Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ale anakku, ramotkon ma hatangku, anjaha simpan ma bahen parentahku;

² jaga ma parentahku ase manggoluh ho, ampa titahku songon anak ni matamu.

³ Sangkutkon ma ai bani jari-jarimu, bani uhurmu ma suratkon ai.

⁴ Hatahon ma bani hapentaran, “Botouhu do ham” anjaha huanmu ma goran hauhuron ai,

⁵ ase ia ma na manramotkon ho dompak parinangon ni halak, dompak parinangon na legan siparsahap na landit.

⁶ Mangkawah do ahu sahali humbani jendela ni rumahku, humbani jaring-jaringni ai,

⁷ gabe huidah ma sahalak na so maruhur, dapot panonggorhu ma sada garama, na so marpangartian,

⁸ montas i pasar, dohorhon suhi-suhi ni rumahni, mardalan bani dalan hu rumahni ai,

⁹ sanggah samun ari, sanggah bodari, sanggah borngin anjaha golap ari.

¹⁰ Anjaha tonggor ma, sada naboru roh manjumpahkonsi, marpakeian boru jalang, maruhur akal-akal.

¹¹ Seng marhatontuan panlangkahni, garang do ia, seng tarsohkonsi be naheini i rumahni;

¹² tongkin ia i alaman, tongkin nari domma i tiga, bani ganup sirpang ni dalan do ia manggompangi.

¹³ Itangkap ma parana ai anjaha isummah, marhasoman bohi na so maila iparsahapkon ma ia, nini,

¹⁴ “Marutang galangan banggal ni uhur do ahu, sadari on do hugalar bagah-bagahku.

¹⁵ Ai do ase luar ahu manjumpahkon ham, laho mangindahi bohimu, gabe jumpah do ham.

¹⁶ Domma huamparhon apei bani podomanku, marhasoman linnen Masir sibagei rupa.

¹⁷ Domma hupamisbou podomanku marhitei mir, aloe ampa kulit manis.

¹⁸ Laho ma hita pasombuh-sombuh uhurta ronsi patar.

¹⁹ Ai seng i rumah dalahingku, bani pardalanan na madaoh do ia nuan.

²⁰ Iboan do ranjut parduitanni, bani bulan tula pe ia mulak.”

²¹ Taroto do ia ibahen marhitei buei ni hatani, teleng do uhurni marhitei landit ni parsahapni.

²² Iihutkon ma ia torus songon lombu na tinogu hu pamotongan, songon ursa na masuk hubagas jarot,

²³ ronsi hona tiham atei-ateini ibahen tanja; songon manuk-manuk do ia mandorab sambil, seng ibotoh hosahni sandiri do na niagouni ijai.

²⁴ Ai pe, ale anakku, tangihon ma ahu anjaha paruhurhon ma hata ni pamanganku.

²⁵ Ulang ma manirpang uhurmu dompak dalanni ai, ulang ma kahou ho bani dalanni.

²⁶ Ai buei ma halak matei na niraseihonni, anjaha bahat ma na nibunuhni.

²⁷ Dalan manuju dompak nagori toruh do rumahni, tuad hu kamar ni hamatean.