Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Pammujina Asaf. Batara, Allata’ala Kaminang Koasaya, a’bicarai; akkioki mae ri sikontu linoa battu iraya sa’genna kalau’.
2 Battu ri Sion, kota kaminang ga’gaya, ammumbai Allata’ala siagang cayaNa.
3 Battui Allata’alata siagang talammantangai a’mereki, a’jappa rioloi ri pepe’ a’lepa’-lepaka, nikulilingi ri angnging sannaka lompona.
4 Nakioki langika siagang buttaya untu’ ansa’bi Naadeli umma’Na.
5 Nakana, "Passe’rei sikontu ummakKu, le’baka appare’ parjanjiang siagang iNakke, nipakajarreka siagang koro’bang nipolong."
6 Langika angkabarrangi angkanaya Naadeli Allata’ala umma’Na, angkana KalenNa Allata’ala hakinna.
7 "Pilangngeri, ikau ummakKu, erokKa’ a’bicara, Israel, eroki Kusa’bi mae ri kau ngaseng; iNakke anne Allata’ala, Allata’alanu.
8 Teai passabakkang koro’bannu naKutuntukko; koro’bang nitununu tuli nia’na ri dallekangKu.
9 Teai sapi battu ri baranu Kuparalluang, yareka bembe battua ri pa’rappunganna olo’-olo’ piaranu;
10 saba’ sikontu olo’-olo’ niaka ri romang iNakke ngaseng pata, siagang olo’-olo’ piara niaka ri assa’bu-sa’bua moncong.
11 Sikontu jangang-jangang niaka ri moncong iNakke todong pata, kammayatompa sikontu olo’-olo’ attallasaka ri parang lompoa.
12 Punna cipurukKa’, taparalluai Kupau mae ri kau, saba’ linoa siagang sikontu bonena iNakke pata.
13 Tena Kungnganre dageng sapi laki, tena todong Kungnginung cera’ bembe laki.
14 Assare mako koro’bang sukkuru’ mae ri Allata’ala, rupai janjinnu mae ri Kaminang Tinggia.
15 Akkiokko mae ri Nakke ri wattu kasukkarang, iNakke lallappassangko, siagang lamammujiko mae ri Nakke."
16 Mingka mae ri tu ja’dalaka Nakana Batara, "Ikau tena ha’nu antappui hukkungKu, siagang a’bicara ri passala’na parjanjiangKu.
17 Saba’ taerokako antarimai pappakaingakKu, siagang nutollaki parenta-parentaKu.
18 Punna accinikko sitau palukka’, amminawangko ri ia, siagang sileporangko siagang tau nangaia a’gau’ salimara’.
19 Ikau tuli kana ja’dalaka nupau, siagang tuli sadiako annipu.
20 Ikau tulusu’ nupitinai sari’battannu, nupakka’-pakkanai sari’battang tangka’nu.
21 Iaminjo nugaukang, mingka a’merekijA’ bawang, jari nupikkiri’mi angkana sangkammA’ ikau. Mingka kamma-kamma anne Kucallako, na yangasenna anjo Kupa’nyatai mae ri kau.
22 Parhatikangi, ikau ngaseng takkaluppaya mae ri Allata’ala; tutuko, gassingka Kuposso’ ngasengko, na tena ampasalamakko.
23 Tau assarea koro’bang sukkuru’ salaku koro’banna, iami ampakalompoA’, siagang mae ri tau appasadiaya oloang laKupicinikiangi kasalamakkang battua ri Nakke."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA