Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tamaka sinona Yerusalem anne kamma, kota suara’ dudua riolo. Tamaka porena riolo ri alla’na bansa-bansaya, anne kamma rapammi janda. Riolo kontui kota kaminang nisomba, anne kamma nipa’jarimi ata.
2 Tuntung bangngimi angngarru’ si’na nyawana, ammatti’ je’ne’ matanna. Tenamo manna sitau tanrinna maero’ battu ansaleori. Nibali’ ballang ri bela-belana ta’giling ma’jari bali mae ri kalenna.
3 Nabokoimi tu Yehuda pa’rasanganna, lanri nipa’jarina ata na tamaka pa’risi’na tallasa’na. Anne kamma nia’mi ri tangnga-tangngana bansa maraeng tampa’ tenaya nasalewangang. Nikurummi ri musunna ke’nanga ri wattu pa’risi’na tallasa’na.
4 Ri wattu allo-allo lompoa tenamo manna sitau battu mange ri Balla’Na Allata’ala. Sikamma tulolo pakelong niaka anjoreng ballasa’mi na sikamma imanga akkunrareng tommi. Tenamo tau ri sikontu pakke’bu’ lompoa, sangnging si’na mami ri Kota Sion.
5 Pore ngasemmi musu-musunna lanri akkullena nakoasai ke’nanga. Nipa’risi ri Batara, lanri majaina dosana. Nitahammi pandudu’na, na nilaling mange ri butta pammelakkang.
6 Anjo kaporeanna kota Yerusalem ammantang mami a’jari carita. Sikamma pamimpinna a’jari lammami rapang jonga sanna’ cipuru’na. Tena pakkullena ri musu battua angngondangi.
7 Le’ba’namo runtung na nakasia’ pa’risika, nau’rangi Yerusalem rewasa’ le’ba’ lalona, ri wattu jaina barang-baranna; antekamma batena tu’guru’ mae ri kakoasanna musunna, na tena manna sitau ero’ battu antulungi. Ammakkala’ mami musu-musunna anciniki katu’guranna.
8 Nara’massi kalenna Yerusalem lanri gau’ dosa majaina. Sikontu tumappakalompoa riolo mae ri kalenna, anne kamma mappakatunami anciniki ri assolara’na. Makkunrareng mami nagaukang napakamma siri’-siri’.
9 Ma’nassami nicini’ ra’masa’na mingka tena najampangi apa lakajariang mae ri kalenna. Tamaka sanna’na karuntunganna, mingka tena manna sitau ero’ battu ansaleori. Namappala’mo pangngamaseang battu ri Batara, lanri ammetanamo musu-musunna.
10 Sikontu barang-baranna niallemi ri musu-musunna. Ba’lalo musti nacini’mi ke’nanga antama ri Balla’Na Allata’ala, panggaukang tenaya Nikellai ri Batara punna teai umma’Na.
11 Ballasa’mi na makkunrareng pandudu’na amboyai tallasa’na; barang lompoa anggaranna napassambe siagang roti, sollanna akkulle attallasa’ na tamatea. Akkio’mi Yerusalem angkana, "O Batara, ciniki atanTa, parhatikangi sikontu pa’risi’ kukasiaka."
12 "He sikamma tunumaloa ri aganga, ciniki siagang parhatikangi! Maka nia’ passessa sangkammaya lompona nulangngereka ri kamma-kammaya anne, passessa Napabattua Batara mae ri nakke, lanri pangngalarroi lompoNa?
13 Napaturungi pepeka battu ri langi’ akkanrea sa’genna antama’ ri atingku. Attannangi sikko’ ri dallekangku untu’ antu’guranga’. Nampa Nalappassanga’ kale-kalengku ballasa’ sila’busu’ allo.
14 Napasse’re kabusuki dosaku nampa Nasikko’ Napa’jari se’re, na Nagentung ri kallongku sa’gengku a’jari lamma napakamma battala’na. Napassareanga’ Batara mae ri musua; na tena kulleku angngewai ke’nanga.
15 Napakatunai Batara sikontu tubaraniku porea. Napagio’ kabusuki tantaraya sollanna putta sikontu tau rungkaku. Naonjo’-onjokangi bansaku sa’genna ancuru’, rapang tau ammaccoka rappo anggoro’.
16 Lanri iaminjo nammatti’ je’ne’ matangku, taenamo ero’ assarea’ sumanga’ na panynyaleori. Taenamo apa-apanna bansaku, lanri la’bi koasana musua.
17 Kupatarai limangku appala’ tulung, mingka taenamo ero’ ansaleoria’. Attammulili musua Napabattu Batara; battui ke’nanga ambundukia’. Nipare’ kamma mama’ loro, apa appakaringi’ ri alla’na ke’nanga.
18 Mingka Batara bawang tojeng, lanri kudakkai parentaNa. Pilangngeri, ikau bansa-bansaya, cinikka’ lalang ballasakku. Nitahangi turungkaku siagang tulolongku, na nilaling mange ri pammelakkanga.
19 Makkioka’ ri bela-bela bajikku mingka ma’bali’ ballangi ke’nanga ri nakke. Sikamma imanga na pamimping bansaya mate kabusu’mi ri agang-agang niaka ri kotaya, ri wattu a’boyana kanre untu’ katallassanna.
20 O Batara, Kiparhatikanga’, lussaki na puccala’ atingku, ancuruki lanri dorakaku le’ba’ laloa. Ri sikamma aganga nia’ pammunoang, lalang balla’ nia’ kamateang.
21 O Batara, pilangngeri kunrarengku, taenamo ansaleoria’. Rannumi musu-musungku, lanri Kipitujuingku bala. Kipabattu lalomi anjo allo le’baka Kipa’janjiang; Kipa’risimi ke’nanga kamma inakke.
22 Parhatikangi anjo sikontu kaja’dallanna ke’nanga, na Kigaukang mae ri ke’nanga kamma Kigaukanga mae ri nakke lanri sikontu dosa kugaukanga mae ri Katte. Akkunrarenga’ lalang ri ballasakku, si’na nyawaku kuta’ronang-ronang."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA