Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Masmur Asap. Ngerana TUHAN Dibata si Mada Kuasa, IlebuhNa kerina doni enda, i kepultaken nari terus ku kesunduten.

² Dibata ersinalsal i Sion nari, kota si mejile la teralang.

³ Reh me Dibatanta, labo Ia sinik saja, api si merawa ngelebei Ia, dingen angin kalinsungsung ngkelewetisa.

⁴ Langit ras doni IdiloNa, guna naksiken Ia ngerunggui BangsaNa.

⁵ Isuruhna gelah ipepulung kerina BangsaNa i adep-AdepenNa, bangsa si nggo erbahan iketen perpadanen ras Ia, alu mereken persembahen man BaNa.

⁶ Langit ermomo kerna kebenaren Dibata maka bujur kap KeputusenNa.

⁷ "O Israel, ngerana ateKu man bandu, o kam bangsangKu kerina, dengkehkenlah. Kusaksiken ateKu man bandu, Aku kap Dibata, Dibatandu.

⁸ Labo erkiteken persembahenndu kam Kuukum, persembahen tutungenndu lit nge lalap i lebengKu.

⁹ Lembu i bas karang lembundu la Aku perlu, kambing i bas rarasenna la Aku merhat.

¹⁰ Sabap sikerajangenKu nge kap rubia-rubia i kerangen, bage pe asuh-asuhen i das deleng-deleng si meribu-ribu.

¹¹ Aku nge empuna kerina perik-perik i bas awang-awang, bage pe kerina si nggeluh i mbalmbal si mbelang.

¹² Adi melihe Aku, la bandu Kupindo, sabap Aku kap empuna doni ras kerina si lit i je.

¹³ Kupan kin daging jenggi lembu? Ntah Kuinem kin dareh kambing?

¹⁴ Bahanlah pengataken bujur jadi persembahen man Dibata, sehkenlah kai si nggo ipadankenndu man si Meganjangna.

¹⁵ Erlebuhlah man bangKu tupung kam i bas kiniseran; Aku si nampati kam, jenari ipujindu me Aku."

¹⁶ Tapi nina TUHAN man kalak jahat, "Ngkai maka ibelaskenndu perentah-perentahKu? Kai urusenndu ncakapken perpadanKu?"

¹⁷ Nembeh atendu adi Kupandang kam, itulakndu perentahKu.

¹⁸ Erteman kam ras tep-tep pinangko si idahndu, bage pe ras kalak si perlua-lua.

¹⁹ Si jahat usur ibelaskenndu, la pernah kam alang-alangen erbahan taki pacik.

²⁰ Katawari pe icekurakindu seninandu, dingen idaram-daramindu kesalahen.

²¹ Ilakokenndu e kerina tapi sinik saja Aku; emaka isangkandu seri biakta. Tapi genduari Kurawai kam, dingen ateKu erpekara ras kam.

²² Dengkehkenlah, o kam si nggo lupa man Dibata. Jaga maka ula sempat kam ikernepken, jenari ise pe la lit sinampati kam.

²³ Ngataken bujur eme persembahen si pehagaken Aku janah si patuh ngikutken Aku tentu Kukelini.