Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bani pambobai koor. Bani si Jedutun. Psalm humbani si Asap. (77-2) Bani Naibata do laho sorangku, dilo-dilo do ahu hu Bani, bani Naibata do laho sorangku, ase itangihon ahu.
2 (77-3) Bani ari hasosakanku hupindahi do Tuhan; sai herbang do tanganku borngin seng marnamangadi; seng ra tarapoh tonduyhu.
3 (77-4) Taringat do ahu bani Naibata, gabe morong ma ahu; marpingkir-pingkir, gabe hurleh ma tonduyhu. Sela.
4 (77-5) Ipaturut Ham do bodak matangku, gabe bulinsah ma ahu, seng boi marsahap.
5 (77-6) Sai hupingkiri do panorang na basaia, taringat do ahu bani tahun na dob dokah salpu.
6 (77-7) Marsahap-sahap do ahu ibagas uhurhu borngin, marpingkir-pingkir do ahu anjaha manulimati tonduyhu.
7 (77-8) Mintor sadokah ni dokahni ma nani mangambukkon Tuhan, seng ulakan-Ni be nani maridop ni uhur?
8 (77-9) Sadokah ni dokahni ma nani rotap idop ni uhur-Ni, anjaha mintor masab ma bagah-bagah-Ni lanjar?
9 (77-10) Mintor lupa ma nani Naibata marontou ni uhur, atap na dob tarkunsi ma nani holong ni atei-Ni halani ringis-Ni? Sela.
10 (77-11) Jadi ningku do, “On do na papusok uhurhu, na mubah ai pambahenan ni Na Tang Sitimbulan in.”
11 (77-12) Sai dingatonku do pambahenan ni Jahowa; sai dingatonku do halongangan, na binahen-Mu humbani na basaia.
12 (77-13) Sai sahap-sahapkononku do sagala lahoan-Mu, anjaha sai hupingkir-pingkiri do pambahenan-Mu.
13 (77-14) Ham Naibata, pansing do dalan-Mu; ise ma sisombahon, na marhabanggalon songon Naibata?
14 (77-15) Ham do Naibata sihorjahon halongangan, domma ipataridahkon Ham gogoh-Mu bani bangsa-bangsa.
15 (77-16) Domma ipaluah Ham bangsa-Mu marhitei tangan-Mu, anak ni si Jakob pakon si Josep. Sela.
16 (77-17) Domma ididah sagala bah Ham, ale Naibata, domma ididah bah Ham, gabe godor, anjaha luhung pe hitir-hitir.
17 (77-18) Manguseihon bah do sagala hombun, mardobur longgur i awang-awang, anjaha panah-Mu mardejeb-dejeb.
18 (77-19) Marnunut do maraloling longgur-Mu, hilap-Mu pasiang dunia on, dugur anjaha duyug do tanoh on.
19 (77-20) Mardalan do Ham hun laut, bah banggal pasar-Mu, tapi ise pe lang manandai bokas-Mu.
20 (77-21) Ham do na manogu bangsa-Mu songon hulanan ni biribiri, marhitei tangan ni si Musa pakon si Aron.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA