Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Untu’ pamimping pakelong. Situru’ lagu: Bodobangkeng pepea, battu ri daera bella. Pammujina Daud ri wattunna nijakkala’ ri tu Filistin ri daera Gat. (56-2) Kamaseanga’, o, Allata’ala, lanri nibundukia’, tulusu’ nijallakkanga’ ri musu-musungku.
2 (56-3) Sila’busu’ alloa’ nionjo’-onjokang ri balingku; jai ammusua’, o, Allata’ala Kaminang Tinggia.
3 (56-4) Ri wattungku malla’, manrannuanga’ ri Katte.
4 (56-5) Mammujia’ ri Allata’ala lanri apa le’baka Napa’janjiang; tappaka’ ri Ia, jari tena kumalla’, tena pakkullena rupataua mae ri nakke.
5 (56-6) Sila’busu’ alloi musua angkacoi parkaraku tulusu’ usahana ke’nanga ero’ ancilakaia’.
6 (56-7) A’rappungammi ke’nanga ri tampa’ taccokkoa, anjannangngi sikontu panggaukangku, siagang a’boya kasampatang untu’ ambunoa’.
7 (56-8) Maka nia’ kasalamakkang untu’ kaja’dallanna ke’nanga? Kiancuru’ lalomi ke’nanga lalang larroTa, o, Allata’ala!
8 (56-9) Kibilang-bilangi allo-allo pa’la’bakkangku, na Kiasseng siapa jaina je’ne’ matangku; tenaka naKibilangi anjo?
9 (56-10) Ri allo akkiokku mae ri Katte, lanitunrungi ammunduru’ musua, saba’ kuassengi angkana agang mae ri nakke Allata’ala.
10 (56-11) Mammujia’ mae ri Karaeng Allata’ala, lanri apa le’baka Napa’janjiang.
11 (56-12) Tappaka’ ri Ia, jari tena kumalla’, tena pakkullena rupataua mae ri nakke.
12 (56-13) Lakurupai janjingku mae ri Katte, o, Allata’ala, na kuassare koro’bang sukkuru’ mae ri Katte.
13 (56-14) Saba’ iKatte allappassanga’ battu ri kamateanga, Kijagaia’ sollanna tena kutu’guru’. Jari akkullema’ attallasa’ lalang ri pa’la’langanNa Allata’ala, lalang caya ansingariai sikontu tallasakku.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA