Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Anggo hundul ho rap mangan pakon sahalak panggomgomi, pangkei ma pardiatei atap aha na i lobeimu;

² nahkon ma pisou bani tolonanmu, anggo parhisap ho!

³ Ulang ma sir uhurmu bani na mantin-mantinni ai, ai sipanganon na paoto-otohon do ai.

⁴ Ulang ma lojai dirimu mangindahi habayakon, padaoh ma pingkiranmu hunjai.

⁵ Ai anggo mangkawah ho hujai, jadi lang dong be, ai sompong do marhabong ia, gabe habang songon manuk-manuk nanggordaha hu awang-awang.

⁶ Ulang ma pangan indahan ni halak parmata na serleng, ulang ma sir uhurmu bani sipanganonni age naha mantinni,

⁷ ai mambahen hira-hira do ia ibagas uhurni. “Mangan anjaha minum ma ham,” nini hubam, tapi uhurni seng dompak ho.

⁸ Gabe utahkononmu ma holi sisampohul na pinanganmai, anjaha sisoya-soya ganup hatamu na madear ai.

⁹ Ulang ma marsahap ho i lobei ni halak na oto, ai mapas do uhurni bani sahapmu na marisi hapentaran ai.

¹⁰ Ulang ma osor batu parbalogan sisapari, anjaha ulang ma soluk ladang ni na tading maetek,

¹¹ ai gogoh do sipanluluhon sidea; Ia do mansuhutkon parkara ni sidea dompak ho.

¹² Dompakkon ma uhurmu bani pangajaran, sonai pinggolmu bani sahap na gok habotohon.

¹³ Ulang ma parontihon pangajaran hubani dakdanak, porini ilonsing ho pe ia, seng pala matei.

¹⁴ Ilonsing ho do tongon angkulani, tapi na paluahkon tonduyni ai do ho hun nagori toruh.

¹⁵ Ale anakku, anggo gok hapentaran uhurmu, uhurhu pe malas do.

¹⁶ Anjaha marolob-olob do tonduyhu, anggo isahapkon bibirmu hasintongan.

¹⁷ Ulang simburu uhurmu mangidah pardousa, tapi marhabiaran ma ho tongtong.

¹⁸ Tongon, adong do ari pangapudianan, seng anjai rotap pangarapanmu.

¹⁹ Tangihon ma, ale anakku, ase pentar ho, anjaha dompakkon ma uhurmu bani dalan na pintor.

²⁰ Ulang ma saor ho pakon halak sisibur anggur atap pakon halak na hisapan bani gulei;

²¹ ai halak parmabuk pakon parhisap maningon miskin do, anjaha marhiou rigat-rigat halak na marosuh modom-modom.

²² Tangihon ma bapamu na mantubuhkon ho, anjaha ulang mapas uhurmu bani inangmu anggo matua ia.

²³ Hasintongan ma boli, anjaha ulang jualhon ai; sonai hapentaran, pangajaran ampa pangarusion.

²⁴ Tongon, malas do uhur ni bapa ni halak parpintor; anjaha ise na mantubuhkon anak na maruhur, malas do uhurni marhalanihonsi.

²⁵ Malas ma tongon uhur ni bapamu ampa inangmu, marolob-olob ma uhur ni na mantubuhkon ho.

²⁶ Bere ma, ale anakku, uhurmu bangku, anjaha sai iharosuhkon matamu ma dalanku.

²⁷ Ai doskon godung na bagas do boru jalang, anjaha parigi na sompit do naboru parbangkis.

²⁸ Tongon, songon panamun do ia manggompangi, anjaha ipabuei do halak sipangeluk i tongah-tongah ni hajolmaon.

²⁹ Ise do na hoih-koih? Ise do siparinangoi? Ise do siparingor? Ise do na holsohan? Ise do na ugahan seng marhala? Ise do siparmata na gombur?

³⁰ Halak na halalaban minum anggur, halak na laho mandai-dai minuman na koras.

³¹ Ulang pakawah-kawah anggur halani magerger rupani, halani marlinang idahon ibagas panginuman, halani lamlam panjalirni hubagas.

³² Dobni mangkarat do ai songon ulog, anjaha mandoit songon darih.

³³ Idahon ni matamu ma na ganjil-ganjil, anjaha uhurmu mansahapkon na so marturut.

³⁴ Gabe songon halak na modom i tongah laut ma ho, anjaha songon halak na modom i ujung ni tiang layar.

³⁵ Nim, “Ibogbog sidea do ahu, tapi lang maborit, ibalbal sidea do, tapi lang huahapkon. Anggo tarjolma ahu, ulakanku do minum.”