Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kaangguy pamimpinna koor. Menorot nyanyeyan: Ja’ mamosna. Jaburra Daud, e bakto Saul makon oreng ngawase kalenggiyanna Daud se epateyana. (59-2) Ya Allah, nyo’ona salamet abdidalem dhari sadajana moso, Guste, aobi abdidalem dhari reng-oreng se nyerrang abdidalem.
2 (59-3) Pasalamettagi abdidalem dhari oreng se jahat, palopottagi abdidalem dhari oreng se dujan mate’e oreng.
3 (59-4) Oladi, reng-oreng ka’dhissa’ padha ngaddhang mateyana abdidalem, reng-oreng se kejjem asakongkel ngamoso abdidalem. Mangkana banne lantaran abdidalem alako dusa otabana ta’ atoro’ ka papakon, GUSTE.
4 (59-5) Jugan banne lantaran kasala’an abdidalem, reng-oreng gapaneka ru-kaburu padha aya-sadhiya.
5 (59-6) Ngereng ngadek, PANGERAN, Allah Se Mahakobasa, tolong abdidalem Ya Allah Isra’il, ngereng oladi dibi’. Ngereng ngadek sareng okommagi sa-bangsa sadajana, ja’ kaneserre reng-oreng jahat se akiyanat.
6 (59-7) E bakto para’ compet are reng-oreng gapaneka abali, adherreng akadi pate’ sambi alengleng e kottha.
7 (59-8) Reng-oreng gapaneka terros mon-semmonan sareng nye-ngenye; cacana tajem akadi peddhang, nyangka tadha’ oreng se mereng.
8 (59-9) Tape sareng Junandalem reng-oreng gapaneka ekala’-gella’, GUSTE, sadajana bangsa gapaneka sareng Junandalem eya-seya.
9 (59-10) Junandalem kakowadan abdidalem, Junandalem se earep abdidalem, Junandalem pangongseyan abdidalem, Guste Allah.
10 (59-11) Lantaran kabecce’anna tang Allah rabu manggi’i sengko’ reya; sengko’ epanangale tang moso epakala.
11 (59-12) Ja’ pate’e reng-oreng gapaneka, Guste, sopaja bangsa abdidalem ta’ loppa’a. Pasalebbudan sareng pakala reng-oreng gapaneka sareng kobasaepon Junandalem, Guste pangaoban abdidalem sadajana,
12 (59-13) Sabab reng-oreng gapaneka dusa lantaran cacana; dinggal sadajana me’ padha tajira’ e dhalem kasombonganna, sabab reng-oreng gapaneka dujan abasto sareng lecek oca’na.
13 (59-14) Guste Allah, pamateyagi reng-oreng gapaneka e bakto Junandalem duka, pamateyagi kantos tadha’ karena. Daddi sadajana oreng tanto oneng ja’ Allah marenta Isra’il, ban pamarenta’annepon malebar saantero bume.
14 (59-15) E bakto para’ compet are, reng-oreng gapaneka abali, adherreng akadi pate’ sambi alengleng e kottha.
15 (59-16) Reng-oreng gapaneka alengleng nyare teddha’an, manabi ta’ kennyang padha rak-dharagan.
16 (59-17) Namong abdidalem anyanye parkara kakowadannepon Junandalem; sabban gi’ laggu abdidalem anyanye epakaja parkara kataresna’an sareng kaestowannepon Junandalem. Sabab Junandalem pangongseyan abdidalem, kennengnganna abdidalem nyare pangaoban e bakto sossa.
17 (59-18) Ya Allah, kakowadan abdidalem, abdidalem anyanye nyanyeyan-nyanyeyan pojiyan kaagem Junandalem, sabab Junandalem pangaoban abdidalem, Guste Allah, se kataresnan.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA