Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Battu ri Daud. Pujimi Batara pa’la’langangku! Ia angngajaraka’ a’bundu’, siagang allatia’ assiba’ji.
2 Ia antulunga’ siagang angngalleanga’, ampasalamaka’ siagang tampa’ pa’la’langangku. Ia pa’la’langangku, tampa’ palariangku, napantuduki bansa-bansaya mae ri nakke.
3 O, Batara, apa todong anjo rupataua naKiparhatikangi? Inaika ia sa’genna Kijampangi?
4 Anjo rupataua sanrapanji anging mammiri’, sanrapang bayang-bayang allaloa, kammaminjo tallasa’na.
5 O, Batara, Kisungkei langitTa siagang naung maKi’, Kisentoki moncong-monconga sollanna a’rumbu.
6 Kipasambilai kilatTa sollanna tassimbung-simbung musua, Kipabuccuki ana’ panaTa sollanna gegere’ ke’nanga.
7 Kipajonjoi limanTa battu ri suruga, na Kilappassanga’ battu ri a’baya. Kipasalamaka’ battu ri kakoasanna bansa maraenga
8 nangaia a’balle-balle siagang annipu siagang appare’ sumpa nipare’-pare’.
9 Lakkelonga’ kelong beru mae ri Katte, o, Allata’ala, kuko’bi’ kacapia nampa akkelonga’.
10 Kisarei pammetang sikamma karaenga, siagang Kilappassang atanTa Daud.
11 Kilappassanga’ battu ri pa’danna tau pallaka; Kipasalamaka’ battu ri kakoasanNa bansa maraenga nangaia a’balle-balle siagang annipu, siagang appare’ sumpa nipare’-pare’.
12 Tapporo ana’-ana’ bura’neta ri wattu rungkana sanrapangi lamung-lamung a’bakka’ lompo. Tapporo ana’-ana’ baineta sanrapang benteng ga’ga, ambelo-beloi sikontu benteng balla’ lompoa.
13 Poro rassi ngaseng bonena sikontu gudanta rassi siagang sangka’ rupa wassele’ butta. Poro sikamma gimbalatta ri paranga a’bija sa’genna appulo sa’bu jaina.
14 Poro sikamma sapita pila’ katambangi natena tappela’ yareka mate ammana’. Poro tena kalangngerang sa’ra tau pa’risi’ ri sikamma oloanga ri kotata.
15 Mate’nei bansa kammaya anjo, Mate’nei umma’ Allata’alaya Batarana!
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA