Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Molja’agi PANGERAN! Sabab becce’ ngagungngagi Salerana, ban anyanye ngagungngagi Salerana masenneng ate ban pekkeran.

² PANGERAN mabali Yerusalim akantha asalla; abakta mole reng-oreng buwangan.

³ Salerana mabaras oreng se kaelangan pangarebban, sarta abetbet ka-lokana.

⁴ Pangeran se nantowagi bannya’na bintang e langnge’, se apareng nyama ka tong-settongnga.

⁵ Agung ban kobasa onggu Pangeran sengko’ ban ba’na, kabicaksana’anna tadha’ engganna.

⁶ Oreng se tatendhes epajaga, tape oreng se jahat ebantengngagi ka tana.

⁷ Mara anyanye ji-pojiyan kaator ka PANGERAN, tabbu calempongnga kaator ka Allahna sengko’ ban ba’na.

⁸ Salerana se ngampar ondhem e langnge’; se nyadhiya’agi ojan kaangguy bume, ban matombu rebba e mo’-gumo’.

⁹ Pangeran jareya se apareng kakan ka ban-keban, ban ka budhu’na dhangdhang se lok-ologan.

¹⁰ Se ekasokane Pangeran banne jaran se kowat; ban banne parjurit se bangalan.

¹¹ Se ekasokane Pangeran oreng se ta’at ka Salerana, ka oreng se teptep ngarep kataresna’anna.

¹² Mara molja’agi PANGERAN, Yerusalim! Molja’agi Allahna ba’na, Siyon!

¹³ Sabab Salerana makoko bang-labang sakethengnga ba’na, ban aberkadi pandhudhu’na.

¹⁴ Salerana ajaga dhaerana ba’na sopaja teptebba aman, makennyang ba’na ban gandum se paleng bagus.

¹⁵ Salerana apareng papakon ka bume, dhadhabun jareya laju duli elakone.

¹⁶ Salju epatoron akantha kapas, ebbun etabur akantha abu ban tana.

¹⁷ Salerana matoron ojan es akantha baliker; tadha’ se kellar nahan cellebba.

¹⁸ Kalaban dhabuna es jareya laju ancar; aeng nyerroppagi, aeng laju agili.

¹⁹ Salerana apareng pessen ka ommadda, kateptebban ban hokomma ka ommat peleyanna.

²⁰ Ka sa-bangsa laen Pangeran ta’ kantha jareya, sabab sa-bangsa jareya ta’ kennal ka kom-hokomma. Molja’agi PANGERAN!