Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jenari man bangku ibereken sada kayu penibari bali ras ciken. Man bangku ikataken, "To sibari Rumah Pertoton Dibata ras batar-batar persembahen, janah beligai teremna kalak si ersembah i bas.
2 Tapi kesain si arah darat ula sibari, sabap si e nggo iendesken man bangsa si labo kalak Jahudi. Idedehina pagi Kota si Badia empat pulu dua bulan dekahna.
3 Kusuruh pagi dua kalak saksingku make uis guni tanda ate ceda. Iturikenna pagi Kata Dibata dekahna 1260 wari."
4 Saksi si dua e, e me batang seton si dua ras lampu si dua si lit i lebe-lebe Tuhan doni enda.
5 Adi lit kalak si atena nggasgasisa ndarat api i bas babahna nari ngkernepken musuh-musuhna. Alu bage ise nggasgasi ia mate me.
6 Lit kuasana nutupi langit gelah ula nusur udan kidekah ia ernubuat denga. Lit me kuasana nandangi sumbul-sumbul lau, e me guna nalihkenca jadi dareh. Bage pe lit kuasana ngerehken erbage-bage mara ku doni enda piga-piga kali pe atena.
7 Kenca dung ia ersaksi, rubia-rubia si reh i bas embang e nari ngelawan ia. Italuken rubia-rubia e me ia duana dingen ibunuhna,
8 janah maitna ampar me i bas pasar kuta si meriah, i ja Tuhan ipakuken ku kayu persilang. Kuta e iumpamaken gelarna Sodom ntah Mesir.
9 Kerina pemerentahen, suku, cakap, ras bangsa ngenehen maitna telu setengah wari dekahna janah la iberena mait e ikuburken.
10 Meriah me ukur manusia si i doni e i bas kematen saksi si dua enda. Erpesta ia kerina dingen mereken luahna ia sekalak nandangi si debanna, sabap nabi si dua e nggo ngerehken kiniseran-kiniseran nandangi manusia si i doni enda.
11 Kenca si telu setengah wari e, reh kesah si nggeluh i bas Dibata nari, mengketi nabi si dua kalak e. Jenari tedis ia duana, janah mbiar kal kalak kerina si ngenehen ia.
12 Kenca bage ibegi nabi si dua e sora si megang i Surga nari, ngerana man bana nina, "Marilah ku datasken!" Asum itatap musuh-musuhna ia, nangkih ia ku Surga, ras embun.
13 Paksa si e kal pe jadi me linur si mesangat. Kernep sepersepuluh kuta e, janah mate pitu ribu kalak jelma ibahan linur e. Jelma si debanna mbiar kal janah iberekenna kemulian man Dibata si i Surga.
14 Cilaka si peduaken nggo lepas. Tapi nehenlah! Reh me cilaka si peteluken.
15 Jenari iembus malekat si pepituken e terompetna. Paksa si e terbegi sora-sora si megang i surga nari nina, "Kuasa guna ngerajai doni enda genduari nggo i bas tan Tuhanta dingen Raja Penampat si IpadankenNa janah Ia ngerajaisa rasa lalap seh rasa lalap."
16 Jenari pertua-pertua si dua pulu empat si kundul i bas kursi kinirajan i lebe-lebe Dibata erjimpuh dingen nembah man Dibata,
17 nina, "O Tuhan Dibata si Mada Kuasa si nggo lit genduari ras nai nari. Bujur ikataken kami man bandu sabap nggo IpakeNdu KuasaNdu, si mbelin e, janah nggo Kam ngerajaisa kerina.
18 Merawa kalak si la nandai Tuhan, sabap nggo seh paksana IcidahkenNdu RawaNdu, janah IadiliNdu kalak si nggo mate. Genduari me paksana guna mereken upah man suruh-SuruhenNdu, e me nabi-nabi bage pe man kerina anak-AnakNdu, kerina kalak si erkemalangen man BaNdu subuk si kitik bage pe si mbelin. Genduari me paksana guna ngkernepken kalak si ncedaken doni."
19 Emaka talang Rumah Pertoton Dibata i Surga, janah teridah i je Peti Perpadanen. Jenari reh kilap, sora si ergeruhguh, lenggur, linur ras udan baho si mehantu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA