-semeton tiang! Side pade sampun nenaoq Hukum Taurat. Jari side pade nenaoq bahwe kekuasean hukum tipaq sopoq dengan berlaku cume sewaktu dengan nike idup.

² Misalne sopoq dengan nine saq bedowẽ semame, ie harus teriket lẽq hukum kance semamene saq masih idup. Laguq lamun semamene ninggal, dengan nine nike bẽbas lẽman hukum saq ngiket ie tipaq semamene.

³ Lamun dengan nine nike idup kance dengan mame lain sewaktu semamene masih araq, make dengan nine nike teparan bezinah. Laguq lamun semamene ninggal, make menurut hukum ie sampun bẽbas, dait lamun ie merariq malik kance dengan mame saq lain, make ie ndẽq bezinah.

⁴ Maraq nike ẽndah halne side pade, semeton tiang senamian. Side pade sampun ninggal tipaq Hukum Taurat langan rage Deside Isa Almasih dait jari dowẽ-Ne saq sampun teidupang malik lẽman ninggal. Deside Isa teidupang lẽman ninggal adẽq ite ngasilang buaq saq solah bagi Allah lẽq dalem idupte.

⁵ Sẽngaq, laẽq ite idup menurut kemẽlẽq awak saq bedose. Lẽq waktu nike kemẽlẽq nike timbul sẽngaq araq Hukum Taurat saq pengaruhin diriqte. Nike jari penyebap ite ngelaksaneang hal-hal saq jauq akibat kematẽan.

⁶ Laguq mangkin ite sampun tebẽbasang lẽman Hukum Taurat. Ite sampun ninggal umaq hukum saq laẽq nguasein ite. Ite ndẽq malik ngelayanin menurut hukum saq tetulis nike. Mangkin ite ngelayanin dalem keadaan saq baru dalem Roh Allah.

⁷ Lamun maraq nike, napi saq bau ite ucapang malik? Napi Hukum Taurat nike dose? Pasti ndẽq! Laguq setetune hukum nike saq ngajah tiang mengenai dose. Tiang ndẽq gen nenaoq napi artine melẽt nike, lamun ndẽq tebadaq siq hukum nike, "Ndaq melẽt."

⁸ Langan hukum nike, dose mauq kesempatan jari nimbulang macem-macem kemẽlẽq lẽq dalem atẽn tiang; sẽngaq lamun Hukum Taurat nike ndẽq araq, make dose ẽndah matẽ.

⁹ Laẽq tiang idup ndẽq kadu Hukum Taurat. Laguq sesampun araq prẽntah lẽman hukum nike dose mulai idup

¹⁰ dait tiang matẽ. Make prẽntah nike saq maksutne mule jari ngicanin idup malahan datengang kematẽan tipaq tiang.

¹¹ Sẽngaq langan prẽntah nike, dose bait kesempatan nipu dait nyematẽq tiang.

¹² Hukum Taurat nike suci dait sebilang prẽntah lẽq dalem hukum nike ẽndah suci, adil dait solah.

¹³ Mangkin, napi niki artine bahwe saq solah nike datengang kematẽan tipaq tiang? Pasti ndẽq! Dose nike saq datengang kematẽan tipaq tiang kadu saq solah nike, adẽq jari sayan nyate ẽndah kejahatan dose nike. Dait langan prẽntah-prẽntah nike sayan nyate berembẽ jahatne dose nike.

¹⁴ Sẽngaq ite nenaoq bahwe Hukum Taurat nike mengenai hal-hal saq berubungan kance roh; laguq tiang niki manusie siq kemẽlẽq awak saq bedose saq sampun tejual jari panjak dose.

¹⁵ Sẽngaq tiang mẽsaq ndẽq ngerti perbuatan tiang. Hal-hal saq melẽt tiang laksaneang nike, ndẽq tiang laksaneang; laguq hal-hal saq tiang meriq, malahan nike saq tiang laksaneang.

¹⁶ Mangkin lamun tiang laksaneang hal-hal saq betentangan kance kemẽlẽq tiang, nike artine tiang setuju bahwe Hukum Taurat nike solah.

¹⁷ Jari, setetune ndẽqne tiang saq ngelaksaneang nike, laguq dose saq nguasein diriq tiang.

¹⁸ Sẽngaq tiang nenaoq bahwe ndẽq araq sopoq juaq saq solah lẽq dalem diriq tiang; nike kemẽlẽq awak tiang saq bedose. Sẽngaq araq angen tiang piaq hal saq solah, laguq tiang ndẽq sanggup laksaneang.

¹⁹ Tiang ndẽq ngelaksaneang saq solah saq tiang melẽt laksaneang, laguq tiang ngelaksaneang hal-hal saq jahat, saq ndẽq mẽlẽ tiang laksaneang.

²⁰ Lamun tiang ngelaksaneang hal-hal saq ndẽq mẽlẽ tiang laksaneang, nike artine ndẽqne tiang saq ngelaksaneang hal-hal nike, laguq dose saq nguasein diriq tiang.

²¹ Jari, tiang ndait hukum niki: Lamun tiang mẽlẽ ngelaksaneang saq solah, make cume saq jahat doang saq timbul lẽman diriq tiang.

²² Mule batin tiang suke lẽq hukum Allah,

²³ laguq tiang sadar bahwe lẽq dalem bagian-bagian awak tiang araq ẽndah hukum lain saq pengaruhin tiang -- nike hukum saq ngelawan hukum akal budi tiang. Keranaq nike tiang teriket dalem hukum dose saq araq lẽq bagian-bagian awak tiang.

²⁴ Tiang manusie celake! Sai saq gen nyelametang tiang lẽman awak saq jauq tiang tipaq kematẽan niki? Syukur tipaq Allah! Langan Junjungante Saq Mulie Deside Isa Almasih. Jari, siq hukum akal budi tiang, tiang ngelayanin hukum Allah, laguq lẽman kemẽlẽq awak tiang saq bedose, tiang ngelayanin hukum dose!

²⁵ (7:24)

Roma

Video Roma 7

Ikuti Kami:

KONTAK | PARTISIPASI | DONASI