Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Untu’ pamimping pakelong. Situru’ lagu: TeaKi’ papossoki. Pammujina Daud, ri wattunna nasuro Saul taua anjannangngi balla’na untu’ ambunoi. (59-2) O, Allata’alaku, Kipasalama’ laloa’ battu ri musu-musungku, Kijagaia’ battu ri tau eroka ambakkaia’.
2 (59-3) Kilappassanga’ battu ri tau a’gau’ ja’dalaka, pakabella’ battu ri tau pabunoa.
3 (59-4) Ciniki, naadanga’ ke’nanga ero’ ambunoa’, asse’rei tau pallaka ambalianga’; nateai passabakkang le’ba’na kugaukang dosaya yareka passabakkang nia’na kudakkai, o, Batara.
4 (59-5) Teai tongi lanri kasalangku, napparuru siagang sadia-sadia ngaseng ke’nanga.
5 (59-6) Ammenteng maKi’, Allata’ala Kaminang Tinggia, naKitulunga’. O, Allata’alana Israel, kalenTa anjari sa’bi. Ambangung maKi’ siagang Kihukkummi bansa-bansaya, TeaKi’ kamaseangi tau ja’dalaka, a’jari balia.
6 (59-7) Ri wattu karuenna ammotereki ke’nanga, nakantisi’ giginna sanrapang kongkong angkulilingi kotaya.
7 (59-8) Tulusu’ appiandere’na siagang nahinai taua ke’nanga; tarangi kana-kananna ke’nanga sanrapang pa’dang, nakana kapang ke’nanga tena allangngereki.
8 (59-9) Mingka Kikakkali ke’nanga, o, Batara, sikontu bansaya anjo Kicallai.
9 (59-10) IKattemi kagassingangku, manrannuanga’ mae ri Katte, iKatte tampa’ palariangku, o, Allata’ala.
10 (59-11) Lanri kabajikanNa Nabattu Allata’alaku mae ri nakke, Nalappassanga’ anciniki musungku nibeta.
11 (59-12) TeaKi’ bunoi ke’nanga, o, Batara, sollanna bansaku tena nakaluppai. Kipasimbungi siagang Kibetai ke’nanga siagang koasaTa, o, Batara, pa’la’langanna ikambe.
12 (59-13) Saba’ dorakai ke’nanga lanri kana-kananna; boli’mi kamma nialle ke’nanga ri sikko’ lalang katampoanna, lanri nangaina ke’nanga attunra siagang a’balle-balle.
13 (59-14) Kipossoki ke’nanga lalang pangngalarroinTa, o, Allata’ala, Kipossoki ke’nanga sa’genna cappu’. Namassing naasseng taua angkanaya Allata’ala ammarenta Israel, siagang pamarentahanNa a’la’bang ri sikontu linoa.
14 (59-15) Ri wattu karuenna ammotereki ke’nanga, pakantisi’ giginna sanrapang kongkong angkulilingi kotaya.
15 (59-16) A’la’bangi ke’nanga a’boya kanre, nappilollong la’bu punna tabassora.
16 (59-17) Mingka inakke akkelonga’ ri passala’na kagassinganTa; bari’-bari’basaka’ akkelong lompo sa’rangku ri passala’na pangngamaseanTa siagang tamamminraTa. Saba’ iKattemi tampa’ palariangku, tampa’ pa’la’langangku ri wattungku susa.
17 (59-18) O, Allata’ala, kagassingangku, akkelonga’ mammuji-muji mae ri Katte, saba’ iKattemi tampa’ pa’la’langangku, o, Allata’ala, mangngaiku.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA