Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kelong pangngajara’ battu ri Asaf. Pilangngeri pangngajarakku, he ikau bansaku, parhatikangi kana-kanangku.
2 Erokka’ appasulu’ paruntu’ kana siagang pangngebarang, nakupakasingara’ boto-botoang jammang riolo,
3 sikamma apa le’baka nalangngere’ siagang natarima ikambe, nacaritaya boe-boena ikambe.
4 Taerokai ikambe anrahasiakangi mae ri ana’-ana’na ikambe; eroki ikambe angkabarrangi mae ri ana’-ana’ ri bokoa ri passala’ koasaNa Batara siagang bate pare’ malompoNa, sikamma gau’-gau’ appakalannasa’Na.
5 Napassareangi hukkunNa mae ri bansa Israel, siagang parentaNa mae turunganna Yakub. Nasuroi boe-boeta ampangngajarrangi mae ri ana’-ana’na ke’nanga,
6 sollanna naasseng ana’ ri bokoa, nampa napatulusu’ pole mae ri ana’-ana’na ke’nanga.
7 Lanri kammana anjo manrannuang tommi ke’nanga mae ri Allata’ala, tenamo nakaluppai panggaukanNa, mingka tuli mannuruki ri parentaNa,
8 sollanna tena sangkamma ke’nanga boe-boena nangaia angngewa siagang doraka; ana’-ana’ ta’lengga-lenggaya tappa’na, siagang tenaya namajarre’ mae ri Allata’ala.
9 Suku Efraim assanjata panaya siagang anrong pana, naerang kalenna lari ri wattunna a’bundu.
10 Nadakkai parjanjianna ke’nanga siagang Allata’ala, taerokai mannuruki ri hukkunNa.
11 Nakaluppai ke’nanga sikamma apa le’baka Nagaukang, siagang apa-apa appakalannasa’ le’baka nipa’nyatangi ke’nanga.
12 Ri dallekanna boe-boena ke’nanga, a’gau’ appakalannasaki Allata’ala ri pa’rasangang Mesir, ri lappara’ Zoan.
13 Nabage ruai tamparanga, nampa napalimbang ke’nanga; napaentengi je’neka sangkamma tembo’ pammantangngang je’ne’.
14 Naului ke’nanga siagang rammang ri wattu allo nampa nasare singara’ pepe’ sila’busu’ bangngi.
15 Nareppeki moncong batua ri parang lompoa, nampa nasare ke’nanga je’ne’ inung allumpa-lumpa.
16 Nasuroi bulu’ batua appasulu’ je’ne’, nampa assolommo je’neka sangkamma binanga.
17 Mingka tulusu’ dorakana ke’nanga mae ri Allata’ala, apparicui ke’nanga ri paranga mae ri Kaminang Tinggia.
18 Nakunjungimi ke’nanga naso’ri Allata’ala, appala’ kanre nakaerokia ke’nanga.
19 Naewami ke’nanga Allata’ala nakana, "Maka akkullei Allata’ala assareki’ kanre ri parang lompoa?
20 Memang Natunrungi moncong batu kassaka, sa’genna assolong sarring je’neka. Mingka maka lakkulle tongi Napasadiang roti siagang Nasare dageng umma’Na?"
21 Nalangngere’Na Allata’ala anjo, Nabakkaimi umma’Na siagang pepe’; pila’ katambammi larroNa mae ri ke’nanga,
22 saba’ tena natappa’ ke’nanga mae ri Allata’ala, mae ri koasaNa akkullea ampasalamaki ke’nanga.
23 Mingka manna nakamma Naparenta tonji langika sollanna Nasungke sikamma pakke’bu’na.
24 Appatarungi gandung battu ri suruga, kanre untu’ lanakanrea ke’nanga.
25 Nasarei ke’nanga alla’bi-la’bi kanre; angnganrei ke’nanga roti malaeka’.
26 Nasuroi ammiri’ anging battu rayaya; lanri koasaNa mammiriki anging battu timboroka.
27 Appaturungi jangang-jangang mae ri umma’Na, sangkamma kassi’ jaina, takkullea nirekeng.
28 Natu’gurangi jangang-janganga anjo ri kemana ke’nanga ri tammulilina tampa’ napammantangia ke’nanga.
29 Nampa angnganre ke’nanga sa’genna bassoro’, saba’ nisaremi ri Allata’ala apa nakaerokia ke’nanga.
30 Mingka tena tongija nasukku’ napasuna ke’nanga; jari lalang angnganrena ija ke’nanga,
31 a’jari larromi Allata’ala siagang Naewami ke’nanga; Nabunoi tu Israel rungkaya siagang porea.
32 Mingka manna nakamma tuli dorakana umma’Na, taerokai tappa’ ke’nanga ri sikamma gau’ appakalannasa’Na.
33 Jari Napa’le’ba’mi tallasa’na ke’nanga sanrapang nappasa’, cappu’mi taung-taung tallasa’na ke’nanga lalang kamallakkang.
34 Kere wattu naNabuno Allata’ala siapa are jaina ri ke’nanga, assesse’lalammi maraenga nammotere’ mae ri Ia.
35 Nau’rangimi ke’nanga angkana Allata’ala pa’la’langanna ke’nanga, siagang Kaminang Tinggia Tumappasalama’na ke’nanga.
36 Mingka naballe-ballei ke’nanga Allata’ala, bicaranna ke’nanga sangnging balle-balle bawang.
37 Tena namajarre’ ke’nanga mae ri Ia siagang tena nata’gala’ jarreki parjanjianNa.
38 Mingka Nakamaseangi siagang Napammopporangi Allata’ala umma’Na, siagang tena Napapossoki ke’nanga. A’mole-molei Natahang larroNa, natena Napa’betteseki pangngalarroiNa.
39 Nau’rangi angkana anjo ke’nanga poro lamate ngasenji, sanrapang anging numalo tammotera.
40 Tamaka ma’mole-molena ke’nanga angngewa ri Ia, siagang napa’risi pa’mai’Na ri wattunna ri parang lompoa.
41 A’mole-molei ke’nanga naso’ri Allata’ala, nasusai Kaminang Matangkasaka, Allata’alana Israel.
42 Tangngu’rangiai ke’nanga ri kakoasanNa, ri allo nipakabebasa’na ke’nanga battu ri balinna,
43 ri wattunna appa’nia’ gau’-gau’ appakalannasa’ ri Mesir, siagang gau’-gau’ malompo ri parang Zoan.
44 Sikamma binangana ke’nanga napinrai a’jari cera’, sa’genna takkulleamo ke’nanga angnginungi je’ne’na.
45 Nasessai ke’nanga siagang jai katingalo, siagang nibalang parekangi buttana ke’nanga nipanraki ri tumpang.
46 Appabattui olo’ siagang katimbang, ampaccappuki kattoanna siagang wassele’ kokonna ke’nanga.
47 Napanraki poko’ anggoroka siagang bosi batu, poko’-poko’ arana ke’nanga siagang saliu’ a’batu.
48 Nalappassangi bosi eska antujui olo’-olo’ piarana ke’nanga, siagang nituju ri kila’ olo’-olo’ piarana ke’nanga.
49 Napa’betteseki kalarroanNa anrinra kamma pepe’ nampa Napabattu se’re pasukang malaeka’ kamateang sa’genna a’jari tappu’ pa’minasa ke’nanga.
50 Tena Natahangi larroNa yareka Nakarimangngi tallasa’na ke’nanga, mingka Naballassi ke’nanga siagang puru-puru lompo.
51 Nabunoi sikontu ana’ toa bura’nena ke’nanga lalang ri massing kaluargana tu Mesir.
52 Nampa Napimping umma’Na sanrapang pa’rappungang gimbala’, narurungang ke’nanga angngolo ri parang lompoa.
53 Amangi siagang tenamo namalla’ ke’nanga nipimping ri Ia, nampa musunna ke’nanga tallangi lalang ri tamparang.
54 Nampa Naerang umma’Na mange ri butta matangkasa’Na, ri moncong Narampasaka KalenNa.
55 Ri dallekanna umma’Na na Nabongka panduduka anjoreng nampa Nabage-bage anjo pa’rasanganga mae ri sikontu suku bansa Israel, umma’Na, sa’genna akkulle napammantangi ke’nanga kema-kemana musunna.
56 Mingka angngewai ke’nanga siagang naso’ri Allata’ala Kaminang Tinggia, tanaturukiai ke’nanga parenta-parentaNa.
57 A’jari bali ke’nanga sangkamma boe-boena ke’nanga, takkulleai nipatappa’ sanrapang jekkona anrong panaya.
58 Napa’ngarai ke’nanga Allata’ala ri tampa’ panynyombang barhalaya, napassereati Allata’ala siagang patung-patunna ke’nanga.
59 Nacini’na kammaya, tamaka larroNa Allata’ala, Natolla’ tojeng-tojemmi ke’nanga.
60 Nabokoimi KemaNa ri Silo, tampa’ pammantanganNa ri alla’na rupataua.
61 Nabalang parekangi Patti ParjanjianNa nialle ri musu; bate kala’biranNa nialle passa ri balia.
62 Larroi ri umma’Na, umma’ pisakaNa, Nabalang parekangi ke’nanga nibuno siagang pa’dang.
63 Turungkana ke’nanga nikanrei ri pepe’; tena ambuntingi tulolonna ke’nanga.
64 Nibunoi imang-imanna ke’nanga siagang pa’dang, takkuleai appiraung janda-jandana ke’nanga.
65 Jari ambangummi Batara sangkamma tau ambangunga ri tinrona, sanrapang tau gassing ri le’ba’na angnginung anggoro’.
66 Natunrungi ammunduru’ balinNa, na Nabeta ke’nanga sa’genna satunggu-tungguna.
67 Mingka Natollaki turunganna Yusuf siagang taNapileai suku Efraim.
68 Mingka Napilei suku Yehuda, siagang Bulu’ Sion Nangaia.
69 Nabangungi Balla’Na sanrapang pammantanganNa ri suruga, sanrapang lino, kassaka sa’genna satunggu-tungguna.
70 Napilei Daud atanNa, na Naalle battu ri alla’na olo’-olo’ piarana,
71 battu ri tampa’na ammarakai anrong gimbala’, untu’ angkalawaki Israel umma’Na.
72 Naparakai Daud ke’nanga siagang situlusu’ pa’mai’na, cara’deki Daud ampimpingi ke’nanga.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA