Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Haleluya! Puji ma goran ni Jahowa, puji ma, ale juakjuak ni Jahowa,

² nasiam na jongjong i rumah ni Jahowa, i alaman ni rumah ni Naibata.

³ Puji nasiam ma Jahowa, ai pardear layak do Jahowa; dodingkon nasiam ma goran-Ni, ai jenges do in.

⁴ Ai Jakob do ipilih Jahowa Bani, sonai Israel bahen parbagianan-Ni.

⁵ Tongon hubotoh do: Banggal do Jahowa: Tuhannami, iatasi do sagala naibata-naibata.

⁶ Sagala na hinarosuhkon ni Jahowa, ipasaud do i langit pakon i tanoh on, ibagas laut pakon ibagas ianan na bagas-bagas:

⁷ Ipanaik do hombun humbani ujung ni tanoh on, ibahen do hilap bani udan, ipadarat logou humbani kamar-Ni;

⁸ ibogbog do bunga tubuh ni Masir, jolma sonai age pinahan;

⁹ itongos do tanda pakon halongangan hu tongah-tongah ni Masir, laho mangimbang Parao pakon sagala juakjuakni;

¹⁰ ibogbog do buei bangsa-bangsa, anjaha ibunuh raja-raja na markuasa;

¹¹ ai ma si Sihon, raja ni halak Amori, si Og, raja ni Basan, ampa haganup Raja Kanaan;

¹² ibere do tanoh ni sidea bahen parbagianan, parbagianan ni halak Israel bangsa-Ni in.

¹³ Ham Jahowa, ronsi sadokah ni dokahni do goran-Mu! Ham Jahowa, marsundut-sundut do pardingatan Bamu.

¹⁴ Tongon, ipintori Jahowa do bangsa-Ni, marulak-ulakan do uhur-Ni dompak juakjuak-Ni.

¹⁵ Sisombahon ni parbegu ai ma pirak pakon omas, jadi-jadian ni tangan ni jolma.

¹⁶ Dong do babahni, tapi seng boi marsahap, dong do matani, tapi seng marpangidah;

¹⁷ dong do pinggolni, tapi seng marpanangar, tongon, seng dong hosah ibagas babahni.

¹⁸ Sai songon sidea ma halak na paulihonsi, sagala halak na martenger ni uhur hujai.

¹⁹ Ale rumah ni Israel, puji ma Jahowa! Ale rumah ni si Aron, puji ma Jahowa!

²⁰ Ale rumah ni si Lepi, puji ma Jahowa! Ale sihabiari Jahowa, puji ma Jahowa.

²¹ Tarpuji ma Jahowa hun Sion, Ia na marianan i Jerusalem! Haleluya!