¹ Nen men zene Kristussu de taibliblannak etatete gwek, nen bap nen ne-en de nenaka sam gwesibirida gwen hap syal ta gwen. Hwena men zen etatete gwen srem nakon anakan nama neis gwibiꞌin, “Tembanena an sane twinbin? San babe?” – zen de hen nesa sam gwesibirida gwen hap nen hen syal ta gwen. Hen nen mas gwibirida gwen– zen dikim hen Bian Yesussu de taibliblannak tatem ezauk zahen hapye.
² (15:1)
³ Sap Kristus Zen hom ze-en dikim sam gwesin hip syal gweka– men kirekam zebe hap dena Alap mo olak lwakke, Zen kim Alapsa anakan gublukaye, “Alap, zini men kim Emsa lamang da gwek, Ëe hwena dekam ama eisbik– san de Asa de lamang tanna kiye.”
⁴ Tingan men zen kirekam Alap mo epba olak ale nul gwek, zen nesa dikim tawa ta gwibin hip, hen enlala tatetesa dikim nebe mae hap zer gwizimdin hip. Nen dekam anakare enlala naban esa tatem ezauk gwer, “Nen an Alap mo taha terenake lowehe gweꞌan, hen Zen sa zere mo ol gu-gunsu nebe mae hap kitak sul sonezimdi.”
⁵ Sap Zen Alap Zen kirekam de enlala tatetena zer gwizimnira, nen zebe enlalana edowe hana srem gwe-gwenan. Dikire Alap ebe mae hap aha-ere enlalakam dikim lowehen hap dena etan mas gul gwizimk– apdekam ekakim aha-ere enlalakam Bian Kristus Yesus mo Bian Alapsa boltere la gwek, men kirekam Kristus Yesus nesa dwam gwibiridaꞌarake.
⁶ (15:5)
⁷ Zen in zep, aya-wal oso-wal, Kristus hom nesa anakan klis gulku, “An Yahudi zi. An Yahudi srem zi.” Zep nen hen bap nen nenaka kire hap klis gul gwen. Hwena Alap mo bose dikim teipsin hip nen nenaka anakan enlala gwibirida gwen, “Zen ano Kristen bose.”
⁸ Emki eenlala gwen: Kristus Yahudi zisi de babu gwibiridan makan hata zaka– Alap mo ngaya tabin hip de kalangna mensa auyan-aza zemka gu-gubirida gwekake, desa dikim sul sonezimdin hip. Zen dekon zep tangan dam gwesinin, “Alap eiwa taibliblan tanganna.”
⁹ Hwena Kristus hen Yahudi srem zi hip hata zaka– zen dikim hen Alap zere mo kwasang-kwasang nakon Zenaka boltere ta gwen hap. Sap Alap mo olak Kristus mes hamal hap Alapsa anakan gubluka, “Ëe asa Yahudi srem zi niban eno bosena ziteip gulsuk gweblal, hen terya ban asa eno bosena ziboltere gul gweblal.”
¹⁰ Hen Musa Alap mo olak kire hap hen ale gulku, “Yahudi srem zi, em Alap mo nonol hlil irin zi niban em apdekam Alapsa isrip-sri gwe-gweblan.”
¹¹ Etan ahana Yahudi srem zi hip dena buku Mazmuruk anakan ale nuk, “Tingare zi ausuna Alapsa em isrip-sri gwe-gweblan. Hen tingare okamanak de zini Desa en boltere la gwek.”
¹² Hen Yesaya Bak Alap mo ola anakan ale gulku, “Daud Bak mo weinak de irik gin hip de Zini men Zen de hataꞌan zaka, Zen Zen sa hen Yahudi srem zi ausuna irik gili. Hen zen Desa en sa engaya gwen hap blol ne gweblal.”
¹³ Zen in zep, sap em hen mese Bian Yesussu laibliblak, Ëe in zebe Alapsa ebe mae hap abe ta gwenan– Zen de isrip-sri enlalasa ebe mae hap mamkam ing ta sone gwizimdin hip, anakare enlala naban, “Nen an eiwa Alap mo taha terenake lowehe gwenan.” Dekam Alap mo Enhona sa emsa golelowe gwera, hen dekam esa anakan de tame gunnu esek ulse gwer, “Alap mensa nesa gu-gubiridaka, nen eiwa esa ulin.”
¹⁴ Zep aya-wal oso-wal, ee anakare enlala nabane suratna ansa ebe mae hap ale gul sonezimk, “Romak de Kristen zini in dawem-dawem tanganna. Zen hen dawemsa aha zi hip hen-henkam noltrei gwizimnin. Zen hen mes Alap mo dwam gwibinni tame nuk, hen dekam aha zisi desan dep titi da gwibirin.”
¹⁵ Sap ee mese kirekam emsa taiblibiridak, in zebe anakan enlala gwek, “Ëe anik etan udobe naban suratkam enlala sobiridak, sap Alap mes ki zere mo kwasang-kwasang nakon syala ansa abe hap wei yul soneblaka.”
¹⁶ Sap Zen eiwa mes asa dam tasiki– Kristus hup de ol dawemsa de Yahudi srem zi mo lang-lang san golzim halada gwen hapye. Zen kim Kristussu daibli gweblaꞌan, Alap dekam zep zere mo Enhokam ngan tasik gwibiꞌira. Yahudi srem zini in dekam zep zere mae mo timni Alap en hap sosok nul gweblaꞌan– otweran ninsi de Alap hap de kalsnak lone seblan makanye. Alap man tangan dekam sam gwesibirida gweꞌara. Ano syala zep nwe-mase gweꞌan– san de Alap mo golak de syal gwe-gwen zi de otweransa tru tase gweblanna kiye. Hwena ano syala otweran tangan hap hom. Zen hwena dekam zini zere mae mo timni Alap hap sosok nul gweblaꞌan.
¹⁷ Zep zen in zebe Alap mo nganak de ere mo syala insa Kristus onakon sam gwesik gwibiꞌin
¹⁸ hen boltere gul gweꞌan. Sap zen ano syalsa hom. Zen Kristus ap wei yul soneblaka– Yahudi srem zini emsa dikim Alap osan dep zon guluda gwen hap, sap ano ola kon de Biansa taibliblankam, hen ano banakare syal mae nakon de taibliblankam.
¹⁹ Sap Alap mo Enhona man abe hap sosonna gol gweblanda, zen in zebe Yahudi srem zi mo ngirinnik serkam de owas-owasna syal gwe-gwibirin– dekam de zen hen Kristussu taibli gweblan hapye. Kirekam de sosonna in, dekam zebe Yesus hup de ol dawemna insa e-e san sowe henkam anakan gol halada gwek, “Zen Zen– nesa de ngaya tabin hip de Teipsin Zi niye.” Nonol tanganna Yerusalem kone kon gwesik hanak, hendep langna Ilirikumk golhatak.
²⁰ Sap ee ama anakan dwam gwe-gwenan: Men zewe Kristus mo bosena nasalbir srem gweꞌan, desan de tawa tabirida gwen hap. Sap ee ama baes gwek– aha mo nga syal gweblannak de otanesa eiyas gin hipye.
²¹ Zep ano kirekam de syala in, zen man dakastiꞌin– Alap mo olak men kirekam ale nukye, “Zini men zen Alap mo zer sonen Zi hip de ola nulin srem gweꞌan, zen sa nulin gwer. Hen men zen esane gwe srem gweꞌan, zen sa esane gwenkam hendep tame nul.”
²² Kirekam de langa san golzim halada gwen sremkam, ki amaka Romak de zini emsa nabakam amjanbik. Hwena ama hir-hir gwek.
²³ Hwena angkam mese an san de langna beyakam amjanbinkim sul soner. In zebe hwena ebon mae osan dep isrip-sri naban kalang gweꞌan, sap orep mese emsa de amjanbin hip kalang gwe-gwek.
²⁴ Sap ee angkam Espanyol san debe hen kalang gweꞌan. Zen dekam asa hen emsa amjanbir kinzil. Dekam asa isrip-sri naban apdenak emsa golelowehe inendal. Dekon em neik hwena asa Espanyol san dep de song gwennak mas eblak.
²⁵ Hwena angkam nonol Yerusalem san debe song gweꞌan– zewe de Kristen zi tahalha hap de te-alasa zerzimhan hap.
²⁶ Sap Makedoniak de Kristen zini hen Akayak de wenya zen mes zere mae mo kwasang-kwasang nakon te-alana tagam dak– Yerusalemk de Kristen zi tahalhasa dikim mas gwibiridan hapye.
²⁷ Zen zere mae mo enlala enkam ki Yerusalemk de Kristen bose zemka de te-alakam mas gwibiridan hap ola aha-en nuk. Sap kirekam man tangan zebe mae hap sam gwesizimꞌin. Sap Yerusalemk de zini mes nonol zebe mae hap hendep dikim lowehe gwen hap de te-alana ner sonezimk. Zep man tangan sam gwesinin– Yahudi srem zi de okama ennak dep de te-ala enkam mas gwibirida gwenkamye.
²⁸ Zep ee kime syala ansa sul sonesiꞌik, te-alana insa de zerzim hankam, zen dekam asa Espanyol san dep emsa amjanbir kinzil.
²⁹ Hen ee ama Kristussu blol gweblaꞌan, ee de ebon mae onak hata zankam, Zen sa abe hap heꞌho gwibin nika golblala– desa de hwena ebe mae hap kae gwibir-zimdin hip.
³⁰ Aya-wal oso-wal, nen angkam mese apdekam Bian Yesussu eirink, hen Alap man zere mo Enhona nen dikim nenaka hwe-hwekam kwasang gwibirida gwen hap dena ing ta sone gwizimnira, zen in zep emki hen abe hap enlala zon tasiblin naban Alapsa abe ta gwen.
³¹ Mae hap em Alapsa abe ta gwen: Yahudi mo langnak de Bian Yesussu taibliblan srem zi mo taha nakon deka asa hil ti sone gweka, hen dekakim zewe de Kristen zini in ano syala ansa isrip-sri naban nulink.
³² Kirekam de Alap mo dwam gwibin sin lwankam, ee isrip-sri enlala naban asa ebon mae onak hatazal, hen eban mae de lowe henkam ee asa tangan sam gwesil.
³³ Alap men Zen zere mo tahana nebe mae hap deisu guzimꞌira, dikire Zen emsa kitak kara ta gwibik. In eiwa tangan!