Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kaangguy pamimpinna koor. Menorot: Yedutun. Jaburra Asaf. (77-2) Sengko’ aera’ epakaja ka Allah; sengko’ aera’ epakaja, ban Allah meyarsa tang sowara.
2 (77-3) E dhalem karekongan sengko’ adu’a ka Pangeran; sengko’ ngangka’ tang tanang samalem benteng nyo’on ka Salerana tadha’ busenna, tape sengko’ ta’ nemmo panglepor ate,
3 (77-4) Bila sengko’ enga’ ka Guste Allah sengko’ aserro, bila sengko’ ker-mekker, tang ate sajan lesso.
4 (77-5) E baja malem sengko’ epata’ngeddha tedhung bi’ Pangeran, sengko’ ngalengsang sampe’ ta’ ngenneng acaca.
5 (77-6) Sengko’ mekkere re-are se la lebat, nga’-ngenga’e on-taon jaman lamba’.
6 (77-7) E baja malem sengko’ ker-mekker, ban atanya e dhalem ate,
7 (77-8) "Pangeran reya apa salanjangnga nolak sengko’ ban ta’ kasokan pole ka sengko’ reya?
8 (77-9) Apa Allah la ta’ taresna ka sengko’? apa Allah ta’ neptebbi dhabuna?
9 (77-10) Apa Allah la ta’ emot aparenga kabellasan? Apa Allah duka sampe’ ta’ kaagungan panganeser?"
10 (77-11) Sengko’ laju ngoca’, "Se paleng nyake’e tang ate iya areya Se Mahatenggi ta’ kobasa pole."
11 (77-12) Abdidalem ngemodana sadaja se elampa’agi Junandalem, GUSTE, ngemodana sadaja se ajib sareng se ane se elampa’agi Junandalem gi’ jaman dhimen.
12 (77-13) Abdidalem mekkerana sadaja se elampa’agi Junandalem, se talebat sae, se makasambu’ ate.
13 (77-14) Ya Allah, sadaja se elampa’agi Junandalem socce, tadha’ Allah se agung kajabana Junandalem, Guste.
14 (77-15) Junandalem Allah se mabadha kaajiban, kobasana Junandalem ampon enyata’agi e antarana sa-bangsa.
15 (77-16) Kalaban kakowadannepon Junandalem, Junandalem mabebas ommadda, toronannepon Yakub sareng Yusup.
16 (77-17) Nengale Junandalem aeng daddi tako’, Guste, padha ngetter sar-dhasarra tase’.
17 (77-18) Ondhem magaggar ojan, galudhuk saleng pajaggur; kelap saleng kareddhap dhari man-ka’dhimman.
18 (77-19) Galudhuk saleng pajaggur, kelap patang kareddhap, bume gundhek agaledder.
19 (77-20) Junandalem alomampa lebat e omba’, ngalebadi sagara se dhalem, namong lampadda padaepon ta’ katengal.
20 (77-21) Akadi oreng ngowan Junandalem nonton ommadda, kalaban parantara’anna Mosa sareng Harun.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA