¹ Zen in zep, sap nen mese Kristussu de taibliblan nakon Alap mo nwenak edakastik, zen in zebe Alap han erumlae gweꞌan. Zen kitak Bian Yesus mo syala kon ki kirekam lwak.
² Sap nen mese Yesussu kirekam laibliblak, zen in zebe hen Alap mo kwasang-kwasangnak lowehe gweꞌan. Nen in zebe eisrip-sri gwe-gweꞌan, sap nen ema hen Alapsa anakan laibliblaꞌan, “Zen sa eiwa zere mo ngatannak de lowehen hap dena nebe mae hap golzimdi.”
³ Hen kareksa de goltowe gwen nakon zebe eisrip-sri gwe-gwenan, sap nen mese anakan tame uk, “Kareksa de goltowe gwenkam, zen dekam tangan esa Yesussu de taibliblannak de tatem ezauk gwen hap dena tame ul.”
⁴ Kareksa de goltowe gwennake tatem ezauk gweꞌak, zen dekam esa Alapsa de taibliblannak ezise gwer. Hen kirekam de ezise gwenkam, zen dekam tangan esa Alapsa de anakan taibliblanna esek ulse gwer, “Eiwa, nen esa tangan ulin– mensa Alap zere mo walas hap de golzimdin hip gu-gubirida gwekaye.”
⁵ Sap nen mese tangan Alap mo gu-gubiridanna insa de gul irin hip laiblibik, zen zebe enlalana edowe hana srem gwe-gwenan. Sap nen ema nere mae mo enhonak anakan eis gwibirin, “Eiwa, Alap mo nebe mae hap de kwasangna mam tanganna.” Kire enlalana in, zen Alap zere mo Enho nep ing ta sone gwizimnira, sap nen eiwa zere mo Enho nabane ergwe gwenan.
⁶ Nen kime anakarenak lowe heꞌak, “Toton banakan dep? – nenaka de ngaya tabin niye,” hwena kirenak zep Kristus hataka– Alapsa de tame tan srem zini nebe mae hap de tin hipye.
⁷ Zen owaskam ki lwak. Sap zini nen home nabakam nenaka tin hip sosok la gwibirin– dekam de aha zisi ngaya tabin hipye, sap zi dawem mae hap. Hwena san ha emaka hen nere mae mo timni olguꞌun? – wal bose dawem mae hap de tin hipye.
⁸ Sap eiwa zini nen kirekam. Hwena Alap zere mo kwasangsa serkam tangan nebe mae hap goltreizimki, zep hendep karek-karek gol gwen zini nebe mae hap Kristus tilki.
⁹ Zen in zep, mes tangan dam gwesinin: Sap nen mese Kristus mo kala kon Alap mo nwenak edakastil, Kristus hen sa nesa Alap mo jala kon il gwe hebiridala.
¹⁰ Sap nen kime Alap mo gil-gil gwibiridan zi mo kim lowe heꞌak, hwena Tane zem Yesus dekam zep nebe mae hap tilki– nesa dikim Alap goleumlae gwen hapye. Zep angkam mes tangan dam gwesinin: Kristus sa nesa Alap mo jal hil gin nikon il gwe hebiridala. Sap Zen mes eiwa tin nikon ngaya gweka, hen Zen nama nesa de mas gwibirida gwen hap gweꞌara.
¹¹ Sap eiwa nen mese kirekam Alap han erumlae gwek, zen in zebe tangan eisrip-sri gwe-gweꞌan. Zen kitak Bian Yesus onakon ki kirekam nebe mae hap lwazimk.
¹² Zep a kirekam mo lwakye: Adam Bak kim kareknak zanka, zen dekam zep kareksa de gol gwen hap de sosonna hen kire hap de hole-hlena okamanak de zinik kitak ing gwe hebiridak, hendep angkam zep tingare zini karekna nolada gwenan. Hendep Adam Bak mo karekna in kon zep hen tin hip de sosonna tingare zi hip hata gwizimnin. Zen in zebe hendep angkam juwe gweꞌan, sap kitak de zini nen Adam mo kime kareksa ol gwenan.
¹³ Dekam hwena Adam Bak mo hyanak, zini dekam sap karekna nol gwek– Musa de hatan sremnakye. Hwena desa bejen anakan gubiridan, “Zen Musa mo titi tabin olsa nulmun gwek,” sap dekam Musa mo titi tabin ola hom okamanak hataꞌak.
¹⁴ Sap eiwa kirekam, hwena Adam Bak mo hyanak hendep in kim Musa Bak hataka, dekam tin hip de sosonna nama okamana ansa bi gwibik. Hwena dekam de zini sap hom Adam Bak mo kim Alap mo jalse gwen ola nulmun gwek, hwena ki juwe gwek. Zen in zep Adam han Kristus hun, zen apdenak hom, hwena tingare zini zebon nebon onakon nulin gwenan.
¹⁵ Zen in zebe nen sren-srenkam ulin gwenan: Adam onakon zen kareksa de gol gwen hap denaka. Hwena Yesus onakon, zen Alap onakore kwasang-kwasangsae ulin gwenan. Aha-ere zini Adam kim Alap mo jalse gwen ola gulmunku, dekon zep hendep tingare zini juwen hap dena insa nulink. Hwena angkam man tangan dam gwesinin: Aha-ere Zini Kristus onakon beya tangan nik esa hen hendep de egwen hap dena ulin gwer, sap Alap mo nebe mae hap de kwasang-kwasangna Zebon onakon man tangan taman kini gwenan.
¹⁶ Aha zini Adam Bak mo karek gon nakon, kitak de zini dekam zep Alap mo jalak de kang gun hup edakastiꞌin. Hwena mensa Alap angkam syal gwibir-zimꞌira, zen wehasa hom! Sap zi mo karekna kim tangan mam gwe song gwek, dekam zep hwena Alap Kristus onakon zere mo nwenak dikim edakastin hip de orana totoresa kles tyasizimki.
¹⁷ Zep aha-ere zi mo karek nakon, zep tingare zini juwe gwenan. Hwena tingan men zen Alap mo serkam de kwasang-kwasang nakon zere mo nwenak edakastil gwenan, zen zen zep karek gol gwen hap de sosonna in kon hen juwen hap de soson nakon wet so gwe-gwenan. Zen kitak aha-ere Zini Kristus Yesus onakon– men Zen sa hendep denaban nesa golelowehe gweraye.
¹⁸ Zep Alap aha-ere zi mo karek nakon zep tingare zini karek tabin hip gubiridaka. Hen kirekam, kim aha Zini in Alap mo dwam gwibin sin Zenaka zerguku, zep tingan men zen de Desa ang ne gweblaꞌak, zen sa Alap mo nwenak edakastil, hendep zep sa engaya gwer.
¹⁹ Hen kirekam, aha-ere zini kim Alap mo jalse gwen ola insa gulmunku, zen dekam zep tingare zini Alap gubiridaka, “Zen kitak kareksa de gol gwenna.” Hwena aha Zini kim ner hom Alap mo dwam gwibin tanganna syal gwibirki, zen dekam zep Alap zere mo nwenak dikim edakastin hip de orana zi beyana nebe mae hap kles tyasizimki.
²⁰ Zep Alap mae hap titi tabin ola insa Musa hap golblaka: Dekam de ze zi zere mae mo karek-kareksa anakan tame gun hup, “Nen eiwa beyakame karekna ol gwenan.” Hwena karekna kim tangan mam nul song gwek, hwena Alap mo nebe mae hap de kwasang-kwasangna dekam hen man tangan taman kinik.
²¹ Zen in zep, men kirekam kareksa de gol gwen hap de sosonna tingare zini nesa bi gwibiridak, hendep dekon zebe juwe gwenan, hwena angkam Alap mo kwasang-kwasang mo soson nesa bi gwibiridaꞌan. Zen dekon zebe hwena Alap mo nwenak edakastil gweꞌan, hen hendep de lowehe gwen hap dena dekam zebe Bian Kristus Yesus onakon ulin gweꞌan.