Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Humbani si Daud. Napuji ma Jahowa, dolog batu bangku, na mangajari tanganku marporang, sonai jari-jaringku marmunsuh;

² hagogohon ampa batar-batar bangku, bentengku ampa Sipaluah ahu, gantarhu ampa hatengeran ni uhurhu, na patundukkon bangsa-bangsa hu toruh ni kuasangku.

³ Ham Jahowa, aha ma jolma in, ase ipardiatei Ham ia, anjaha anak ni jolma in, ase idingat Ham ia?

⁴ Doskon logou tumang do jolma, ari-arini usih songon halinoh na mamontas.

⁵ Ale Jahowa, ondun Ham ma langit-Mu anjaha turun ma Ham; jamah Ham ma dolog-dolog in, ase martimus.

⁶ Sampakkon Ham ma hilap-Mu anjaha paerap Ham ma sidea; siarhon Ham ma panah-Mu anjaha pardakdak Ham ma sidea.

⁷ Surdukkon Ham ma tangan-Mu hun datas, rotap Ham ma ahu, anjaha paluah Ham ma ahu humbani bah marbanggal, humbani kuasa ni halak na legan,

⁸ na tongtong manluarhon hata ladung babahni. anjaha tangan siamunni tangan panipuon do.

⁹ Ham Naibata, sihol dodingkononku do doding na bayu Bamu, anjaha sihol pujionku do Ham marhitei husapi sisapuluh tali.

¹⁰ Ham sibere hamonangan bani raja-raja, anjaha na paluahkon si Daud, juakjuak-Mu, humbani podang hamagouan,

¹¹ rotap anjaha paluah Ham ma ahu humbani kuasa ni bangsa na legan, na tongtong manluarhon ladung babahni, anjaha tangan siamunni tangan panipuon do.

¹² Sai songon suan-suanan ma anakta, na dulas marganjang bani haposoonni, anjaha borunta songon basikah parsuhi, na niuhirhon bani rumah bolon.

¹³ Sai gok ma tuanganta, padaratkon bagei-bagei ni sipanganon, marribu-ribu ma biribirinta, marlaksa-laksa bani sampalanta.

¹⁴ Sai mombur-mombur ma lombunta, ulang mahua-mahua, ulang molei, anjaha ulang ma dong na tangis i alamanta.

¹⁵ Martuah ma bangsa na sonin untungni, martuah ma bangsa, na mar-Naibatahon Jahowa.

Mazmur

Video Mazmur 144

Ikuti Kami:

KONTAK | PARTISIPASI | DONASI