Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai isompul malekat na palimahon ai ma tarompitni, gabe huidah ma madabuh sada bintang hun langit hu tanoh; ibere ma hubani anakkunsi ni ruang partoruh ai.
2 Jadi ibuha ma ruang partoruh ai, gabe naik ma timus humbani ruang ai, songon timus ni pamurunan banggal, gabe golap ma mata ni ari pakon awang-awang ibahen timus na humbani ruang ai.
3 Anjaha mangkaluar ma balang humbani timus ai hu tanoh in, anjaha ibere ma bani sidea kuasa songon kuasa ni gansip golang na i tanoh in.
4 Jadi iparentahkon ma bani sidea, ase ulang ikahua poyon-poyon na i tanoh in, sonai sagala na maratah atap hayu aha pe, tapi pitah jolma hansa, na so marsap bani pardompakanni humbani Naibata.
5 Seng ipalopas sidea mambunuh jolma, pitah mangarsik-arsik hansa lima bulan dokahni; pangarsik ni sidea ai usih songon pambahen ni gansip golang sanggah idoit jolma.
6 Bani panorang ai pindahan ni jolma ma hamatean, tapi seng jumpahsi; sihol do namin uhur ni sidea matei, tapi lintun do hamatean in humbani sidea.
7 Ia rupa ni balang ai, usih do songon huda na sirsir laho hu parmunsuhan; adong do bani uluni sortali na songon omas, anjaha bohini songon bohi ni jolma do.
8 Marjambulan do sidea songon jambulan ni naboru, anjaha iponni songon ipon ni singa.
9 Marbaju-baju porang do sidea usih hubani baju-baju bosi; ia sora ni habong ni sidea songon sora ni buei gareta porang do, tinarik ni buei huda na marpojong hu parmunsuhan.
10 Marihur do sidea songon ihur ni gansip golang anjaha marsorod. Bani ihur ni sidea ai do kuasa ni sidea laho mangarsik-arsik jolma lima bulan dokahni.
11 Dong do sada raja bani sidea, ai ma malekat hun ruang partoruh, na margoran Abaddon bani hata Heber anjaha Apollion (Sipangagou) bani hata Gorik.
12 Domma salpu bursik-bursik na parlobei; tonggor ma, roh ope dua nari ipudi ni on.
13 Dob ai isompul malekat na paonomkon ma tarompitni, jadi hubogei ma sada sora hun tanduk na ompat na bani anjapanjap omas, na i lobei ni Naibata.
14 Ihatahon ma dompak malekat na paonomkon, na martarompit ai: “Paluah ma malekat na ompat ai, na sangkut i lambung ni Bah Eprat na banggal ai!”
15 Jadi ipaluah ma malekat na ompat ai, na dob pinasirsir bani jamni, arini, bulanni pakon tahunni laho mamunuh sapartolu ni manisia.
16 Ia bilangan ni tentara na marhuda ai dua ratus juta do; hubogei do bilangan ni sidea.
17 Sonon do huidah huda pakon na mangajaksi ibagas panonggoranku: Ipakei sidea do baju-baju bosi na gerger songon apuy, mahonda tumang anjaha magorsing songon hirtah. Ulu ni huda ni sidea songon ulu ni singa, anjaha kaluar do humbani babahni apuy, timus pakon hirtah.
18 Marhitei pangarsikon na tolu in matei tarbunuh do sapartolu ni manisia, ai ma pangkorhon ni apuy, timus pakon hirtah, na kaluar humbani babah ni sidea.
19 Ai ibagas babah pakon ihur ni sidea do gogoh ni huda ai; ai usih hubani ulog do ihur ni sidea na marulu ai, marhitei ai do sidea mambahen hasedaon.
20 Ia jolma na tading ai, na so binunuh ni hamarsikon ai, lanjar do seng ipaubah sidea uhurni humbani na hinorjahon ni tangan ni sidea, ase ulang be namin marsombah bani setan-setan pakon bani gana-gana na humbani omas, pirak, tombaga, hayu atap batu, na so tarbahen mangidah, manangar atap mardalan pe.
21 Seng ipaubah sidea uhur ni sidea manadingkon pamunuhon, uti-utian, habutakon pakon panangkoon ni sidea.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA