Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Bani pambobai koor. Sada Psalm humbani si Daud. Ham Jahowa, ipareksa Ham do ahu, anjaha itanda Ham do.
2 Ibotoh Ham do atap na hundul atap na jongjong ahu; iarusi Ham do pingkiranku humbani na daoh.
3 Pardalanku atap parpodomku itulimati Ham do, haganup do dalanku ibotoh Ham.
4 Tongon seng dong hata bani dilahku, sabonarni, ganup do ibotoh Ham, ale Jahowa.
5 Hun pudi pakon hun lobei iinggoti Ham do ahu, inahkon Ham do tangan-Mu bangku.
6 Halongangan botul do bangku habotohan in, magijangtu, seng tardungdung ahu.
7 Huja ma ahu laho manimbili tonduy-Mu, anjaha huja ma ahu lintun manlembangi bohi-Mu?
8 Porini naik ma ahu hu nagori atas, ijai do Ham; Porini hubahen podomanku i nagori toruh ijai do Ham.
9 Porini hupakei bangku habong ni buha siang ari, sihol sogop ahu hu ujung ni laut,
10 ijai pe tangan-Mu do na manangkap ahu, anjaha ijolomi tangan siamun-Mu do ahu.
11 Porini huhatahon, “Na golap ma manrungkub ahu, anjaha gabe borngin ma na lihar in bangku!”
12 Jadi hagolapan ai pe seng golap Bamu; marsinondang do borngin songon arian, na golap usih songon na lihar.
13 Ai Ham do na manjadihon piah-piahku, itonun Ham do ahu ibagas partapaan ni inang,
14 Ham do pujionku, halani halongangan do parjadingku; halongangan do pambahenan-Mu, anjaha torang do ai ididah tonduyhu.
15 Seng ponop holi-holingku i lobei-Mu, sanggah na ijadihon ahu bani na ponop, sanggah na itonun ahu i partapaan ni inang.
16 Sanggah solat ope ahu domma ididah panonggor-Mu, domma tarsurat ganupan ai ibagas buku-Mu, domma ibuhul ari-aringku sanggah lape adong age sada.
17 Mahol do bangku pingkiran-Mu, Ham Naibata! Buei tumang do bilanganni.
18 Porini sihol hiraonku, bueian do ai ase horsik; anggo puho ahu tong ope ahu i lambung-Mu.
19 Ambit ibunuh Ham ma, ale Naibata, halak parjahat; anjaha ambit surut ma humbangku halak sionsop daroh,
20 na manlawan dompak Ham marhitei akal-akal, na jongjong mangimbang Ham ibagas hajahaton.
21 Mintor lang ma sogam uhurhu, ale Jahowa, mangidah halak na marsogam ni uhur Bamu; anjaha mintor lang ma magigi ahu, mangidah halak na manlawan dompak Ham?
22 Das do sogam ni uhurhu mangidah sidea, munnsuh do sidea bangku.
23 Pareksa Ham ma ahu, ale Naibata, anjaha tanda Ham ma uhurhu! Uji Ham ma anjaha tanda Ham ma pingkiranku!
24 Kawahkon Ham ma atap dong mardalan ahu bani dalan hamagouan; togu Ham ma ahu bani dalan sisadokah ni dokahni.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA