Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Aih, lungunni in hundul huta in, sonin riahni hinan! Gabe doskon na mabalu do ia, na timbul hinan i tongah-tongah ni bangsa-bangsa! Na manggomgomi nagori-nagori hinan, hape gabe sibere sohei.
2 Sai tangis-tangis do ia borngin, humaridei iluhni bani huyumni; seng dong humbani na mangkaholongisi na mangapohisi, marbalik do ganup hasomanni, gabe munsuh do sidea bani.
3 Tarbuang do Juda halani pangarsik-arsikon ampa halani parjabolonon. Marianan do ia nuan i tongah-tongah ni bangsa-bangsa, seng jumpahsi parsaranan; Haganup na mangayak-ayaksi manjumpahisi bani na tarsosak ia.
4 Marhoru do dalan laho hu Sion, halani seng dong halak na roh marpesta; lungun do haganup horbanganni, marhoih malim-malimni; pusok do uhur ni anak boruni, anjaha ia sandiri paet pangahapanni.
5 Imbangni do gabe pangopalai bani, mardohar do munsuhni, halani ibahen Jahowa ia marsitaronon binahen ni buei ni hajahatonni; misir do ganup niombahni, hona tangkap i lobei ni imbangni.
6 Laho do humbani boru Sion ganup hamuliaonni, songon ursa na so dapotan gagaton do kopala-kopalani; mandatei do sidea mardalan i lobei ni na mardakdaksi.
7 Taringat do Jerusalem bani panorang hadoyukonni ampa hamarsikonni, bani ganup hamuliaonni na adong bani humbani na basaia. Sanggah madabuh bangsani hubagas tangan ni munsuhni, anjaha seng dong pangurupi bani, mangkawah do munsuhni bani anjaha mandoruni halani parboisni.
8 Banggal tumang do dousa ni Jerusalem, halani ai do ase hagigi ia. Haganup na pasangapkonsi pahirihonsi, halani iidah sidea hailaonni; anggo ia marhoih do anjaha ipadaoh bohini.
9 Longkot do habutakonni bani rambu ni hiouni, seng ipingkirhon pasal ujungni; bagas do hadabuhanni, seng dong na mangapohisi. Tatap Ham ma ale Jahowa hadoyukonkin, ai mangenjeng do munsuhku.
10 Idurdurhon munsuh do tanganni dompak arta-arta na maharga ijai; tongon, iidah do parbegu masuk hubagas ianan-Ni na mapansing ai, ai ma sidea na dob nilarang-Mu, ase ulang masuk sidea bani kuria-Mu.
11 Haganup bangsani marhoih mangindahi sipanganon, ibere sidea do ugas-ugasni halani sipanganon laho mangudut hosahni. “Tonggor Ham ma, ale Jahowa kawahkon Ham ma, sonaha hiri ni ahu!
12 Roh ma nasiam sagala pamontas! Kawahkon anjaha tonggor ma, atap dong do sitaronon na songon sitaronon na sogop bangku on, na pinaroh ni Jahowa bani panorang pargajag ni ringis-Ni.
13 Humbabou do isuruh apuy, das hubani holi-holingku do masuk ai. Itaon do jarot i lobei ni naheihu; itarik do ahu hupudi; ibahen do ahu marhahurangan, boritan lalab.
14 Borat do pasangan ni dousangkai bangku, na isangkutkon Jahowa marhitei tangan-Ni; inahkon do ai bani tangkuhukku, bois do gogohku ibahen; iondoskon Tuhan do ahu hubagas tangan ni halak na so tarimbang ahu.
15 Ilotloti Tuhan do sagala siparkuasa na i tongah-tongahku; idilo do sada humpulan mangimbang ahu, laho manropuki garama na adong bangku. Irojati Tuhan do anak boru, boru Juda songon bani pangilangan anggur.
16 Tangis do ahu halani ai, marabur-abur iluh do matangku; ai daoh do humbangku na boi mangapoh ahu, na pasabou uhurhu. Bois do anakku, halani monang munsuh.
17 Ipaherbang Sion do tanganni, tapi seng dong na mangapohi. Iparentahkon Jahowa do dompak Jakob, simbalogni gabe imbangni, gabe hagigi do Jerusalem i tongah-tongah ni sidea.
18 Pintor do anggo Jahowa, ai hulawan do hatani; tapi tonggor ma, ale sagala bangsa, idah ma sitarononkin! Tarboan do hu habuangan anak boru ampa garama na dong bangku.
19 Dilo-dilo do ahu bani na mangkaholongi ahu, tapi itipu sidea do ahu. Malim-malim ampa pangintuaingku ibagas huta in marmateian do; tongon, pindah-pindah do sidea bani sipanganon, tapi seng jumpah sidea.
20 Tonggor Ham ma, ale Jahowa, sonaha sosakku; lutu do tonduyhu ibagas, anjaha rusak do uhurhu, halani manlawan ahu; podang do na mamunuhi i darat, sampar ibagas rumah.
21 Tonggor Ham ma hoih-hoihku, seng dong na mangapoh ahu. Haganup munsuhku manangar parsedangku; megah do sidea halani sonai ibahen Ham bangku. Paroh Ham ma ari na dob nilumbahon-Mu, ase masa bani sidea songon na masa bangku.
22 Sai das ma hu lobei-Mu haganup hajahaton ni sidea, anjaha bahen Ham bani sidea songon na binahen-Mu hu bangku, halani haganup panlanggaronku; tongon buei do hoih-hoihku, anjaha mandatei do uhurhu.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA