Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nyanyeyan pangajaranna Asaf. Tan-taretan sabangsa, edhingngagi tang babala’an reya, edhingngagi pateppa’ tang oca’.
2 Sengko’ nerrangngagiya bangsalan ban parebasan, nerrangngagiya bak-tebbagan jaman lamba’,
3 sabarang se ekaedhing ban se ekataowe sengko’, se ecareta’agi bi’ tang bangatowa.
4 Jareya bi’ sengko’ ta’ eroseya’agiya ka na’ poto; kabbi eberta’agiya ka angkadan se bakal dhatengnga parkara kobasana PANGERAN, sabarang se ajib ban se raja se elampa’agi Salerana.
5 Bangsa Isra’il eparenge hokomma, toronanna Yakub eparenge papakonna. Bangatowana sengko’ ban ba’na epakon ngajarragi kom-hokom jareya ka na’-ana’na,
6 sopaja angkadan se bakal dhateng padha taowa, sarta nerrossagi pole ka na’-ana’na.
7 Kalaban cara se kantha jareya na’ potona sengko’ ban ba’na bakal ngarebba ka Allah, ta’ loppa ka sabarang se elampa’agi ban terros ta’at ka papakonna,
8 sopaja na’ potona sengko’ ban ba’na jareya, ta’ padha’a ban bangatowana, se dujan aberonta’ ban alako daraka; angkadan se ta’ koko imanna ban ta’ esto ka Allah.
9 Suku Efraim se asanjata gandhiba ban pana, padha buru e bakto aperrang.
10 Suku jareya ta’ neptebbi parjanjiyanna ban Allah, sarta ta’ atoro’ ka kom-hokomma.
11 Reng-oreng jareya padha loppa ka sabarang se elampa’agi Salerana, ban sabarang se ajib se epatangale ban aba’na.
12 E adha’na para bangatowana Allah mabadha kaajiban e nagara Messer ban e tana lapang Zowan.
13 Tase’ epaseba’, reng-oreng jareya pas epalebat e jadhiya; aeng epamanjeng epakantha geddhung.
14 Reng-oreng jareya etonton ban ondhem e baja seyang sarta ban tera’na apoy e baja malem.
15 Bato e ra-ara beddhi epamaroka, reng-oreng jareya eparenge aeng enom sampe’ wa-ngalowa.
16 Gumo’ bato epakon makalowara aeng, aeng pas agili akantha songay.
17 Tape reng-oreng jareya terros dusa ka Allah, e ra-ara beddhi padha aberonta’ ka Allah Se Mahatenggi.
18 Reng-oreng jareya etengnget ba’-nyoba’ Allah, maksa nyo’on kakanan se daddi pangaterrona.
19 Reng-oreng jareya alaban ka Allah, laju ngoca’, "Ba’ bisa’a Allah apareng kakanan ka sengko’ ban ba’na e ra-ara reya?
20 Pajat bendher Salerana mokol gunong bato se gali, sampe’ aeng santer agili. Tape ba’ bisa’a keya Salerana nyadhiya’agi roti ban marenge ommadda daging?"
21 Meyarsa jareya, Guste ALLAH duka pas madhateng apoy epanyerrang ommat jareya; dukana aba-tamba ka reng-oreng jareya,
22 polana reng-oreng jareya ta’ parcaja ka Allah, ta’ parcaja ka kobasana se bisa masalamet aba’na.
23 Sanajjan kantha jareya langnge’ eparenge parenta, sopaja mokka’ bang-labangnga.
24 Dhari sowarga epatoron gandum sabannya’na, manna se daddiya kakanna reng-oreng jareya.
25 Reng-oreng jareya eparenge kakanan ta’ sakera-kera, epangakan rotina para malaekat.
26 Angen temor epadhateng keya, angen lao’ epadhateng kalaban kobasana.
27 No’-mano’ epatoron kaangguy ommadda, bannya’na padha ban beddhi e penggir serreng.
28 No’-mano’ epagaggar e parkemahan, e sabingkerra tana se daddi kennengnganna.
29 Reng-oreng jareya pas ngakan sampe’ kennyang, sabab bi’ Allah la eparenge se daddi pangaterrona.
30 Tape napsona reng-oreng jareya tadha’ marena, daddi teppa’na gi’ padha terros ngakan,
31 Allah pas duka ka reng-oreng jareya, reng-oreng Isra’il se gi’ ngodha ban se gaga’ parjuga padha epamate tadha’ karena.
32 Maske kantha jareya ommadda gi’ paggun agabay dusa maske nangale’e kaajiban-kaajiban padha paggun ta’ parcaja.
33 Daddi akantha ceppedda nyaba reng-oreng jareya epapegga’ odhi’na epamate katako’en daksakala.
34 Sabban badha e antarana se epamate bi’ Allah, se laen atobat pas abali ka Salerana.
35 Pas enga’ ja’ Allah se ngaobi aba’na ja’ Allah Se Mahakobasa panyalamedda aba’na.
36 Tape reng-oreng jareya lecek ka Salerana, cacana ta’ teppa’ salanjangnga.
37 Reng-oreng jareya ta’ esto ka Allah, ban ta’ neptebbi parjanjiyanna.
38 Tape Allah neser ban nyapora ommadda sarta ta’ mate’e reng-oreng jareya. Li-baliyan Allah ngampet dukana ban ta’ norodi benduna panggaliyanna.
39 Allah emot ja’ manossa jareya mahlok se fana, akantha angen se lebat ban tadha’ balina.
40 Ce’ seggudda reng-oreng jareya aberonta’ ka Salerana, nyake’e panggaliyanna e bakto badha e ra-ara.
41 Li-baliyan reng-oreng jareya ba’-nyoba’ Allah, masossa Se Socce, Allahna Isra’il.
42 Kabbi padha ta’ enga’ ka kakobasa’anna, ta’ enga’ e bakto epasalamet dhari mosona,
43 e bakto Allah mabadha kaajiban-kaajiban e Messer sarta jat-mo’jijat e tana lapang Zowan.
44 Ngay-songayya reng-oreng jareya eoba epadaddi dhara sampe’ ta’ ekenneng enom aengnga.
45 Reng-oreng jareya eseksa bi’ lala’ sabannya’na, tanana eparosak kata’.
46 Allah madhateng ola’ ban balang se maobus hasella tana ban teggal.
47 Bungkana anggurra eparosak ban ojan bato, ka-bungkana arana eparosak ban ebbun se gali.
48 Ojan es epatoron ngenneng ka bin-ebinna, ban-kebanna epatappor kelap.
49 Panggaliyanna se duka ta’ eampet sakale, pasukan malaekat maot eotos ka bume, se andaddiyagi reng-oreng jareya ta’ andhi’ pangarep pole.
50 Allah ta’ ngampet dukana, ban ta’ neser ka reng-oreng jareya, kabbi padha epamate ban panyaket sampar.
51 Ana’ lalake’ sareyang e nagara Messer padha epamate.
52 Saellana jareya Allah mimpin ommadda akantha oreng se ngowan dumba saambal, eater lebat e ra-ara se raja.
53 Lantaran esarengnge Allah ommadda arassa aman ban ta’ arassa tako’ atena, tape mosona padha tasellem e tase’.
54 Ommadda pas ebakta ka tana se socce, pagunongan se erebbu’ bi’ astana dibi’.
55 E adha’na ommadda Allah ngojuk sa-bangsa e jadhiya, tana sangkolan egi-bagi ka ku-suku Isra’il, ommadda, se pas padha ngennengnge mah-kemahna mosona.
56 Tape ommat jareya aberonta’ ba’-nyoba’ Allah Se Mahakobasa, papakonna ta’ eparduli.
57 Ommat jareya akiyanat akantha bangatowana, ta’ ekenneng parcaja akantha gandhiba se bilu’.
58 Ommat jareya nangtang Allah mabadha kennengnganna panyemba’anna brahala, maduka panggaliyanna polana ca-arcana.
59 Ngoladi jareya Allah ce’ dukana, ommat Isra’il etolak ta’ eparduli sakale.
60 Allah adinggallagi Kemahna e Silo, kalenggiyanna e nga’-tengnga’anna manossa.
61 Petthe Parjanjiyan lambang kobasa ban kamolja’anna bi’ Allah epanneng maske egiba buru moso.
62 Allah duka ka ommat kaagunganna, daddi epanneng maske epate’e moso ban peddhang.
63 Ngangodhadanna mate ekello’ apoy, ban-parabanna tadha’ se ngabine.
64 Mam-imamma mate bi’ peddhang, dha-randhana ta’ ngenneng nanges.
65 Pangeran ngadek akantha oreng se jaga tedhung, akantha oreng se kowat samarena mabu’ ngenom anggur.
66 Mosona padha nyorot tadha’ karena, padha epakala salanjangnga.
67 Toronanna Yusup etolak, suku Efraim tadha’ se epeleya.
68 Se epele iya areya suku Yehuda, ban Gumo’ Siyon se ekataresnae parana.
69 E jadhiya Allah maddek Padalemmanna akantha kalenggiyanna e sowarga, epakoko akantha bume salanjangnga.
70 Daud abdina epele, epondhut dhari dhang-kandhangnga dumba ban embi’,
71 dhari kennengnganna pameyara’anna korbina dumbana, epangowana ommat Isra’il.
72 Daud meyara Isra’il bi’ ate se ehlas, mimpin ommadda talebat penterra.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA