Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali yako etu pomakau to kalima ia mantawuis tarompet to si ia. Panewa aku mangkita batu’e to maranta lo’u lino. Wali batu’e etu rawaika kunsi to mangua wombo mbayau to taa ransani ungka ngkayombunya.
2 Wali batu’e to mangkongko kunsi etu, ia mangua wombo mbayau etu. Panewa yako ri wombo mbayau etu masuwu kumbu nu apu to ewa kumbu nu apu to bae kojo. Wali kumbu nu apu to masuwu yako ri wayau etu mangaba’a eo, wali eo pasi rao mawali mawuri.
3 Wali yako etu masuwu seja mpa’o kangguyu-ngguyu yako ri raya ngkumbu nu apu etu. Sira tudu ri wawo nu lino. Mpa’o etu rawaika see maya mangansupi tau sewaju ewa lipa mpondo.
4 Mpa’o etu taa rabiaka mampakaja’aka yau junju, bara kajukaju bara pinumuya to yusa. To maya napakaja’aka nsira, ojo to lino to tare tondong i mPue Allah ri kirenya.
5 Wali mpa’o etu maya mangansesang to lino kasaenya lima mbuya, pei sira taa maya mampopate. Pasi kasesa to yako mpa’o etu sewaju ewa katida to naepe ntau to nasupi nu lipa mpondo.
6 Wali ri rayanya lima mbuya etu, tau damangaliwu kojo jaya see sira maya mate yau, pei sira taa damangarata. Sira rani kojo mate, pei sira taa mate.
7 Wali mpa’o etu, ta’anya ewa jarang to napasilonga ntau, to rapake yau mamusu. Wo’o nu mpa’o etu re’e anu to ewa songko weyawa. Pasi lionya ewa lio ntau.
8 Wayuanya ewa wayua ntau we’a pasi ngisinya ewa ngisi nsinga.
9 Wali mpa’o etu ri dadanya re’e seja anu to ewa baju besi to mangabombong. Pasi loo mpaninya kambimbi-mbimbi ewa loo bendi to malagi kojo to naditi njarang maripo yau mamusu.
10 Iku nu mpa’o etu ewa iku nu lipa mpondo pasi ikunya etu mansupi seja tau. Wali ri ikunya etu semo re’e kuasa mangansesai tau lima mbuya kasaenya.
11 Pasi re’e makole to mangkuasang sira. Makole nsira etu semo pomakau to mampasilonga wayau to taa ransani ungka ngkayombunya. Sanga mpomakau etu i Mampakaja’a. (Wali ane ri basa Ibrani ia rato’oka i Abadon, pasi ane ri basa Yunani ia rato’oka i Apolion.)
12 Wali kasesa to uyunya liumo, pei re’e wo’u kasesa to tawa naliu to dua ngaya.
13 Yako etu pomakau to kaono ia mantawuis tarompet to si ia. Panewa aku mangandonge loo to yako ri oyo tondu to opo to re’e ri palampa weyawa to ri tango i mPue Allah.
14 Wali loo etu manganto’oka pomakau to kaono to mangkongko tarompet etu, ia manganto’o, “Lapa pomakau to opo to raso’o nja’u koro nue bae to rato’oka Eprat.”
15 Pomakau to opo etu, sira room rapasilonga mangampeas tempo to napakatantuka yami i mPue Allah. Wali rata jam pasi eonya, pasi wuyanya pasi to’unya to napakatantuka i mPue Allah etu. Wali pomakau to kaono etu, ia mangalapa pomakau to opo etu see sira damangampopate yau santila togo to lino.
16 Pomakau to opo etu, sira re’e tentaranya to mampolea jarang. Wali aku mangandonge mangkonong kaborosinya tentara etu. Kaborosinya dua atu juta.
17 Wali ri raya mpangkitangku aku mangkita tentara pasi jarang etu ewa si’i ta’anya. Tentara etu, sira mangampake baju besi to mawaa ta’anya ewa kaa nu apu, pasi makamumu, pasi makuni. Jarang to napolea ntentara etu, wo’onya ewa wo’o nsinga pasi yako ri nganganya masuwu apu pasi kumbunya pasi sedawa.
18 Wali apu pasi kumbunya pasi sedawa to masuwu yako ri nganga nu jarang etu batuanginya togo ngaya soba. Wali soba to togo ngaya etu mampopate yau santila togo to lino.
19 Wali jarang etu re’e kuasa yako ri nganganya pasi yako ri ikunya, apa ikunya etu ewa ule to matida naepe ntau ane natungku.
20 Wali tau to toronya to taa namate ri tempo soba etu, sira taa mangandolika tangonya yako mampue measa pasi mampue tau-tau to sira mangika yako weyawa, pera, tambaga, watu pasi kaju. Sira mampue resi tau-tau etu to taa maya mangkita rao, pasi taa mangandonge bara kesaa pasi taa seja malinja.
21 Sira taa seja mangandolika tangonya yako palaong nsira to maja’a, etu semo mampopate sa’e, mangampake do’a, magoyal, pasi malima.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA