Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 He ana’-anaka, pilangngeri laloi pappakainga’na manggenu. Parhatikangi anjo, nanula’jari tau cara’de’.
2 Anne apa kupangngajarranga mae ri kau bajiki, jari teako bawang-bawangngangi.
3 Ri wattungku ca’di ija, ana’ sitau-tauna tau toaku,
4 naajaraka’ manggeku. Nakana ri nakke, "U’rangi sikamma pappakaingakku, tea’ laloko kaluppai. Gaukangi pitunju’-pitunjukku, sollanna mate’ne tallasa’nu.
5 A’jariko tau cara’de siagang tau tarang pikkirannu! Tuli u’rangi sikamma pappakaingakku siagang teako pelakki."
6 Pakala’biriki kacara’dekanga, nanijagaiko ri kacara’dekanga; mangngaiko ri ia natuli lanajagaiko sollannu tuli amang.
7 Kaminang parallua musti uru nugaukang iamintu usahako a’jari cara’de’. Manna apa nuondang, mingka uru-urua iamintu usahako anggappa pangngassengang.
8 Pakalompoi kacara’dekanga, nanupakatinggi. Raka’ majarreki, nalanapabattuangko kala’birang.
9 Lanasareko belo-belo bunga ga’ga, untu’ a’jari songko’ kalompoannu.
10 Pilangngeria’ na’! Parhatikangi baji’-baji’ sikamma pappakaingakku, nala’bu umuru’nu.
11 Le’ba’mi kupangngajarrang kacara’dekanga mae ri kau siagang kupicinikiangko antekamma batena nikanaya tallasa’ annabaya.
12 Punna kamma anjo tallasa’nu, tenamo nulanggappa salibanra ri wattu a’jappanu, siagang tenamo nulatatto’ro ri wattunnu lari.
13 Tuli u’rangi ajarang le’baka nutarima battu ri nakke. Jagai anjo baji’-baji’, saba’ lanri anjo pangngajaraka nalangngerang wassele’ tallasa’nu.
14 Teako turuki batena attallasa’ tau ja’dalaka, siagang teako palembai panggaukanna ke’nanga.
15 Teako parhatikangi ke’nanga. Pakabellai kalennu battu ri ke’nanga, siagang a’jappa tulusu’ mako ikau.
16 Tau ja’dalaka takkulleai attinro punna tenapa nagaukangi apa tenaya nabaji’. Tata’do’dokai ke’nanga punna tenapa nabalai paranna tau.
17 Kaja’dallang siagang kapallakkanga, iami a’jari sanrapang kanrena siagang inunganna ke’nanga.
18 Oloanna tau ja’dalaka sassangi sangkamma sassanna bangngia. Tatto’roi siagang tu’guruki ke’nanga natanaassenga kalenna. Mingka, oloanna naoloa tau bajika sanrapangi pammumbana alloa, pila’ sallo pila’ singaraki, sa’genna kala’busanna a’jari singara’ sikali.
19 (4:18)
20 Parhatikangi kana-kanangku, na’! Pilangngeri sikamma pappakaingakku.
21 Teako pelakki, passangalinna tuli boliki ri pa’mai’nu.
22 Tau ampahangai la’jari sehaki lalang tallasa’na.
23 Katutui bajiki atinnu, nasaba’ atinnu ampattantui oloang tallasa’nu.
24 Tea’ laloko appasuluki kana-kana tenaya natojeng. Teako pa’dongo’-dongoki siagang pakabellai kana-kana balle-ballea untu’ ampa’dongo’-dongoki parannu tau.
25 Parallui accaya rupannu lalang kalambusang pa’mai’nu; tena nuparallu a’gau’ lanri nia’na ero’ taccokkonu.
26 Pikkiri’ baji’-bajiki rolong nampa ampanggaukangko, nalangngerang wassele’ sikontu usahanu.
27 Pakabellai kalennu battu ri kaja’dallanga, siagang lambusukko lalang tallasa’nu. Tea’ laloko ammengkai battu ri oloang annabaya.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA