Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Manusia ersura-sura, tapi Dibata kap si erbahan keputusenna.

² Banci jadi payo iakapndu si idahikenndu, tapi TUHAN kap si nimbangsa kai si lit i bas ukurndu.

³ Pindolah pasu-pasu TUHAN guna pendahinndu, maka seh bagi si nisurandu.

⁴ Kerina si nggo ibahan TUHAN, lit kap tujunna, dingen tujun si ItetapkenNa man kalak jahat eme kap pengukumen.

⁵ Nembeh ate TUHAN man kerina kalak si meganjang rukur, janah la IpelepasNa ia pulah i bas ukumen nari.

⁶ Kalak si tutus dingen tek nandangi Dibata ndatken pengalemen, kalak si patuh man TUHAN la jadi si jahat man bana.

⁷ Kune meriah ukur TUHAN ibahanndu, imbang-imbangndu IbahanNa jadi temanndu.

⁸ Madin rulih sitik tapi alu bujur, asangken rulih mbue tapi nipu.

⁹ Manusia banci ersura-sura, tapi Dibata si netapken perdalanen geluhna.

¹⁰ Raja ndatken kuasa idur Dibata nari; emaka keputusenna lalap benar.

¹¹ Ate TUHAN maka bujur min kalak i bas perbinagan, subuk i bas make sukat-sukat bage pe timbangen.

¹² Raja la banci ngkapiti kejahaten, sabap kerajanna paguh erkiteken keadilen.

¹³ Ngena ate raja megiken kebenaren kalak si ngerana alu bujur ikelengina.

¹⁴ Kalak pentar lalap idaramina dalan gelah meriah ukur raja, sabap adi raja nembeh banci jadi lit kalak si iukum mate.

¹⁵ Lias ate raja mereken kegeluhen kap, bali ras embun si nusur tupung paksa perlego.

¹⁶ Kepentaren ras pemeteh ndauh ergan, asangken pirak ras emas.

¹⁷ Kalak bujur nilahken si jahat, si njagai geluhna terkelin me.

¹⁸ Kegombangen mabai ku kebenen, keganjangen ukur mahanca guling nge.

¹⁹ Madin rukur meteruk dingen musil, asangken erteman ras kalak si meganjang rukur dingen dat bagin i bas erta rampasenna.

²⁰ Perdiatekenlah pedah gelah jumpa si mehuli, ernalemlah man TUHAN maka dat kemalemen ate.

²¹ Kalak pentar itandai arah pengertinna, pengerana si mehuli erbahanca kalak reh tekna ka.

²² Kalak pentar dat kegeluhen i bas kepentarenna nari, tapi ngajari kalak lenge la kap lit gunana.

²³ Kalak si beluh rukur, iukurina lebe maka ibelaskenna, emaka lebih tek kalak nandangi kai si ibelaskenna.

²⁴ Ranan mehuli desken tengguli, entebu nanamna, tama kejuah-juahen man kula.

²⁵ Mawen-mawen iakap kalak kempak kegeluhen dalan si idalanina, tapi kempak kematen kepeken perlawesna.

²⁶ Kelihen mahanca kalak erdahin erbintuas, gelah ula melihe beltekna.

²⁷ Kalak jahat iusahakenna encilakaken kalak si deban, rananna jahat desken api si gurlah.

²⁸ Ranan la tuhu kerna kalak, ipembarken kalak jahat, ipeturahna perjengilen dingen icedakenna perkade-kaden.

²⁹ Kalak jahat itipuna temanna, ibabaina gelah ia cilaka.

³⁰ Metengetlah nandangi kalak si cirem dingen engkirepken matana man bandu, sabap i bas pusuhna iukurkenna si jahat.

³¹ Ulih kalak bujur, eme kap cawir metua; uban desken mahkota si meherga kap.

³² Madin jadi kalak saber asangken erkuasa, ngkuasai diri ulin asangken naluken melala kota.

³³ Guna meteh nasip manusia ibahan kalak tikam tanduk, tapi TUHAN jine kap si nentuken jabapna.