¹ Zep san ha Alap eiwa mes zere mo nonol hlil irin zi ausuna Yahudisa gweibirida kinika? Sap kirekam bejen. Ëe dwan hen dekore wal syake– Abraham Bak mo auyan-tane ahana. Ëe an hen Benyamin Bak mo ausu nakon de saltin nikake.
² Alap bejen ano ausu nakore zini insa gweibirida kinin– mensa sap nonol hlil inkiye. Em san ema Alap mo ola ansa eititi eibiꞌin? – men kim Elia Bak Yahudi zi aususa de husus gwibiridan hap dena Alapsa tawa takaye:
³ “Bian, zen mes ere mo olsa de ayang gul gwen hap de zini damerasik. Hen ere hap de otweran tru tase gweblan kals maena mes dre dasibir. Ëe angkam e-en tangane gweꞌan, hen asa angkam tan hap alp dasiꞌin.”
⁴ Hen em wehe enlala eibiꞌin? – Alap men kirekam ding gulblukaye. Zen man ding gulbluka, “Em e-en home gweꞌara. Ëe mese zini da-en, tuju ribu en tolkam, ere onak dep dam tasibik– yang tasin alapna Baꞌal Bak hap de bokle kom so gweblan srem wenyaka.”
⁵ Zep angkam hen kirekam. Alap mes da-en zere hap Yahudi zi ausu nakon dam tasibirki– men zen Alap zere mo kwasang-kwasang nakon Kristussu de taibliblankam engaya gweꞌanke.
⁶ Hen man tangan dam gwesinin: Zen de Alap mo kwasang-kwasang en nakon engaya gweꞌak, ki zen ba maena hom syal neibik– dekam de engaya gwen hap denaye. Sap zi zere mo syala kon de engaya gwenkam, desa bejen anakan gubin, “Zen Alap mo kwasang-kwasang nakon engaya gwek.”
⁷ Zen in zep Yahudi zi hip dena anakan lwaꞌan: Alap mo nwenak dikim edakastin hip dena mensa sap dei gwibik, hwena beya nik hom hla nuk. Hwena men desa en Alap nonol dam tasibirki, zen zen en hla nuk. Hwena beya wenya kip, enol drak-drak gwen hap denaka golzimki.
⁸ Zen man dakastiꞌin– Alap mo olak men zen anakan lwakye, “Alap mes desa totokkam de truwen hap gubiridaka. Hendep angkam zeno mae mo nwena mes dimin tabir-zimki, hen ini mes mat tasibir-zimki.”
⁹ Hen Daud Bak kire zi hip anakan Biansa gubluka, “Bian, dikire tahalha sremkam lowehe gwek– Emsa dekakim hwena eititi ne gweblak. Hen dikire sowe henkam lowehe gwek– dekakim anakan tame nul srem gwek, ‘Ëe an juwen hap de ora sane ang taꞌan.’
¹⁰ Hen dikire zeno mae mo nwena edimin gwek– dekakim ekara gwe srem gwe-gwek. Dikire nihin dohon-hon naban hendep denaban lowehe gwek.”
¹¹ Zep ahakon sa asa dakensiblil, “San ha Alap zere mo nonol hlil irin zini in hendep denaban mes juwen orana in san ang tak?” Kirekam hen bejen. Zen mae hap ki Alap zere mo nonol hlil irin zini, Yahudisa, kirekam gweibirida kinika: Dekam de zen Yahudi srem zisi anakan hlauludan hap hen sisngin gwibiridan hap, “Zen en ba hap Alap onakore isrip-sri naban lowehe gwenan? Diki nen hen emaka Kristussu zeno mae mo kim laibliblaꞌan.” Zep angkam Yahudi srem zi Alap mo kwasang-kwasangnak lowehe gweꞌan, sap Yahudi zini man Kristussu de kirekam taibliblan hap baes taꞌan. Hwena lamkam kim de etan Alap kwang guludaꞌanka– dekam de zen hen etan zere mo kwasang-kwasangnak kitak lowehen hap, zen dekam sa zen hen Kristussu daibliblal, hen zen dekam tangan sa tingare zi mo isrip-srina taman kinil, sap zen hen dekam sa Alap onakon heꞌho gwibin nika nulin gwer.
¹² (11:11)
¹³ Hwena ee Yahudi srem zini ebe mae habe ale gulzimꞌin, sap Alap mes asa dam tasiki– dekam de Yahudi srem zini ebe mae hap ol dawemna ansa golzim halada gwen hap. Hwena syala insa Alap abe hap wei yul soneblaka, ee mae habe desa syal-syal gwe-gwibirin hen golluwe gwenan:
¹⁴ Sap ee ama dwam gwe-gweꞌan– ere mo zi ausu de emsa hlauludankam anakan sisngin gwibiridan hap, “Zen en ba hap Alap onakore isrip-sri naban lowehe gwenan. Hwena nen home.” Kirekam zen hen maka dam nulsuꞌun, “Diki nen hen emaka Kristussu zeno mae mo kim laibliblaꞌan.” Kirekam de lwankam, zen hen maka engaya gweꞌan.
¹⁵ Sap Alap kim Yahudi zini baes gwibiridan makan gweibiridaka, dekam zep hwena zere han de zerumlae gwen hap de orana tingare okamanak de aha zi ausu hap kles tyasizimki. Zep isrip-sri gwibin tangan nik sa lwal– Alap kim de Yahudi zi niban etan goleumlae gweꞌankaye. Dekam zen sa enwe-mase gwer– san de juwen nakon de etan engaya gwenna kiye.
¹⁶ Eiwa, kirekam sa lwal, sap auyan-aza wal zem mes Alap mo nwenak edakastik. Zep hen auyan-tane wal zem an sa hen hendep edakastil. Sap Yahudi zini, zen Alap mo ik gin zaitun makan enwe-mase gweꞌan. Zaitunna in mo ausuna, zen Abraham mae. Zen man tangan Alap mo nwenak edakastik, zep hli-hlina in sa hen lamkam edakastil.
¹⁷ Hwena Alap zere mo ik gin zaitunna insa, ahakore hli-hlina mes blom gulsuku– zao de hwena zen de saltin zaitun hli-hlisa zeno tihinak eiyas gil inen hap. Zen Yahudi srem zini emsa kirekam eiyas gil ineka. Zep Alap mensa Abrahamsa walas zeban gu-gubiridaka, heꞌho gwibin nika de golzimdin hip dena, zen hwena angkam eme mamkam ulin gweꞌan.
¹⁸ Zep Yahudi srem zini em bahem anakan ebolte-bolte gwe-gwen, “Nonol hli-hlina mes Alap blom gulsuku, hwena asa ze eiyas gil ineka.” Emki anakan eenlala gwe-gwen, “Ëe an dwan hli-hli en nakake. Ëe ausu naka hom.”
¹⁹ Hwena em emaka asa ding ulbliꞌan, “Sap eiwa. Hwena Alap mes nonol hli-hlina insa blom gulsuku, zao zep hwena asa zeno tihinak eiyas gil ineka.”
²⁰ In sap eiwa kirekam. Hwena desa Yesussu de taibliblan srem hap kirekam gweibirida kinika. Em hwena ema laibliblak. Zep kire hap bahem tangan ebola-bola gwen. Diki em anakan emaka eairi gweꞌan, “Ëe babe hen zeno mae mo kim taiblibla srem gwen.”
²¹ Sap Alap insa nonol hli-hlina Zenaka de taibliblan srem hap blom gulsuku, ki Zen hen sa etan emsa blom tasibiri– em de hen zeno mae mo kim taibliblan sremkamye. Molya em ensa kwasang gwibiridaka.
²² Zep man dam gwesinin: Alap Zen man zi hip kwasangna hen jala gol gwizimnira. Men zen zeno ora ese zertreizimdin sin de ang tan hap baes tak, zebe mae hap mes jala goltreizimki, zep hendep gweibirida kinika. Hwena em in zene angkam Kristussu blol e gweblaꞌan, Alap zep emsa zere mo walas makan kwasang gwibirida gweꞌara. Hwena em de hen taibliblanna insa golzausunkum, emsa hen sa gweibirida kinila.
²³ Hen kirekam, Yahudi zi de etan taibliblan hap lwanda haꞌanzak, Alap sa etan eiyas gil inera. Sap Alap mo sosonna ki– kirekam de etan syal gwibin hip denaye.
²⁴ Sap Alap, eiwa, owas tangankam emsa syal gwibiridaka, zep emsa ik gin srem zaitun hli-hli mo kim zere mo ik gin zaitun mo hli blom gulsunnuk eiyas gil ineka. Zep mes tangan dam gwesinin: Zere mo ik gin hli-hlina insa blom gulsuku, desa de etan eiyas gil inen hap gwa-gwa naka hom. Zere mo weinak de etan eiyas gil inen hap maka tangan sam gwesiꞌin.
²⁵ Yahudi srem aya-wal oso-wal, em de ebolte-bolte gwe-gwen srem hap, ansa emki esane gwen! Alap mo aha kalangna mensa orep aning gul gwizimki, hwena abe hap mes desa goltreblaka, hwena angkam ee ama ebe mae hap srip gulsuzimꞌin: Emsa angkam en de eKristen gwen hap Alap gubiridaꞌara. Sap Yahudi zini zen hen angkam en Alap mo kalang gwe gun sun enol drak-drak gwe-gweꞌan. Hwena Yahudi srem zini em kime Yesussu de taibliblankam kitak tangan sowe heꞌak, Alap men ki-en beyana dam gulsuku, zen dekam sa Alap Yahudi zini insa etan kwang guludala.
²⁶ Zen dekam sa Alap tingare Israel Bak mo ausu nakore zini in engaya gwen hap de ora san dep kwang guludahal zala. Sap Alap mo olak man lwak, “Ëna Yerusalem kon sa ngaya tabin hip de Zini hata zala, Zen Zen sa Israel Bak mo ausu nakore zini insa etan Alap osan dep golelwan dahal zala.
²⁷ Hen Ëe dekam asa ere mo zi niban de ol ziaha-en gunnu insa sul soner– kime zeno mae mo karek-karekna tap gulsuzimꞌikye.”
²⁸ Zep angkam Yahudi zini mes Alap gweibiridaka– san de zere mo jal zini kiye. Hwena em Yahudi srem zini em zebe angkam Kristus hup de ol dawemna ulin gweꞌan. Hwena Yahudi zini in nama Alap mo hlil irin nik hen lowe heꞌan, zep Alap mo zebe mae hap de kwasangna nama. Sap Zen nama zere mo ol gu-gunnu insa enlala gwe-gwibiꞌira– mensa orep auyan-aza zem Abraham, Isak, hen Yakob maesa gu-gubirida gwekaye.
²⁹ Sap Alap mensa engaya gwen hap zini dam tasibirki, zebe mae hap de enlalana insa bejen wet tyasin. Hen zere mo zi hip de golzimdinni, Zen bejen etan al gulzimdin.
³⁰ Zep Yahudi zi niban Yahudi srem zi niban, em mese Alap mo nwenak elirak gwek. Orep Yahudi srem zini em hen Alap mo jal zi mo kime lowehe gwek. Hwena Yahudi zini in kim Kristussu de taibliblan hap baes tak, zen dekam zep hwena emsa kwasang gwibiridaka.
³¹ Zep angkam Yahudi zi hwena eno mae mo weinak Alap mo jal zi kim lowe heꞌan, sap Alap emsa hwena kwasang gwibiridaka. Zen kirekam Alap Zen ki eirim enol drak-drak gwen hap gubiridaka– dekam de etan kwang guluda halzan hapye.
³² Sap Alap mes ki gubiridaka, “Dikire tingare zi ausuna nonol enol drak-drak gwe-gwek, ki asa hwena etan kwasang gwibirida gwer.”
³³ Eiwa, neno mae mo Alapna serkam de dawem tanganna! Zeno enlalana blal tanganna, hen zeno tame gunnu. Zini nen toton banakan dep? – zeno klis gunsu de tame gun hupye, hen zeno nebe mae hap de syalaye.
³⁴ Zen in zep Alap mo olak man lwak, “Zini toton banakan dep? – Bian mo enlalasa de tame tan naye. Hen Bian Zenaka toton nara dep? – titi tan naye!”
³⁵ “Hen Alap nara zi hon ba maena bohe gulku? – zep de hwena Alap etan golblan hapye.”
³⁶ Sap tingare yang tabinni, ausuna kitak Alap en honke. Zen kitak Alap mo soson en nakon ki lwa gwenan, hen tingan Alap zere mo bose ensa de teip gulsuk gweblan en hap ki lwa gwenan. Dikire kitak hendep denaban boltere da gwek! In eiwa.