Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Untu’ pamimping pakelong. Pammuji battu ri Daud. O, Batara, iKatte antarrusia’ siagang angngassenga’.
2 IKatte angngassengi sikontu panggaukangku; battu bellaKi’ naKipahang pikkirangku.
3 IKatte ancinikka’, baji’ ri wattungku anjama yareka wattungku ammari-mari, iKatte angngassengi sikontu apa kugaukanga.
4 Ba’lalo ri tenanapa ku’bicara, Kiasseng la’bi rioloi apa lakupaua.
5 IKatte angkulilingia’ battu ri kere-keremae, siagang Kila’langia’ lalang koasaTa.
6 Tamaka lantanna mae ri nakke anjo pangngassenganTa, tanirapikai ri pikkirangku.
7 Kemae lakkulle kulampai nakukkulle ta’lappasa’ battu ri kakoasanTa? Kemaea’ lakkulle lari ampakabellai kalengku battu ri dallekanTa?
8 Punna naikka’ ri langika, niakKi’ anjoreng, punna attinroa’ ri lino kamateanga, nia’ tongki’ anjoreng.
9 Punna anri’bakka’ allalo ri bangkeng langi’ iraya yareka ammantang ri cappa’ lau’ kaminang bellaya,
10 manna anjoreng nia’ tongKi’ antulunga’; anjoreng limanTa todong anrenrenga’.
11 Punna kupala’ sollangku nikalimbuki ri sassang, na’jari bangngi singara’ niaka ri tammuliliku,
12 anjo kasassangnganga tena todong nasassang mae ri Katte; anjo bangngia singaraki sangkamma ri alloa, na anjo sassanga sangkammai singara’.
13 Kipa’jari sikamma bageang-bageang niaka ri tubuku, na Kiparekka’ lalang ri pammanakkanna ammakku.
14 Mammujia’ ri Katte saba’ inakke teai sipato’ hebakku! Sikontu gautTa appakalannasaki siagang tamaka lompona, sanna’ kupahang tojenna anjo sikammaya.
15 Wattunna Kipa’jari buku-bukungku, Kiatoro’ bajiki lalang ri pammanakkanna ammakku, nampa abakkaka’ anjoreng lalang rahasia, na tena kutaccokko mae ri Katte.
16 Kicinikka’ ri wattungku lalang ija ri battang; yangasenna Kicataki lalang ri kittatTa; Kipattantumi allo-allo lanadallekanga ri tenanapa manna se’re nipakaramulai.
17 Tamaka sukkara’na nipahang pikkiranTa mae ri nakke, o, Allata’ala, siagang tamaka jaina lanirekeng!
18 Punna kurekeng, jaiangngangi na kassika; punna ambangunga’, tuli iKatte kunawa-nawa.
19 Poro kitumpasa’ lalo tau ja’dalaka, o, Allata’ala, Kipakabellai battu ri nakke tau appasolonga cera’!
20 Nacarita ja’dalakKi’ ke’nanga, siagang assumpa nipare’-pareki ke’nanga lanri kota-kotaTa.
21 O, Batara, kukabirisi tau birisika mae ri Katte, lussaki pa’maikku mae ri tau angngewaya mae ri Katte!
22 Sanna’ kukabirissinna ke’nanga, siagang kupare’ musui ke’nanga.
23 Kisalidikia’ o, Allata’ala, kitarrusi pa’maikku, so’ria siagang Kiassemmi pikkirangku.
24 Kicinikimi gassingka nia’ kaja’dallang lalang ri kalengku, siagang kirenrenga’ mae ri oloang mannannunganga.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA