Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kaangguy pamimpinna koor. Jaburra Daud. GUSTE, Junandalem nalektegi abdidalem sareng ngagali kabadha’annepon abdidalem.
2 Junandalem ngagali sadaja se elakone abdidalem; dhari jauna Junandalem ampon ngagali ponapa se epekker abdidalem.
3 Junandalem ngoladi abdidalem, e bakto abdidalem alalakon otaba bu-ambu lesso, Junandalem ngagali sadaja se elakone abdidalem.
4 La’-mala’ sabellunnepon abdidalem acaca, Junandalem ampon ngagali ponapa se ekoca’agiya abdidalem.
5 Abdidalem ekalenglenge Junandalem dhari sadajana paddu, eaobi kalaban kobasaepon Junandalem.
6 Pangataowannepon Junandalem ka’dhinto monggu ka abdidalem talebat dhalemma, pekkeran abdidalem ta’ bisa ngarte.
7 Ka ka’dhimma abdidalem nyengga’a sopaja lopoda dhari kobasaepon Junandalem? Ka ka’dhimma abdidalem se buruwa ajauwi Junandalem?
8 Manabi abdidalem ongga ka langnge’, Junandalem badha e ka’issa’; manabi abdidalem tedhung e dunnyana oreng mate, Junandalem badha jugan e kennengngan gapaneka.
9 Manabi abdidalem ngabber lebat e konco’ temorra langnge’ otabana enneng e konco’ bara’na,
10 e ka’dhissa’ Junandalem tanto badha jugan se nolonga abdidalem; e ka’dhissa’ Junandalem tanto badha jugan se nontona abdidalem.
11 Manabi abdidalem makon petteng notobi abdidalem, otabana tera’ e sakalenglengnga abdidalem aoba daddi malem,
12 se petteng gapaneka ta’ petteng monggu ka Junandalem; malem gapaneka tera’ akadi seyang, se petteng akadi terrang.
13 Junandalem nyepta’agi saneyap bagiyan badan abdidalem, abadhi abdidalem e dhalem gandhu’annepon ebu.
14 Abdidalem ngagungngagi Junandalem sabab Junandalem talebat lowar biyasa! Sadaja se elampa’agi Junandalem ajib sareng makasambu’ ate, abdidalem apangrasa onggu parkara gapaneka.
15 E bakto lang-tolang abdidalem epadaddi, ebung-sambung epatete e gandhu’annepon ebu, e bakto abdidalem e gandhu’annepon ebu atamba raja ta’ kalaban ekaonenge oreng, abdidalem paddhang ka Junandalem.
16 Junandalem ngoladi abdidalem e bakto abdidalem gi’ badha e dhalem gandhu’annepon ebu; sadajana ampon ecathet e ketappepon Junandalem; re-arena ampon etantowagi sabellunnepon badha se emolae.
17 Ya Allah, panggaliyannepon Junandalem ce’ malaradda monggu ka abdidalem, sareng talebat bannya’na!
18 Manabi sareng abdidalem ebitong, abannya’an dhari beddhi; manabi abdidalem jaga tedhung, abdidalem gi’ mekkere Junandalem.
19 Ya Allah, patompessagi reng-oreng jahat, pajauwagi dhari abdidalem reng-oreng se dujan mate’e oreng!
20 Reng-oreng gapaneka acaca juba’ parkara Junandalem, sareng asompa palsu bit tha-kotthaepon Junandalem.
21 GUSTE, abdidalem baji’ ka reng-oreng se baji’ ka Junandalem, abdidalem caremmet ka reng-oreng se ta’ atoro’ ka Junandalem.
22 Abdidalem ce’ baji’na ka reng-oreng gapaneka, sareng abdidalem eanggep moso sadajana.
23 Talektegi abdidalem, Guste Allah, oladi essena ate ka’dhinto, ojiyagi abdidalem, sopaja Junandalem ngagali ka pekkeran abdidalem.
24 Oladi manabi badha kajahadan e aba’ abdidalem, sareng tontonnagi abdidalem e jalan se langgeng.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA