Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sebilang dengan harus tunduk lẽq pemrẽntah, sẽngaq ndẽq araq pemrẽntah saq ndẽq berasal lẽman Allah. Dait pemrẽntah saq araq tetentuang siq Allah.

² Keranaq nike dengan saq ngelawan pemrẽntah pade maraq dengan saq ngelawan napi saq sampun tetetepang siq Allah. Dait dengan saq piaq maraq nike gen mauq hukuman.

³ Sẽngaq dengan saq perbuatanne solah ndẽqne perlu takut lẽq pemrẽntah. Cume dengan saq perbuatanne jahat doang saq takut. Lamun side pade mẽlẽ ndẽq merase takut lẽq pemrẽntah, side pade harus ngelaksaneang hal saq solah, make side pade gen tepuji siq pemrẽntah.

⁴ Sẽngaq pemrẽntah nike pelayan Allah saq begawẽan jari kesolahan side pade. Laguq lamun perbuatan side pade jahat, mule side pade harus takut lẽq pemrẽntah sẽngaq ndẽqne sie-sie pemrẽntah nike bekuase jari ngukum dengan. Pemrẽntah nike pelayan Allah saq balesang murke Allah tipaq dengan-dengan saq gawẽq kejahatan.

⁵ Keranaq nike side pade harus tunduk lẽq pemrẽntah -- ndẽqne cume lantaran murke Allah, laguq ẽndah lantaran atẽ nurani.

⁶ Nike ẽndah alasanne kembẽq side pade bayah pajek, sẽngaq pemrẽntah nike pegawẽ-pegawẽ saq tepercaye siq Allah jari ngelaksaneang tugas saq husus.

⁷ Bẽng tipaq selapuq dengan saq patut side bẽng: Bayah pajek side pade lamun side pade tewajibang bayah, dait bayah dudukan lamun side pade tewajibang bayah dudukan. Takut lẽq dengan saq patut tetakutang dait hormatin dengan saq patut tehormatin.

⁸ Ndaq berutang napi juaq lẽq sai-sai, laguq side pade harus saling kasihin sopoq kance lainne. Sẽngaq dengan saq ngasihin sepadene manusie, ie sampun sepenoqne ngelaksaneang Hukum Taurat.

⁹ Prẽntah-prẽntah nike: Ndaq bezinah, ndaq nyematẽq, ndaq memaling, ndaq melẽt napi saq teẽpẽang siq dengan lain; dait selapuq prẽntah-prẽntah lainne sampun tesimpulang jari sopoq hukum, "Kasihin sepadende manusie maraq side pade ngasihin diriqde."

¹⁰ Dengan saq ngasihin sepade manusie ndẽqne gen gawẽq kejahatan lẽq sepadene. Jari dengan saq ngasihin sepade manusie, ie sampun sepenoqne ngelaksaneang Hukum Taurat.

¹¹ Laksaneang selapuq hal nike, dait ngerti keadaan mangkin, bahwe sampun wayene side pade ures lẽman tindoq. Sẽngaq keselametante sampun rapet tebanding waktu ite baruq percaye.

¹² Kelem gen liwat dait seberaq malik gen jari menah. Keranaq nike silaq ite engkah gawẽq perbuatan-perbuatan saq jahat. Ite harus kadu perlengkapan senjate terang.

¹³ Ite harus gawẽq hal-hal saq solah maraq saq biase tegawẽq siq dengan kenaq; ndaq beseneng-seneng jangke liwat bates atao, bowos-bowosan. Ndaq gawẽq perbuatan saq cabul dait ndaq turut kemẽlẽq hawe napsu. Dait ndaq besiaq atao talon atẽ.

¹⁴ Laguq kadu Junjungan Saq Mulie Deside Isa Almasih sebagẽ perlengkapan senjate terang. Dait ndaq turut kemẽlẽq awak saq bedose jari muasang hawe napsu.

Roma

Video Roma 13

Ikuti Kami:

KONTAK | PARTISIPASI | DONASI