Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ I bas Daud nari. O TUHAN, nggo IujiNdu aku, janah IetehNdu kerina kerna aku.

² Kerina si kubahan IetehNdu, i dauh-dauh nari nggo IetehNdu isi pusuhku.

³ Idahndu aku, subuk aku sanga erdahin ntah ngadi, kerina si kubahan IetehNdu kap.

⁴ Ope denga pe aku ngerana, nggo leben IetehNdu kai ateku kubelasken.

⁵ IkelewetiNdu aku; alu KuasaNdu IkawaliNdu aku.

⁶ Mbagessa PenandaiNdu kerna aku, lanai terjaka perukurenku si e.

⁷ Ku ja aku lawes maka aku pulah i bas Kam nari? Ku ja kukiamken maka aku ndauh i bas adep-AdepenNdu nari?

⁸ Adi nangkih aku ku langit, nggo Kam i je, adi aku medem i bas doni kematen, Kam pe i je.

⁹ Kune aku kabang kempak matawari pultak, ntah ringan aku i bas ingan si ndauh i matawari ben,

¹⁰ i je pe aku ItaruhkenNdu, i je pe TanNdu nge si negu-negu aku.

¹¹ Aminna kupindoken maka ikeleweti gelap aku, ntah terang si lit i sekelewetku jadi berngi,

¹² tapi gelap e pe labo man BaNdu gelap, dingen berngi ersinalsal man BaNdu bagi suari, suari ntah berngi seri saja nge man BaNdu.

¹³ Kam si njadiken tep-tep bagin i bas badanku, IbentukNdu aku i bas bertin nandeku.

¹⁴ Kupuji Kam erkiteken KinirejinenNdu, mejin dingen la iangkai PerbahanenNdu tendingku enggejapken si e kerina.

¹⁵ Tupung tulan-tulanku ijadiken, alu megermet isusun i bas bertin nandeku, asum reh belinna aku i je alu la ise pe metehsa, i je pe IdahNdu nge aku.

¹⁶ Ope denga aku tubuh pe nggo aku ItandaiNdu, kerina wari-wari geluhku nggo isuratken i bas KitapNdu, ope denga wari-wari geluhku e ibenaken pe.

¹⁷ O Dibata, andiko serana ngukuri PerukurenNdu, PerukurenNdu metahatsa kuakap nangkelisa.

¹⁸ Adi kubeligai, buen kap e asangken kersik. Kune keke aku, ras Kam denga nge aku.

¹⁹ O Dibata IbunuhNdu min kalak jahat, janah kalak si nggit ngamburken dareh, nadingken aku min.

²⁰ Ibelasken kalak perkatan si jahat kerna Kam, jahat rananna kerna Kam dingen ijurukenna pe GelarNdu.

²¹ O TUHAN, nembeh kal ateku man kalak si ernembeh ate man BaNdu, ciga ateku man kalak si ngelawan Kam.

²² Nembeh ateku man bana lanai teralang, emaka imbangku nge ia kuakap.

²³ Pepayolah aku o Dibata, tandailah pusuhku, uji dingen datkenlah perukurenku.

²⁴ Pepayolah ntah mawen lepak dalan si kudalani, jenari babailah aku arah dalan si tetap rasa lalap.