Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Onda intua inontongku ki Adií in Domba tatua noḷosi kom meterai pertama inta kon sigad im meterai pitu tatua. Bo dinongogku in tobatuí mahaḷuk inta kon sigad im mahaḷuk opat tatua noguman, "Igai!" Singog-Nya naonda bo singog ing gotup.
2 Daí aku'oi noko'ontong kon tobatuí kabaḷo nobudoí. Intau inta sinumakoi kong kabaḷo tatua nokadai kom panah, bo sia inogoian doman in tobatuí mahkota. Sia minayak im muna saḷaku inta no'untung inta minayak notayak kom baí mo'untung.
3 Onda intua ki Adií in Domba tatua noḷosi kom meterai induanya, bo dinongogku mahaḷuk induanya noguman, "Igai!"
4 Bo namangoidon tobatuí kabaḷo ibanea, nopura im batangannya naonda bo dokot in tuḷu. Ki Inta sinumakoi kong kabaḷo tatua inogoian ing kawasa monginggamaí kon dodamean kon dunia na'a, simbaí intau mita mosilimodandon. Daí sia inogoian in tobatuí pitow moḷoben.
5 Naonda ki Adií in Domba nomukat kom meterai intoḷunya, dinongog mahaḷuk inta intoḷunya noguman, "Igai!" Aku'oi inimindoi, daí inontongkudon in tobatuí kabaḷo morondií. Ki inta sinumakoi kon kabaḷo tatua nokadai kom pononimbangan.
6 Bo aku'oi nokodongog kon naonda bo singog inta nomaḷuí nongkon yuaí-yuaík im mahaḷuk opat tatua, noguman: "Gandum mopia toliter, pogaidan tosinggai im bolinya, bo gandum ibanea toḷu noliter, bolinya pogaidan doman tosinggai. Ta'e dika momoguya'at kom pangkoi mita in zaitun bo gobaí in anggur!"
7 No'iduduimai kon tua ki Adií in Domba tatua nomukatdon kom meterai inggopatea. Bo dinongogku mahaḷuk inta inggopatea tatua noguman, "Igai!"
8 Bo inontongku in tobatuí kabaḷo inta nobiḷai. Ki inta sinumakoi tangoinya ki Maut. Bo dumuduianmai ko'inia ing karaja'an popatoi. Sepertiga ing kakuasa'an kon dunia na'a pinosarahkan ko'i monia, simbaí mosia mota'au molimod popototoi kom parang, malarat bo popototoi kon takit mita bo popototoi kom mahaḷuk mita inta mokoka'an kon intau.
9 No'iduduimai kon tua ki Adií in Domba tatua nomukatdon kom meterai ilimanya. Bo inontongku kon limonag im meja pototuduan kon sosumbah oyuíon in dimukud mita intau inta minatoi ilimod sin lantaran nopota'au ing koyow i Allah inta aim pinirisaya monia.
10 Mosia nomaḷuí noropot noguman, "O..Tuhan inta totok Mokawasa, inta mokudus bo inta mobanar! Naondapa degaí ing ko'onggotea bo adilon-Mu in intau mita kon dunia na'a, bo hukumon-Mu im mosia inta nolimod ko'inami?"
11 Mosia sinukidan in jubah nobudoí. Bo mosia pinoki pogogaianpa bui motoyong sim pogoḷa-goḷatan kon kotompodan ing kobayong yobayat mita inta topogaidan monia bo ki utat mita monia inta limodon naí mosia.
12 Bo aku'oi noko'ontongdon bui ko'i Adií in Domba tatua nomukat kon meterai inggonomnya. Bo nobaliídon in linug inta totok moko'ondok kon dunia na'a. Mata in singgai irumondik naonda bo didit morondik inta nokasar bo buḷan sinimimpuya naonda bo duguí.
13 Tundi mita kon ḷangit nongoḷabuí kom butaí naonda bo bungai in ara inta diaípa noguyang ta'e noḷabuí sin inirup in tompot inta moropot.
14 ḷangit kinimi'ot naonda bo karatas inta ilitod. Bayongan buḷud bo pulau nodait pinamping nongkon tampatea mita.
15 Bayongan raja kon dunia na'a bo intau mita moḷoben, panglima mita in tontara, intau mita no'oyuíon, intau mita inta kokawasa, bo intau mita ibanea, pinomayak ata andeka intau inta nobebas, komintan norogadop kom bubuí mita im butaí bo kon sigad mita im batu im buḷud.
16 Bo mosia nomaḷuí noguman kom batu mita, "Bumbunaidon ing kami bo bunidon ko'i-Nia inta ilimituí kon tampat pomomarenta'an tatua bo nongkon toruí Adií in Domba tatua!
17 Singgai inta totok moko'ondok mo'iangoidon, bo mosia mulaidon tumoruí, bo diaíbií doman tobatuímai intau mokosanggup tumayow makow ko'i monia!"
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA