Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Pujimi Batara! Pujimi arenNa Batara, he ikau ngaseng ata-atanNa

² a’gau’ ibadaya ri Balla’Na Batara ri pammantanganNa Allata’alata.

³ Pujimi Batara, saba’ Ia bajiki, pujimi arenNa, saba’ lammoro’ pa’maiki.

⁴ Napilei Yakub untu’ KalenNa, umma’ Israel Napa’jari Ia ampatangi.

⁵ Saba’ kuassengi tamaka malompona Batara, Ia malompo la’biangngang nasikontu rewataya.

⁶ Nagaukangi apa Nakaerokia, ri langi’ siagang ri butta, ri tamparang siagang ri tamparang lompo sannaka lantanna.

⁷ Battu ri cappa’na buttaya appabattui rammang, appareki kila’ untu’ bosi. Nampa Naparenta anginga sollanna assulu’ battu ri tampa’ pammolikanNa.

⁸ Ri Mesir Nabunoi sikontu ana’ bungasaka battu ri rupataua sa’genna olo’-oloka.

⁹ Anjoreng Nagaukangi jai gau’ appakalannasa’ siagang tanra untu’ anghukkungi karaenga siagang sikontu pagawena.

¹⁰ Jai bansa Naposso’, siagang Nabuno sikamma karaeng barania:

¹¹ Sihon karaeng Amori siagang Og karaeng Basan, kammayatompa sikontu karaenga ri Kanaan.

¹² Nampa napassareang pa’rasanganna ke’nanga a’jari napatang Israel, umma’Na.

¹³ O, Batara, iKatte tuli lanikabarrang, siagang arenTa niu’rangi ri sikontu turungang,

¹⁴ saba’ iKatte ampassareangi kaadelanga mae ri ummatTa, siagang angkamaseangi ata-atanTa.

¹⁵ Barhalana ke’nanga iamintu battu ri bulaeng siagang pera’, bate pare’ limanna rupataua.

¹⁶ Nia’ bawana, mingka takkulleai a’bicara, nia’ matanna, mingka taccinikai.

¹⁷ Nia’ tolinna, mingka takkulleai allangngere’, battu ri bawana tena nappasa’ assulu’.

¹⁸ Tapporo kamma tomminjo sarenna tau amparekai, siagang tau tappaka mae ri ia.

¹⁹ Pujimi Batara, he umma’ Israel, pujimi, he imang-imanNa Allata’ala!

²⁰ Pujimi Batara, he sikamma tu Lewi, pujimi, he ikau ngaseng tau mappilangngeria.

²¹ Pujimi Batara ri Sion, ri Yerusalem, tampa’ pammantanganNa. Pujimi Batara!