Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tangar ma, ale anakku, pangajarion ni bapanima, paruhurhon ma, ase dapotan pangarusion.

² Ai ajaran na madear do sihol bereonku bennima, podahkai ulang ma tadingkon hanima.

³ Sanggah poso ope ahu i lobei ni bapa, etek anjaha anak sasada i lambung ni inang,

⁴ iajari do ahu, nini hu bangku, “Sai marsijoloman bani hatangku ma uhurmu, dalankon parentahku, ase manggoluh ho.”

⁵ Pindahi ma hapentaran, pindahi hauhuron, ulang lupa ho pasal ai, ulang ho manlembang humbani hata ni pamanganku.

⁶ Ulang ma tadingkon ai, ase iramotkon ho, haholongi ma ai, ase ijaga ho.

⁷ Parjadi ni hapentaran, ai ma, sari ma hapentaran, sari ma hauhuron marhitei sagala na dong bam.

⁸ Harga ma bahen ai, jadi patimbulonni ma ho, rohop ma ai, ase ipasangap ho.

⁹ Nahkononni do bani ulumu rudang na majenges, anjaha sortali na majagar do berehononni bam.

¹⁰ Tangihon ma, ale anakku anjaha jalo ma hatangku, ase tambah ari-ari ni goluhmu.

¹¹ Sihol do ajarhononku bam dalan hapentaran, anjaha togu-toguonku ho bani dalan na pintor.

¹² Bani pardalanmu, seng dong na mangolat langkah-langkahmu, anjaha marlintun pe ho, seng anjai tartolsu.

¹³ Jolom ma ho bani podah ulang paluah, ramot bahen, ai hagoluhan do ai bam.

¹⁴ Dalan ni parjahat ulang masuki, anjaha ulang ma dalani dalan ni halak na jahat.

¹⁵ Lembangi ma ai, ulang montas hunjai, simbili ma ai, toruskon dalanmu.

¹⁶ Seng tarpodom sidea anggo lang palobei manjahati, seng ra sinok matani, anggo lang lobei dong na targompang ibahen.

¹⁷ Hajahaton do ruti bani sidea, anjaha pangodoh-odohon anggur ni sidea.

¹⁸ Tapi dalan ni halak parpintor songon sinalsal sogod-sogod do, lambin torang marsinondang paima tongah ari.

¹⁹ Dalan ni halak parjahat lotir do, seng ibotoh sidea ija partolsuan.

²⁰ Ale anakku, parimbagaskon ma hatangku, bani sahapku ma pateleng pinggolmu.

²¹ Ulang ma sasap ai humbani matamu, simpan ma ai ibagas uhurmu.

²² Tongon, hagoluhan do ai bani na jumpahan ai, tambar bani haganup angkulani.

²³ Tang siporlunan, jaga ma uhurmu, ai hunjai do luar hagoluhan.

²⁴ Ambukkon ma humbam pamangan siparladung, anjaha sahap na marputor-putor daoh ma ai humbam.

²⁵ Pintor ma panonggor ni matamu hu lobei, anjaha dompak lobei ma pangkawahmu.

²⁶ Pardiateihon ma panlangkah ni naheimu, ase tarjamin ganup dalanmu.

²⁷ Ulang ma manlembang hu siamun atap hu sambilou, pasurut ma naheimu humbani hajahaton.