Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ge'enaka de 'o mala'ekati moioli yauwaka ma torompet so ma motoau, de tamake 'o ngoma 'o diwangoka 'o ngai moi 'iotaka 'o duniaku. 'O ngomaka ge'ena yokula 'o ngomasa ma dorou ma ngii ma da-damunu ma kuci. Ma ngomasa ma dorou ma ngii ge'ena dau 'o gurutuku 'o dunia ma timiku.

² So 'o ngoma ge'ena yapelenga 'o ngomasa ma dorou ma ngii ma ngorana ge'ena, de dauie 'idowo 'isoka 'o bairou potuuku. 'O wange ma siwara ma yatamunoka sababu ma dowo ge'ena 'ikipirini, so 'o ngawa-ngawaka kaitaru-tarusikau.

³ De ma dowono doka 'isupu 'o saba-saba kaipiakorou 'i'uti 'o duniaku. 'O saba-sabaka ge'ena yokula 'o guata kaimatero de 'o aili ma bisa ma guata.

⁴ Ma saba-sabaka ge'ena koyosidabiwa yatorou 'o sagala 'ubutu, 'o joro de 'o gota-gota. 'Ena 'idadi yatorou duga ka 'o nyawa gee manga mengaka koi'iwa 'isicapuoko ma Jo'oungu ma Dutu 'awi capu.

⁵ 'O saba-sabaka ge'ena koyosidabiwa yakisongene 'o nyawa-nyawa go'ona, duga kayakisikisaa 'o mede motoano. Ma saba-saba gee yakisi-sikisaa 'o nyawaka, ma siri matero ka 'o aili ma bisa.

⁶ 'O mede motoano ge'ena, 'o nyawa-nyawa go'ona yomau la yosongenikau, ma koidadiwa yosongene. 'Ona yomau yosongene, ma 'o songene 'imasikurutu 'onaka.

⁷ 'O saba-saba ge'ena ma lugo 'isoka 'o kuda gee 'itagiou 'o parangi ma ngiika. Ma sae-saekoka 'okia naga 'isoka 'o tuala 'o guraci. Ma biono 'isoka 'o nyawa ma biono.

⁸ Ma utu 'isoka 'o ngeweka ma utu, de ma 'ingiri 'isoka 'o singa ma 'ingiri.

⁹ Ma 'alu ma ngununoka 'isitamunoko 'okia naga rekeni kaimatero de 'o baju 'o besi. Ma gatuuku ma 'ilingi 'isoka 'o kuda 'o gudaioka de ma gorobaka 'iowa-owara 'o parangi ma ngiika.

¹⁰ To 'ena ma bikinoka de ma bisaka 'isoka 'o aili. De ma bikinokau ge'ena to 'ena ma guata ma ngale 'o nyawa yakisiri 'o mede motoano.

¹¹ To 'ena de ma koana ma ngale yapareta 'enaka, de to 'ena ma koana ge'ena la 'o mala'ekati gee yajaga-jaga 'o ngomasa ma dorou ma ngii, gee 'o Ibranioka yosironga 'o Abadon; de 'o Yunanioka yosironga 'o Apolion. Ngone tanu, "'O Sito-torou".

¹² 'O bodito ma si-siraka 'ipasakau. Ge'ena 'iduanga de naga 'o ngai modidioli 'iboa.

¹³ Ge'enaka de 'o mala'ekati moioli yauwaka ma torompet so ma butangau. De to'isene 'o 'ilingi 'isupu 'o manyanyi 'idu-dutuuku ma ngii 'o guraci ma libuku soatino, gee ma Jo'oungu ma Dutu wi bionoka.

¹⁴ 'O 'ilingi ge'ena 'ingose 'o mala'ekatika ge'ena, "Tagi, nodososeka 'o mala'ekati ngai soata gee 'ipusuika 'o Efrat ma 'akeroka!"

¹⁵ 'O mala'ekati ngai soata ge'ena yodosose ma ngale 'o nyawa 'o duniaka 'o bula sa'angeka gee, 'o bula moi yato'oma yabootuku. Ma mala'ekati 'o ngai soata ge'ena ma Jo'oungu ma Dutu wadua-duangou ma ngale yadiai to 'ena ma manarama gee ma 'orasi yadae-daenuku.

¹⁶ Ngoi to'isene 'o mala'ekati ngai soata ge'ena ma solodado gee 'o kudaku 'ipare-parene ma gudai 'o juta ratusu modidi.

¹⁷ De 'o mo-make ma dodaka, ngoi tamake ma kuda 'iku-kudai ge'ena de gee 'i'asa-'asa. Ma kuda 'i'asa-'asa ge'ena 'isitamunoko ma 'alu ma ngununu ma da-datoko 'o baju 'o besi yate-tereboko 'isoka 'o 'uku, 'ibisi 'isoka 'o diwanga ka ma besioka, de 'ikurati 'isoka 'o walira. 'O kuda moi-moi ge'ena ma saeke 'isoka 'o singa ma saeke. 'O bahaya 'o ngai sa'ange ge'ena, ge'ena la 'o 'uku, 'o dowo de 'o walira gee 'isupu 'o kuda ma 'uruno ge'ena, yato'oma 'o nyawa 'o duniaka gee 'ipula sa'angeka so 'o bula moi yabootuku.

¹⁸ (9:17)

¹⁹ 'O kuda 'iku-kudai ge'ena ma guata ma 'uruoka de ma bikinoka. Ma biki-bikini ge'ena 'isoka 'o ngia de ma saekoka. De mita de ma bikinou ge'ena yakisisangisara 'o nyawa.

²⁰ Ma 'o nyawa gee yakimadaku koyakito'omawa de 'o bahaya ge'ena, 'ona koyamadawa mita yasuba 'o patongo gee ka 'ona ma sirete yodiaiku. 'Ona koyomaogoruwa yasuba 'o tokata de 'o barahala 'o guraci, 'o saaka, 'o tambaga, 'o teto bolo 'o gota, gee koimasimake-makewa, koimasi'isenuwa bolo koidadiwa 'itagi.

²¹ 'Ona koyamadawa mita manga gokoie 'ito-torou ge'ena la yomakato'oma, yotawa-tawara de yosongou, de yotosiki.

Wahyu

Video Wahyu 9

Ikuti Kami:

KONTAK | PARTISIPASI | DONASI